Kiăng djru mơnuih ngă đang hmua dưi mă yua hơdră phrâo măi mok ƀơi hơpă kiăng dưi wai lăng hơdôm bôh than bơdjơ̆ nao bơyan mơyan. Anai ăt lĕ rơwang bruă hmâo mă pri sa khul čơđai gưl dlông amăng pơplông “Čơđai sang hră, čơđai gưl dlông hăng tơlơi pơmin pok phun bruă” tal 5 yua kơ Ding jum pơtô pơhrăm hăng pơtô juăt dêh čar pok phun.

Rơwang bruă ECO-HOUSE dưi hmâo 3 čô čơđai gưl dlông gah bruă mă pha ra lĕ Hồ Thanh Huy, Khua grŭp, čơđai gưl dlông thun tal 4 gah bruă mă yua hơdră măi mok, Lê Hoàng Minh Châu – thun tal 4 gah bruă wai lăng bơwih ƀong sĭ mơdrô hăng Trần Thị Trâm (thun tal 3 bruă sĭ mơdrô hăng tuai čuă ngui) gah yŭ tơlơi pơtô ba mơng Thạc sĩ Thái Duy (nai pơtô bruă prăk kak sang prăk) ngă tui. Pơmin kah hăng 3 mơta bruă hrăm ƀu hmâo bơdjơ̆ nao, samơ̆ 3 čô čơđai gưl dlông hmâo pơkĕ hrom kiăng pơjing rai sa rơwang bruă pok phun bruă mă gah đang hmua, đang kyâu, akan hơdang.

Gơnam ngă rai mơng grŭp lĕ măi anet dưm ƀơi đang sang pơkĕ hrom hăng mă yua măi mơng ataih ƀơi telephone, amăng anun pơƀut bruă wai lăng hơdôm mrô yôm phăn kah hăng ayuh hyiăng, rơnoh pơsah, mrô ia, mơnong ngă bơbuă amăng lŏn, mrô NPK, đô̆ pH... Mơng anun kiăng thâo tơlơi pơplih hăng gơgrong hlâo lăi pơtă pơsir hmao tlôn, hrŏ trun tơlơi truh kơ mơnuih ngă đang hmua, bŏng glăi hăng pơplih ayuh hyiăng, pơđĭ tui mrô gơnam ngă rai hăng pơkrem apui lơtrik, ia,...

Čơđai gưl dlông Hồ Thanh Huy brơi thâo, rơgao kơ pel ĕp, hơdôm bôh đang sang, mơnuih ngă đang hmua ră anai glăk dưi lăi pơthâo gơnam tam hmâo phun akha mơng Khač, ƀu hmâo tơhnal pơgang hăng klă kơ mơnuih ngă đang hmua. Yua anun yơh grŭp ƀing gơñu hmâo dăp hơdră pơkra gơnam mă yua amuñ, juăt mơ̆ hlơi hlơi leng kơ dưi yua. Ƀing gơyut ăt thâo mơn pô khom mă yua hơdôm bôh thâo dưi hrăm kiăng mă yua hơdră măi mok yôm kơ bruă đang hmua, djru neh wa pơđĭ tui nua gơnam ngă rai bĕ djơ̆ bơyan, rơngiă nua, pơgô̆ nua mơng ƀing blơi gơnam. Thanh Huy ruai glăi:

 “Ƀing gơmơi tơkeng rai lĕ ană bă mơnuih ngă đang hmua ƀơi kual dơnung yŭ dêh čar, ƀing gơmơi ƀu ngă đang hmua samơ̆ ƀing gơmơi thâo hluh, hăng thâo hơdră ngă đang hmua hiưm hơpă. Hrom hăng anun kâo dô̆ hmâo ƀing gơyut hrăm bruă ngă đang hmua, ƀing gơyut amra djru gơmơi kiăng ba tơbiă gơnam mă yua djru neh wa ngă đang hmua. Yua anun ƀing gơmơi kiăo tui jơlan pioh ĕp tơhnal ƀơi đam plơi pla pô”.

Hluai tui hơdôm tơlơi čih djă pioh bruă tơjŭ pla, ECO-HOUSE amra ba tơbiă jơlan gah “gơnam ngă rai hơdjă ƀu huĭ kơ tơlơi pơdah rơđah” hluai tui hơdră mă yua măi mok phrâo IoAT (Internet djop mơta ra mơnong) hăng lu mơta ruah mă. Rơđah biă ñu rơwang bruă pơkĕ hrom hăng tơhnal pơkă “Sa ia, dua kơmok, tlâo triang” djơ̆ tui hăng anun lĕ pơsir hơdôm bôh than kiăng kơ pruih ia pơkrem, lăng tui mơnong ngă bơbuă amăng lŏn ƀudah abih bang hmâo pruih ia pơkrem, mơnong ngă bơbuă kơ phun pla, jơlan pơhlôm abih bang kơ phun pla hmâo rim rơnoh nua lăp djơ̆ hăng prăk pô hmâo hăng tơlơi kiăng yua mơng đang sang.

Čơđai gưl dlông Lê Hoàng Minh Châu mơnuih amăng grŭp lăi pơthâo, phun ñu rơwang bruă anăp nao lĕ neh wa ngă đang hmua hăng hơdôm bôh anom mă bruă hrom, ƀơi anăp lông lăng hăng sa dua djuai phun kah hăng sầu riêng, bôh jơmăn, bôh kruăi dung ƀơi Tiền Giang, Bến Tre hăng đang bơnga hơtai rơman ƀơi Vũng Tàu. Lom ngă tui, ƀing gơyut ăt bưp lu tơlơi tơnap mơn kah hăng akă hmâo lu tơlơi găn rơgao kơ bruă sĭ mơdrô, akă hmâo lu tơlơi thâo dơlăm kơ rim djuai phun pla, yua anun mơ̆ ƀing gơyut ăt kiăng hơduah ĕp mơn glông bruă pla mă yua măi mok pioh ba tơbiă jơlan nao klă hloh:

 “Ră anai neh wa glăk bơngot kơ bruă mă yua, khă tơlơi pơmin mă yua hmâo laih samơ̆ bruă pơplih abih bang mơng tơlơi hơđăp hơdai nao anô̆ phrâo lĕ neh wa glăk huĭ mơn. Mơng anun ƀing gơmơi ba tơbiă jơlan gah lĕ hluai tui hơdôm anô̆ hơđăp pioh pơlar đĭ dong ƀu sut lui abih hơdôm anô̆ hơđăp ôh”.

Tui hăng Thạc sĩ Thái Duy Tùng, nai pơtô čơđai gưl dlông pơtô ba akô̆ bruă kơsem min, anô̆ pha ra mơng rơwang bruă anai bơhmu hăng lu bruă kơsem min pơkon anun lĕ bruă ƀing gơyut gưl dlông hmâo ngă juăt laih hăng bôh nik pioh lông lăng hơdră ƀơi rim gru lŏn, hơduah ĕp tơlơi kiăng, phiăn juăt ngă đang hmua mơng mơnuih ƀôn sang. Khă hơdôm mơnuih amăng grŭp ƀu hmâo tơlơi hrăm kơ bruă đang hmua samơ̆ hăng anô̆ gal pô tơbiă rai mơng bruă đang hmua ƀơi kual dơnung dêh čar, pơkĕ hrom hăng bruă hrăm bruă ngă đang hmua hăng tơlơi djru ba mơng ƀing čơđai gưl dlông glăk hrăm gah bruă đang hmua ƀơi Đại học Tiền Giang, ƀing gơyut hmâo laih bôh tơhnal kah hăng hrơi anai:

 “Tơlơi ră anai lĕ lom ĕp mơnuih blơi lĕ glăk bưp ƀơƀiă tơlơi tơnap yua akă hmâo anăn păn, khă hnun hai ƀing gơyut ăt hmâo mơn lu tơlơi juăt hăng hơdôm blah đang blok, čang rơmang pơgi kơdih anai ƀing gơyut amra ƀơƀrư̆ ngă juăt hăng anih anom sĭ mơdrô hloh”.

Hăng rơwang bruă anai, grŭp kiăng pơđĭ kyar hăng ĕp hmâo prăk pơhrui glăi mơng lu jơlan ƀu djơ̆ kơnong kơ mơng gơnam tam ôh mơ̆ ataih hloh dong dô̆ lăi pơthâo dăp hơdră hăng lăi pơthâo jơlan pơsir, mơng gơnam mă mơng đang hmua hăng hơdôm gơnam pơkra sinh học. Čang rơmang mơng grŭp lĕ pơđĭ tui nua gơnam Việt ngă rai, pơdah rơđah hơdôm mrô mơng glông hơdră pla kiăng mơnuih blơi thâo gơnam pla pơ̆ hơpă, mrô lŏn hiưm ñu, hmâo đôm glăi ia jrao mă yua amăng lŏn mơn. Čơđai gưl dlông Hồ Thanh Huy hur har pran jua lăi pơthâo:

 “Ƀing gơmơi lăi ngui lĕ hơdôm ană mơnuih hyu sĭ añăm, ƀing gơmơi sĭ gơnam mă mơng đang hmua hăng hmâo hơdră phrâo măi mok pioh djru bruă sĭ gơnam anai, čang rơmang amra truh kih hăng anih anom sĭ mơdrô amra čơkă mă”.

Nai prin tha Nguyễn Quốc Cường, Kơ-iăng Khua anom pơtô bruă sĭ mơdrô hăng tuai čuă ngui Sang hră Đại học Công nghiệp ƀôn prong Hồ Chí Minh pơsit, anai lĕ bruă kơsem min klă djru mơnuih ngă đang hmua ngă đang hmua klă hloh amăng kual mơng pô hăng pơgang anih anom dô̆, plai ƀiă bruă mă yua kơmok jrao, jrao pơgang hlăt:

 “Gah anom pơtô bruă, anom amra lăi pơthâo gah bruă pô hrăm ngă abih pran jua kiăng ƀing gơyut tô̆ tui rơwang bruă anai jing anom bơwih ƀong spin-off ba glăi nua sit nik kơ plơi pla, biă ñu lĕ khul mơnuih pơđĭ kyar bruă đang hmua tui jơlan gah phrâo yôm”.

Hơdôm rơwang bruă pok phun bruă mă mơng čơđai sang hră, čơđai gưl dlông kiăng “hơdip” hăng pơđĭ kyar hloh, ƀing gơyut ăt kiăng mơn tơlơi tŭ mă, dŏng yua hăng djru gum ƀu djơ̆ mơng kơnong kơ sang hră ôh mơ̆ ñu dô̆ mơng mơnuih mơnam dong. Mơng anun amra ngă brơi lu hloh dong hơdôm bruă kơsem min pok phun bruă mă djru kơ tơlơi pơđĭ kyar mơng lŏn ia./.