Hăng ayuh hyiăng lŏn drŏn hmâo hơđăp, Gia Lai hmâo pơjing hăng pơđĭ kyar lu blok đang ngă đang hmua hơbit, mă yua bôh thâo phrâo pioh kơ bruă măi mok pơkra gơnam tam hăng sĭ gơnam kơ dêh čar tač rơngiao. Lu gơnam mă mơ̆ng đang hmua phun hmâo nua yôm hmâo sĭ kơ 40 bôh dêh čar, kual lŏn. Ră anai tơring čar hmâo 3 kual sang măi, hăng pơkă 23 ƀut sang măi. Đang pla gơnam amăng tơring čar lu mơta, hơđong kah hăng: Kơphê, kơ su, tơbâo, hơbơi plum, čè, bôh troh... pơjing phun than pơđĭ kyar bruă măi mok pơkra gơnam. Đơ đam tơring čar hmâo rơbêh kơ 8.000 bôh anom mă bruă gah măi mok pơkra gơnam... Tơhnal gal prong samơ̆ tui hăng ơi Phạm Văn Binh, Khua Gơnong bruă sĭ mơdrô Gia Lai, hơdôm bruă logistics ƀơi tơring čar akă pơđĭ kyar yua kơ dô̆ lu anô̆ ngă gun.

 “Amăng bruă hơpă leng kơ hmâo tơlơi tơnap, pơkă kual lĕ akă giong, dua dong lĕ, khă hmâo tơhnal tô nao rai prong samơ̆ anom mă yua pioh kơ logistics ăt ƀu lu mơn. Mơnuih mă bruă lĕ ƀu lu hăng yap wot tơlơi pơmin tum djop kơ logistics hai ăt ƀu prong mơn”.

Amăng mông jơnum, khua pơ ala hơdôm bôh anom gah Ding jum sĭ mơdrô, khul gum hrŏm sĭ mơdrô gơnam hăng ƀing tuh pơplai, anom bơwih ƀong hmâo lăi pơthâo lu laih tơlơi gum pơhiăp pioh pơđĭ kyar bruă logistics ƀơi Gia Lai. Ƀing khua pơ ala lăi lĕ khom pơđĭ tui hloh dong tơlơi thâo kơ logistics, bruă mă mơ̆ng logistics pioh kơ pơđĭ kyar bơwih ƀong – mơnuih mơnam, pơsit jơlan gah bơwih ƀong sĭ mơdrô nao hrŏm hăng pơtrut pơđĭ kyar bruă logistics hăng gum hrŏm kơplah wah hơdôm bôh anom bơwih ƀong amăng, gah rơngiao tơring čar... Ơi Lê Quang Trung, Kơ-iăng Khua Khul bơwih ƀong gah logistics Việt Nam gum pơhiăp:

 “Hăng Gia Lai ƀudah Dap Kơdư lŏn kom pioh, ngăn rơnoh mă mơ̆ng lŏn drŏn lu biă, hơdôm bôh anom bơwih ƀong tâ̆o hloh mă yua anô̆ gal kual čư̆ siăng, hơdră bruă mơ̆ng kơnuk kơna amăng tơlơi djru gum, pơđĭ kyar hơdôm bôh anom bơwih ƀong mơ̆ng mơnuih djuai ania ƀiă. Tơlơi gum hrŏm kơplah wah hơdră bruă hăng pok pơhai bôh nik lĕ pran gơgrong jing yôm phăn biă pioh anăp nao hơdôm jơlan pơlir hơbit gum hrŏm. Khom hmâo tơlơi tô nao rai kơplah wah hơdôm bôh anom bơwih ƀong logistics amăng hơdôm jơlan pơlir hơbit, tô nao rai hăng hơdôm mơnuih ngă đang añăm hơdôm glông jơlan rô nao rai hăng anih dưm gơnam”.

Tui hăng ơi Trần Thanh Hải – Kơ-iăng Khua Anom sĭ blơi gơnam hăng dêh čar tač rơngiao, Ding jum sĭ mơdrô, kiăng ngă tui hơdôm tơhnal gal, anô̆ gal, Gia Lai khom hmâo hơdôm hơdră pơkă, hơdră bruă hmâo tơhnal pơplih phrâo, dưi ngă tui kiăng pơhưč lu ngăn rơnoh mơnuih mơnam, hơdôm khul grŭp, anom bơwih ƀong hmâo tơhnal đăo kơnang, bôh thâo, tơlơi găn rơgao tuh pơplai, pơđĭ kyar anom mă yua logistics.

 “Ngă pơhưč hơdôm bôh anom bơwih ƀong pok anom bruă, pơdŏng ƀirô mă bruă ƀơi Gia Lai amra djru pok jơlan kơ gơnam tam. Kiăng iâo pơthưr anom bơwih ƀong lĕ tơring čar khom hmâo bruă mă rơđah hmâo tơhnal jak iâo hăng djru ba. Bơhmutu ñu amra pơphun hơdôm grŭp lăi pơthâo tuh pơplai pơtrut hơdôm mơta gơnam mơ̆ng tơring čar ƀơi hơdôm bôh tơring glông, plơi prong pơprong mơ̆ng Việt Nam ăt kah hăng tô nao rai hăng hơdôm tơring čar gơyut kah hăng Lao, Kur ăt yôm phăn mơn pioh gum hrŏm mă yua hơdôm anô̆ gal”.

Kiăng ngă tô̆ tui ba glăi bôh tơhnal hơdôm tơhnal gal, anô̆ gal, pơtrut bruă logistics pơđĭ kyar tañ hăng kơjăp phik, djru klă, ba glăi bôh tơhnal hloh amăng pơđĭ kyar hrŏm mơ̆ng tơring čar, hăng bruă mă lĕ ƀirô wai lăng kơnuk kơna kơ bruă logistics, gah bơnah Ding jum sĭ mơdrô, ơi Trần Thanh Hải rơkâo, gong gai tơring čar Gia Lai lăi pơthâo abih dong dơlăm hơdôm tơlơi pơmin, pơsit jơlan gah ƀơi Tơlơi pơtrun pơsit 163 mơ̆ng Gong gai dêh čar kơ pơtrut kơtang pơđĭ kyar bruă logistics Việt Nam hăng hơdôm tơlơi pơtrun pơsit, hơdră bruă, bruă pơđĭ kyar mơ̆ng Ping gah, Kơnuk kơna, Gong gai hmâo bơdjơ̆ nao kual Dap Kơdư pioh ngă glông jơlan pơkă kual hăng pơphun ngă tui ba glăi bôh tơhnal hơdôm jơlan hơdră, kơčăo bruă, akô̆ bruă pơđĭ kyar bruă logistics pơhlôm djơ̆ hăng bôh nik hmâo hăng dưi mă yua hơdôm tơhnal gal, pran kơtang mơ̆ng tơring čar./.