Jơnum ngui amra pơphun dong mơng 31/8 truh lơ 2/9, hơmâo 12 bruă mă phun. Hăng tơlơi prap lui klă hloh, ječ ameč mơng hơdôm anom bruă bơdjơ̆ nao, truh ră anai, hơdôm bruă mă, ngui ngor dưi pơphun djơ̆ hrơi mông. Sa amăng hơdôm bruă mă phun lĕ Mông pok pơphun (mơmŏt lơ 31/8) ăt glăk ječ ameč pơgiong hơdôm bruă rơnuč. Tơdơi kơ mông pơphun lĕ jơlan hơdră adôh suang hơmâo tơlơi mut hrŏm mơng rơbêh 400 čô mơnuih. Hluai tui hơdôm tơlơi ngui adôh suang tui gru grua hơđăp hăng pơplih phrâo amra pơdah rup rap kual lŏn Krông Pač hơmâo lu tơlơi dưi.

Amăng jơnum ngui sầu riêng Krông Pač tal anai, lu tơlơi ngui ngor brơi mơnuih ƀôn sang hăng tuai čuă ngui hơmâo pok prong anun lĕ: Ngui rôk jơlan, đuăi yua tơlơi suaih pral mơnuih mơnam, hrơi ngui gru grua tơnă hơbai djop djuai ania…Amăng anun, hơmâo ngui adôh suang ƀơi jơlan ia hơmâo lu mơnuih đing nao, hăng 60 mơnit rĭm mơmŏt; anai lĕ tơlơi ngui adôh suang hrŏm hăng apui kơđen pơdah rup rap kiăo tui jua gông brô̆.