Plơi prong Đà Lạt, tơring čar Lâm Đồng ră anai hơmâo 2.900 ektar sang pla pơjing păng mơnil amăng plơi prong. Lu hloh sang păng mơnil pơdong mă, ƀu pơhlôm djơ̆ hơnong pơkă amăng wai pơgang ayuh hyiăng rơhuông adai; ƀu hơmâo anih pơkŏng glăi ia djah, pơdong jê̆ giăm, pơplah amăng kual mơnuih dŏ hơdip…Anai lĕ sa amăng hơdôm tơlơi ba truh ngă ia hơjan ƀu dưi rô đuăi, ngă ia ling dăo amăng plơi prong.

Kiăng kơ pơsir hĭ, anăp nao ruh hĭ sang pla pơjing păng hăng mơnil amăng plơi prong Đà Lạt, hrŏm hăng bruă akŏ pơjing hơdôm hơbô̆ bruă ngă hmua ƀu păng bơbung ba glăi tŭ yua hloh kiăng pok prong, tơring čar rơkâo Sang bruă prăk Kơnuk kơna Việt Nam anom bruă pơdong ƀơi Lâm Đồng kơsem min, mă yua rơnoh prăk čan mă kmlai ƀiă hăng abih tih rơbêh 4.800 klai prăk, kiăng mơnuih ƀôn sang ngă hmua gah rơngiao. Ră anai, plơi prong Đà Lạt, glăk pok pơhai 30 hơbô̆ bruă lông lăng amăng pla bơnga, hơbơi pơtơi, boh troh gah rơngiao.