Ƀơi ƀuôn Jung, să Krông Pač, tơring čar Dak Lak ơi Y Thơm brơi thâo, đang pla sầu riêng mơng sang anŏ pĕ pơhrui giăm 35 tơ̆n, aset ƀiă pơhmu hăng hơdôm bơyan hlâo anun:

“Yua ayuh hyiăng ƀu gêh gal anun ngă sa, dua đang hmua pơhrui ƀu hmâo, boh pĕ pơhrui ƀu hiam pơhmu hăng hơdôm thun yua anun sĭ mơdrô pơ tač rơngiao thun anai aset ƀiă ngă kơ nua ăt trun mơn. Kâo pơmĭn amra sĭ hĭ abih tơdah hơmâo nua mơng 40.000-50.000 prăk sa kĭ”.

Ƀu djơ̆ kơnong đang ơi Y Thơm, lu sang anŏ ƀơi Krông Pač, Krông Năng ƀudah Čư̆ Kuin ăt tui anun mơn. Tơdah thun hlâo ƀing blơi pơhrui bơrơsua rơkâo lui hlâo, nua ăt đĭ trun rĭm hrơi, ră anai bruă sĭ mơdrô ăt hơ-et kret kruai biă mă. Boh sầu riêng ƀu hiam ngă kơ lu anih anom glăk dŏ sư̆ rơbư̆. Ơi Lê Anh Trung, Khua khul sầu riêng Dak Lak brơi thâo: dêh čar Khač anih blơi mut phun ăt hruă kjăp amăng blơi mut. Tơdah hlâo anun ƀing sĭ mlia ăt amuñ blơi pơhrui tui jơlan phara mơ̆ ră anai tơlơi pơkă kơ mrô kual pla, anih anung gơnam hăng kual pla pơjing ngă kơ bruă blơi pơhrui kiăng djơ̆ hăng tơlơi pơkă. Hrŏm hăng anun, kơnuk kơna ba tơbiă tơlơi pơkă ƀing blơi pơhrui kiăng čih anăn ngă pô sĭ mơdrô gơnam hăng ngă tui bruă duh jia sĭ mơdrô sầu riêng. Ơi Lê Anh Trung lăi pơtong:

“Ƀing sĭ mlia tơdah kiăng blơi pơhrui sầu riêng kiăng ngă hră bơwih ƀong sĭ mơdrô tui tơlơi pơkă. Tơdah ƀu ngă, lơm anom bruă mă jia ƀudah kông ang ƀuh amra phak kơtang biă mă. Mơng lơ 1/7, bruă sĭ mơdrô kiăng duh jia 5%, prăk prăk phak brơi ƀing mơnuih ngă soh ăt ƀiă aset ôh. Yua hơmâo tơlơi pơkă djơ̆ tơlơi phiăn tong ten, bruă sĭ mơdrô thun anai hơđong ƀiă yơh, huăi ƀuh bruă hluh nao hlơi pơhrui kar hăng hlâo anun”.

Hăng tơlơi pơplih amăng tơlơi pơkă, bruă sĭ mơdrô hăng tơlơi phara amăng bơyan phrâo lĕ huăi ƀuh ƀing sĭ mlia lui blơi pơhrui, bơrơsua amăng bơyan pĕ pơhrui thun anai plai ƀiă yơh. Mơnuih ngă hmua ăt pơplih tơlơi pơmĭn, thâo lơm hơbin dưi sĭ. Ơi Nguyễn Công Điềm, să Ea Knuêc, tơring čar Dak Lak brơi thâo:

“Hơdôm thun hlâo adih nua đĭ trun na nao, thun anai yua hơmâo anom bruă wai lăng hăng anom bơwih ƀong sĭ mơdrô kơnuk kơna gum hrŏm, bruă sĭ mơdrô hơđong ƀiă yơh”.

Ơi Lê Đăng Minh, să Quảng Phú, tơring čar Dak Lak brơi thâo:

“Thun anai sang anŏ pĕ pơhrui thun tal 5, him lăng pĕ 20 tơ̆n. Truh ră anai ăt dưi pĕ tui tơlơi čang rơmang mơn, bloi boh sầu riêng ăt pal, nua ñu 70.000 prăk sa kĭ”.

Ră anai đơ đam tơring čar Dak Lak hơmâo giăm 40.000 ektar đang sầu riêng, rơbêh 26.000 ektar dưi pĕ pơhrui, amăng bơyan thun 2025 pĕ him lăng 392.000 tơ̆n, pĕ mơng blan 8 truh blan 10. Kiăng pơhlôm sĭ mơdrô pơ tač rơngiao, jơnum min mơnuih ƀôn sang tơring čar hơmâo ba tơbiă tơlơi črâo trun kơ mrô sầu riêng hăng sĭ mơdrô sầu riêng bơyan 2025, rơkâo djop ƀon lan wai lăng kjăp kual pla, anih anung gơnam, kiăo tui lăng bruă pơhlôm hơdjă, pơgăn bruă juă nua. Ơi Nguyễn Minh Huấn, Khua gơnong bruă ngă hmua hăng ayuh hyiăng lŏn mơnai tơring čar Dak Lak pơsit tong:

“Gơnong bruă gum hrŏm hăng jơnum min mơnuih ƀôn sang hơdôm boh să, phường hrưn đĭ răng kơđiăng amăng wai lăng boh pla, črâo brơi bruă pla pơjing bong glăi ayuh hyiăng pơplih sat; kơtưn pel ĕp pơhlôm gơnam hiam hơdjă, mrô kual pla pơjing, anih anung boh sầu riêng sĭ mơdrô pơ tač rơngiao”.

Bơyan thun 2025 amra ngă mơnuih pla sầu riêng ƀơi Dak Lak ăt aka djơ̆ pran pơhrui hrŏ trun. Samơ̆ sui pơ anăp, lơm boh hiam, bruă hruă kjăp amăng sĭ mơdrô jai hơđong, amra djru brơi gơnong bruă anai pơđĭ kyar hơđong kjăp, bĕ hĭ bruă đĭ nua jang jia hăng anăp nao rơnoh sik nit amăng anih anom blơi mut mơng tač rơngiao./.