Ƀơi đang tơbâo prong 17 ektar ƀơi să Ea Sô, tơring glông Ea Kar (Dak Lak), ơi Võ Quốc Dị hrŏm hăng hơdôm pluh čô mơnuih mă bruă koh tơbâo. Ñu lăi pơthâo, juăt hăng phun tơbâo rơbêh kơ 20 thun, sang anô̆ hmâo prăk pơhrui glăi hơđong. Kơnong kơ 4 thun jê̆ hăng anai, rim thun sang anô̆ hmâo pơhrui glăi rơbêh kơ 1 klai prăk. Prăk pơhrui glăi anai sa črăn kơnang kơ hơdră bruă pơhrui blơi nua hơđong mơ̆ng sang măi pơkra sik, hrŏm hăng bruă mă yua hơdră phrâo amăng bruă pla tơbâo. Ơi Võ Quốc Dị brơi thâo:

“Sang kâo ră anai biă ñu mă yua djuai tơbâo phrâo K3 yơh phun ñu. Măi pruih ia mơ̆ng sang anô̆ kâo leng kơ mă yua béc pruih mă ha jăn, đuăi hăng apui lơtrik, hmâo tom măi pơkĕ apui pơhlôm hlâo. Rim wot koh tơbâo ƀudah pla phrâo, ƀing gơmơi leng kơ pơkra dưm dăp béc pruih ia dong mơ̆ng akô̆ bơyan pla, sui amăng rơwang 3-4 blan akô̆ thun. Laih anun lơm tơbâo đĭ dlông prong, sang gơmơi amra pruai kơmok, biă ñu lĕ NPK hăng luk dong urê, djru phun pla bluh đĭ tañ pioh tơbâo bluh đĭ dlông gôm lui rok”.

Ăt juăt hăng bruă pla tơbâo mơ̆ng rơbêh kơ 20 thun, ơi Tô Bá Hồng, ƀơi să Ea Sô, tơring glông Ea Kar, brơi thâo:

“Kâo hmâo 5 ektar, sang măi djru brơi lu prăk kah hăng prăk pruih sa bơyan 3 klăk prăk sa ektar, koh tơbâo 2 klăk prăk sa ektar; laih anun kơmok pruai lĕ tui hluai kơ đang tơbâo sang pô lu ƀudah ƀiă dưi hmâo sang măi tuh pơplai. Bơhmutu ñu, sa ektar lĕ 1 tơn kơmok, tui hluai kơ pô čơkă mă dong. Phun tơbâo lu thun hăng anai nua hơđong, pơhrui glăi prăk klă. Kah hăng thun anai, sang kâo sa ektar hmâo 70-80 tơn, nua 1,1 – 1,3 klăk prăk sa tơn, pơsir abih prăk yua pioh pla ăt dô̆ hmâo mơn 70 klăk prăk sa ektar”.

Să Ea Sô hmâo rơbêh kơ 1.000 ektar đang tơbâo. Ơi Nguyễn Xuân Hữu, Khua Jơnum min mơnuih ƀôn sang să, lăi lĕ khă bôh tơhnal bơwih ƀong mơ̆ng phun tơbâo akă dưi pơhmu mơn hăng djop phun pla pơkon kah hăng sầu riêng, vải, bôh ƀrô yuan ƀudah phun kơphê, tiu, samơ̆ anai lĕ phun pla phun ƀơi kual lŏn čuah klai lŏn, djru lu sang anô̆ tơtlaih mơ̆ng ƀun rin hăng hmâo tơlơi hơdip mơda đĭ gŏ amŏ.

"Să juăt lăi pơthâo nao rai hăng sang măi pơkra sik, dưi pơsit tơdơi kơ bơyan tơbâo mơ̆ng rim djuai pơjeh hăng sang măi hmâo hăng glăk hmâo mă yua kơ djuai pơjeh hmâo bôh tơhnal djru neh wa ngă đang hmua. Laih anun tơlơi kơmok pruai, jrao pơgang phun pla lăp djơ̆ thơ, ƀing gơmơi ăt ƀuh sang măi pơkra sik lăng tui na nao, mă čơđeh pioh pel ĕp djru pơlar phun tơbâo pioh mă yua bôh thâo phrâo măi mok pioh bơwih brơi kơ phun tơbâo ngă hiưm hơpă tơbâo bluh đĭ lu klă hiam".

Tơring čar Dak Lak ră anai hmâo 15.000 ektar đang tơbâo, biă ñu ƀơi hơdôm bôh tơring glông Buôn Đôn, Ea Sup, Ea Kar hăng M’drak. Mrô tơbâo rim thun him lăng hmâo 1 klăk tơn.

Ơi Lê Tuân – Kơ-iăng Khua Sang bruă pơkra sik Mía Đường 333 Dak Lak brơi thâo, anom bơwih ƀong pơlir nao rai hăng rơbêh kơ 2.100 bôh sang anô̆ mơnuih ƀôn sang ƀơi hơdôm bôh tơring glông Ea Kar hăng Mdrak, pla 8.200 ektar đang tơbâo pioh pơkra sik, hăng mrô ñu năng ai 750.000 tơn tơbâo añrông rim thun. Sang bruă gơgrong hlâo gum hrŏm hăng mơnuih pla tơbâo hăng gong gai ƀơi anai pok pơhai hơdôm bruă mă pioh pla pơkra kơjăp sui thun:

“Sang măi glăk pơplih bruă pơkra kơjăp hloh pioh mă glăi lu prăk pla tơbâo, wai lăng koh tơbâo pioh tơbâo ba nao pơ̆ sang măi klă hloh. Hrŏm hăng anun, mă yua đut hlah hơdôm mơta aru areo tơdơi kơ pơkra pioh dưi hrŏ trun nua pla pơkra kah hăng pơkra kơmok vi sinh, bơ̆ djah tơbâo sĭ kơ hơdôm bôh anom rông hlô mơnong, ƀudah tui jơlan gah ră anai lĕ pơkra apui yua mơ̆ng djah tơbâo mơ̆ lu sang măi hmâo ngă. Ƀing gơmơi ăt glăk hơduah ĕp lăng mơn pioh pla lu djop pơjeh tơbâo klă hloh, pioh tơbâo bluh đah đĭ lu hăng hmâo lu sik amăng tơbâo amăng sa anih anom pla”.

Hăng tơlơi gơgrong hlâo pơlir hơbit kơjăp kơplah wah mơnuih pla hrŏm hăng anom bơwih ƀong sĭ mơdrô hăng gong gai plơi pla, bruă pla tơbâo pơkra sik Dak Lak glăk pơlar kơjăp dong, ba glăi prăk pơhrui glăi hơđong kơ hơdôm bơnah hăng djru bruă bơwih ƀong ƀơi să./.