Ding jum Bruă hmua hăng Pơđĭ kyar plơi pla Việt Nam hăng Anom bruă duh jia sĭ mơdrô hăng tač rơngiao dêh čar Khač phrâo kĭ hră pơtrun mơ-it nao rai, rơkâo pơhlôm hơdjă mơnong ƀong huă hăng boh sầu riêng ngă pơrơ-ot mơ̆ng Việt Nam ba nao pơ dêh čar Khač.

Hăng hră pơtrun kĭ mơ-it nao rai anai, him lăng bruă pơhrui prăk sĭ mơdrô boh sầu riêng pơđam rơ-ot mơ̆ng Việt Nam thun 2025 amra hơmâo truh 300 klăk dolar Mi.

Ƀơi tơring čar Dak Lak anih hơmâo đang hăng boh sầu riêng dong tal 2 ƀơi dêh čar, tơring čar anai, hlăk gir run prăp lui, amra ngă djop bruă kiăng ba sĭ mơdrô sit truh hrơi Hră pơtrun pơkĭ nao rai dưi ngă tui. Dak Lak hơmâo giăm 33.000 hektar đang boh sầu riêng, boh pơhrui glăi hơmâo rơbêh 280.000 tơn. Đơ đam tơring čar hơmâo 23 boh sang bruă pơkra ming gơnam sĭ mơdrô mơ̆ng boh sầu riêng hăng 68 kual đang hmua pla sầu riêng hơmâo pơkă mrô kiăng thâo anăn sĭ mơdrô ba nao pơ dêh čar Khač. Bruă Ding jum Bruă hmua hăng Pơđĭ kyar plơi pla Việt Nam hăng Anom bruă duh jia sĭ mơdrô hăng tač rơngiao mơ̆ng dêh čar Khač kĭ hră pơtrun mơ-it nao rai kơ bruă sĭ mơdrô boh sầu riêng pơđam rơ-ot, pok brơi jơlan hơdră anŏ gêh găl lu kơ bruă sĭ mơdrô boh sầu riêng Việt Nam lăi hrŏm, Dak Lak hnun mơ̆n kơñ pơgi ni anăp.