Plơi Pơ Nang mơ̆ng djuai ania Bahnar ƀơi să Tú An, plơi prong An Khê, tơring čar Gia Lai dŏ djă pioh bruă pơkra gơnam gru đưm. Amăng sang glông đưm, ơi Đinh Văn Bup (djuai ania Bahnar) glăk mơñam pơgiong hơkă pioh sum ao, hăng bơnga hơkă hiam biă. Ƀơi sang apui ñu, hơmâo lu gơnam mơñam mơ̆ng huai, pơ-o, kram...sô laih kiăo tui thun blan. Ơi Đinh Văn Bup brơi thâo, abih tih gơnam anai yua ñu soh mơñam mă.

“Mơ̆ng anet kâo lăng ama kâo mơñam hơkă, bai, mơñam rơ-i čơngua, giong anun kâo hla tui. Truh kơ prong kâo hrăm mơ̆ng ƀing ayong, ƀing met dong kiăng thâo mơñam hơkă bai anet prong, hơmâo bơnga. Bai anai kâo juăt mă yua či gui djuh, sŏ ia, pioh abăn ao, ƀu sĭ kơ arăng ôh”.

Bruă mơñam bung bai rêu rô mơ̆ng djuai ania Bahnar mơ̆ng bruă mơñam či mă yua đôč, ră anai jing gơnam pioh sĭ yơh, jing gơnam pơhưč kơ ƀing tuai rơnguai, đa jing gơnam yua yôm, pơ ala brơi kơ gru grua. Ƀơi plơi Đê Kjiêng, să Ayun, tơring glông Mang Yang, tơring čar Gia Lai hơmâo ƀut bơwih ƀong pơ-ô kram yua ayong Si (djuai ania Bahnar) ngă pô.

“Mơ̆ng 14 thun kâo pơhrăm mơñam laih. Hơkă bai anet prong, ƀơi tơpang hơkă bai lĕ mơñam gru bơnga. Mơ̆ng bruă mơñam anai kâo pơmin pơčeh rai mơñam muk klum hơjan hlim. Phrâo a lĕ kâo lăng ƀu ư mơn, lu wơ̆t mơñam kâo lăng hiam djơ̆ pran laih. Ăt mơ̆ng bruă mơñam anai mơn, rơngiao kơ mơñam đoan, muk đoa, kâo ăt mơñam rai kơƀang dŏ mơñum ia če, hăng vali, kơdung bak. Hăng bruă mơñam tui gru đưm kâo ăt djă pioh mơn, yua dah hơkă bai kar hăng gơyut ta lơ̆m nao pơ hmua, gui djuh sô̆ ia. Kâo yua plang Facebook pơƀuh gơnam kâo mơñam. Pơhmutu kah hăng hơkă, bai, muk, kơƀang dŏ mơñum ia, vali hăng kơdung bak, kơ akŏ kjăp, anŏ hiam, nua hai rơgêh mơn amra hơmâo lu mơnuih thâo hăng rơkâo blơi”.

Hrŏm hăng bruă mơñam bung bai, ră anai ƀơi Gia Lai glăk ƀơ ƀrư̆ rŭ glăi bruă mơñam eng ao đưm mơ̆ng djuai ania ƀiă. Amai Rmah H’Tuyết (djuai ania Jarai) dŏ ƀơi ƀut plơi 10, tơring kual Phú Thiện, tơring glông Phú Thiện, Gia Lai pơphun bơwih ƀong hăng bruă tơčoh eng ao Jarai mơn. Blung a hơmâo arăng tơña blơi 50 blah kơ ƀing čơđai sang hră čem rông ană bă djuai ƀiă tơring glông. Mơ̆ng anun, lu mơnuih amăng plơi pla nao pơ anih tơčoh eng ao H’Tuyết či tơčoh eng ao Jarai. Amai H’July - sa čô tuai blơi gơnam brơi thâo:“Jing ană Jarai hơbai ta, kiăng soh yơh eng ao či buh amăng hrơi ngui ngor yôm. Hlâo adih, kâo hrŏm hăng neh met wa juăt nao blơi pơ sang čơ ƀudah pơ hơdôm anih tơčoh lui hơđăp. Mơ̆ng hơmâo anih tơčoh eng ao mơ̆ng amai H’Tuyết, kâo hăng neh met wa dưi blơi eng ao mơñam tơčoh hiam djơ̆ tui drơi ta. Mơ̆ng anun gơmơi ăt djă pioh gru grua hiam eng ao djua ania Jarai gơmơi mơn”.

Anŏ hiam mơ̆ng eng ao đưm hmư̆ hing pơ djŏp anih, H’Tuyết pơkra plang facebook, apah arăng buh eng ao phin rup, apah pô phin rup, pơkra hiam kiăng eng ao ñu hơmâo lu mơnui thâo. Rup dra Jarai amăng eng ao pơhưč hơdôm rơbâo wơ̆t čô mơnuih krăp lăng. Amai H’Tuyết brơi thâo, yua hơmâo plang internet mơn, rim blan hơmâo hơdôm rơtuh blah eng ao hơmâo tuai tơña blơi.

“Lơ̆m ngui facebook či pơƀuh hyu gơnam tam, kâo ƀuh hơmâo lu mơnuih mơ̆ng hơdôm boh tơring čar, ƀôn prong thâo eng ao Jarai gơmơi. Gơñu khăp biă yua dah lăng eng ao phara. Kiăng plang facebook kâo hơmâo lu mơnuih krăp lăng dong, kâo hơmâo hơdră ngă bruă phara mơn, triang phin rup, phin hiam, samơ̆ ăt pơhlôm eng ao hiam, kjăp mơn kiăng ƀing tuai ñu rai blơi na nao”.

Ră anai, tơring čar Gia Lai glăk pơphun ngă lu bruă kiăng rŭ glăi, djă pioh hăng pơpŭ kơ gru grua hiam mơ̆ng đưm hlâo, djru ba gru grua kual Dap Kơdư hơmâo lu gru hiam hloh. Yă Nguyễn Thị Thanh Lịch - Kơ-iăng khua Jơnum min mơnuih ƀôn sang tơring čar Gia Lai pơsit: Bruă mơñam eng ao mơ̆ng djuai ania Jarai, Bahnar hăng hơdôm phung djuai ania pơkŏn khŏm kiăng pơpŭ yôm. Mơ̆ng anun, mă yua boh thâo gru grua, sĭ mơdrô, djru ba mơnuih mơñam eng ao dưi pơđĭ kyar tơlơi bơwih ƀong.

“Ƀing gơmơi čang rơmang pơpŭ kơ ƀing kơhnâo, mơnuih pơphun brơi ƀing hlăk ai hor kơ gru grua đưm, pơlir hăng pơčeh phrâo. Tal dua dong, gơmơi čang rơmang pơƀuh hyu, kiăng ƀing kơsem min boh thâo gru grua, ƀing pơčeh phrâo, kač rup eng ao kiăng pơjing eng ao mơñam jing gơnam hơmâo nua yôm, pơđĭ kyar bơwih ƀong kơ mơnuih ƀôn sang djuai ƀiă ƀơi tơring čar Gia Lai.