Hơdôm hrơi anai, amăng hmua pơdai prong đơr hơr ƀơi hơdôm boh să Chư A Thai, Phú Thiện, tơring čar Gia Lai, hmua pơdai lăng kơñĭ prong rơhaih. Sa, dua blah, arăng apah măi yuă laih. Ơi Kpă An (djuai ania Jarai) dŏ amăng plơi Ring Dap, să Chư A Thai, nao čuă hmua pơdai pran jua hok mơ-ak lơm pơdai mơboh. Ñu brơi thâo sang anŏ hơmâo giăm 1,5 ektar hmua pơdai ngă 2 bơyan, ia mă mơng dơnao pơkŏng ia Ayun Hạ, yua anun rĭm thun pơhrui glăi giăm 20 tơ̆n pơdai.

“Ră anai ngă pơdai ia ƀơi kual anai, tơdah ta pioh kơnong ƀong amăng sang anŏ đôč ăt rơbêh rơbai mơn. Tơdơi kơ duh hĭ abih prăk tuh pơ alin klơi kmơk, ia jrao, mơnuih mă bruă, măi yuă …dŏ glăi sang anŏ pioh yua ƀong amăng ha thun. Ƀu kơnong kơnong djop kơ ƀong huă ăt dưi djă pioh brơi hơdôm thun dong, hăng ba sĭ kiăng hơmâo prăk yu. Hlâo adih, ngă tơjŭ pơdai hăng hmua kơdư, yuă hơpuă ƀu hơmâo. Bơ ră anai, ngă hmua pơdai ia yua hơmâo dơnao pơkŏng ia Ayun Hạ, hơmâo djop ia yua, anun pơhrui hơmâo hmăi. Mơng hrơi ngă hmua pơdai ia anai, tơlơi hơdip neh met wa trơi pơđao”.

Amăng hơdôm hmua pơdai ia să Phú Thiện (tơring čar Gia Lai)- anih hơmâo anăn apăn “Braih Phú Thiện” hing ang, măi yuă pơdai hmư̆ dik dak amăng kual. Ơi Nay Keng (djuai ania Jarai), khua plơi Rbai, să Phú Thiện brơi thâo, djop ia yua mơng dơnao pơkŏng ia Ayun Hạ, mơnuih ƀôn sang amuñ amăng ngă hmua, pơjing hơdôm kual pla kơbâo, hơbơi čin, hŏt…Hlâo adih mơnuih ƀôn sang kơnong kơ ngă hmua pơdai pioh ƀong đôč, ră anai pơlir hăng anom bơwih ƀong sĭ mơdrô kiăng pla pơdai jơman, mă anăn apăn “Braih Phú Thiện” hing ang.

“Mơng hrơi hơmâo dơnao pơkŏng ia Ayun Hạ, bruă ngă hmua mơng neh met wa amăng kual jai hrơi gêh gal biă yơh. Ia mơng dơnao pơđoh tui king ia, rô nao tơl hmua pơdai, yua anun neh met wa amuñ amăng bruă pla pơjing, ƀu gơnang nao ia hơjan kar hăng hlâo adih dong tah. Amăng bơyan hơpă hơmâo djop ia, pơdai hiam, mơboh, huăi kơƀah ƀong kar hăng hlâo adih. Neh met wa ƀu djơ̆ kơnong ngă hmua pơdai 2 bơyan amăng ha thun đôč ôh ăt dưi pok prong đang hmua pla pơjing, pơlir hăng ngă hŏt, hơbơi čin kiăng lu dong prăk pơhrui. Yua anun, tơlơi hơdip bơwih ƀong huă mơng mơnuih ƀôn sang jai hrơi hơđong hăng đĭ đăi ƀiă. Dơnao pơkŏng ia Ayun Hạ hơmâo djru brơi neh met wa pơplih amăng ngă hmua, đĭ tui gơnam pơhrui, pơgôp pơđĭ kyar bơwih ƀong huă amăng djop ƀon lan”.

Ayun Hạ lĕ sa amăng hơdôm ring bruă dơnao pơkŏng ia prong ƀơi kual Dap kơdư, pơhlôm brơi ia yua kơ rơbêh 13.500 ektar phun pla djop mơta, amăng anun lu hloh lĕ pơdai ia. Hrŏm hăng hơdôm pơjeh phrâo, mă yua boh thâo phrâo, hơdôm thun rơgao, ia mơng dơnao pơkŏng ia Ayun Hạ hơmâo pơgôp ngă pơdai mơboh tui ƀơi hơdôm boh să Phú Thiện, Ayun Pa, Chư A Thai đĭ 8 tơ̆n sa ektar, đa hơmâo anih 10 tơ̆n sa ektar. Ơi Phạm Văn Lượng, hlâo anun ngă Khua git gai Ping gah tơring glông Phú Thiện, ră anai lĕ kơ-iăng khua git gai Ping gah-Khua Jơnum min mơnuih ƀôn sang să Chư A Thai, tơring čar Gia Lai, brơi thâo pơdai lĕ phun pla lu hloh amăng ƀon lan. Ngă tui tơlơi pơtrun mơng Ping gah tơring glông Phú Thiện (hlâo anun) kơ pơtrut kơtang yua boh thâo phrâo amăng ngă hmua, anăp nao pơjing anăn apăn “Braih Phú Thiện”, rĭm thun ƀon lan đing nao mă yua prăk kak djru brơi mơnuih ngă hmua, sit biă ñu lĕ mơnuih djuai ania ƀiă pok prong hmua ngă pơdai. Ring bruă dơnao pơkŏng ia Ayun Hạ ăt djru brơi mơnuih ƀôn sang pơplih tơlơi pơmĭn amăng ngă hmua; sit biă ñu lĕ mơnuih djuai ania ƀiă dưi hơmâo pơplih mơng ngă hmua gơnang nao ia hơjan hơdai nao ngă hmua ba glăi boh tŭ yua.

“Tŏ tui boh tŭ yua mơng hơdôm ring bruă dơnao pơkŏng ia Ayun Hạ, hơmâo ia kiăng pơđĭ kyar bơwih ƀong huă, neh met wa hơmâo đing nao pơplih hơdôm hơbô̆ bruă bơwih ƀong huă. Hăng tơring glông Phú Thiện hlâo adih, neh met wa hơmâo ngă tui hơdôm hơbô̆ bruă pơlir ngă hmua pơdai ba glăi boh tŭ yua lu hloh. Mơng anun, mơnuih ƀôn sang hơmâo hơđong tơlơi hơdip; sit biă ñu lĕ mơnuih djuai ania Jarai hơmâo mă yua lu pơjeh pơdai phrâo hăng ba glăi pơhrui lu hloh.”

Hơdôm blah hmua pơdai tơsă kơñĭ hrơi anai ba glăi tơlơi hok mơ-ak brơi neh met wa ngă hmua amăng hơdôm boh să Chư A Thai, Phú Thiện, Ayun Pa (tơring čar Gia Lai) pơdah tong ten boh tŭ yua mơng dơnao pơkŏng ia Ayun Hạ. Mơng ngă hmua pơhrui ƀu hơmâo, lơm gơnang nao ia hơjan, mơnuih djop djuai ania ƀiă anai hơmâo ngă hmua 2 bơyan hơđong, pơlir hăng pla pơjing lu phun pla pơkŏn, ƀơƀrư̆ đĭ tui prăk pơhrui, hrưn đĭ pơdrong sah. Tơlơi truh kih anai ăt brơi ƀuh tơlơi yôm phăn amăng bruă yua boh thâo phrâo hăng mă yua klă hơdôm ring bruă dơnao pơkŏng ia amăng pơđĭ kyar ngă hmua hơđong kjăp amăng kual Dap kơdư. /.