Glăk rông 2 drơi rơmô anai phrâo hơmâo kơnuk kơna djru brơi sui mơng anai rơbêh 1 blan tui akŏ bruă djru bơwih ƀong huă, pơđĭ kyar hơbô̆ bruă pơhrŏ trun ƀun rin gah jơlan hơdră tui hơnong pơkă dêh čar pơhrŏ trun ƀun rin hơđong kjăp, rơwang thun 2021-2025, ơi Trần Ngọc Thương dŏ amăng să Thuận Hòa, tơring glông Châu Thành ƀu hơgŏm tơlơi hok mơ-ak, yua mơng tơlơi gum djru anai, sang anŏ ñu amra hơmâo dong tơlơi gal kiăng hơđong tơlơi hơdip mơda. Ră anai ơi Phương hơmâo pla pơhrua rơk pioh čem rơmô, laih dong ĕp apah 3 čô mơnuih mă bruă ƀơi đang boh tăo hăng čang rơmang sang anŏ amra pơhrua hơđong, tañ hrưn đĭ pơklaih mơng ƀun rin. Ơi Trần Ngọc Phương brơi thâo:

“Hơmâo kơnuk kơna djru brơi kâo amra gir run, ngă hiưm pă dưi pơhrui glăi lu hloh. Kâo ăt pla pơhrua rơk, ngă drông war, kơ bruă rông rơmô ăt glăk hrăm tui arăng mơn”.

Jơlan hơdră tui hơnong pơkă dêh čar pơhrŏ trun ƀun rin hơđong kjăp, jơlan hơdră tui hơnong pơkă dêh čar man pơdong plơi pla phrâo, jơlan hơdră tui hơnong pơkă dêh čar pơđĭ kyar bơwih ƀong huă-mơnuih mơnam kual mơnuih djuai ania ƀiă, hrŏm hăng lu jơlan hơdră, akŏ bruă, hơdră djru mơnuih djuai ania ƀiă pơkŏn hơmâo djop gưl, gơnong bruă amăng tơring čar Sóc Trăng git gai ngă tui ba glăi tŭ yua yôm phăn. Mơng anun, pơgôp djru brơi sang anŏ ƀun rin, giăm ƀun rin lăi hrŏm hăng sang anŏ ƀun rin, giăm ƀun rin kual djuai ania ƀiă hnun mơn jai hrơi pơplih, pơđĭ kyar tơlơi bơwih ƀong huă, hrưn đĭ pơklaih mơng ƀun rin.

Glăi pơ tơring glông Trần Đề ră anai, ƀing ta amra ƀuh anŏ pơplih prong ƀơi kual mơnuih djuai ania ƀiă. Anun lĕ tơdrông tuai, jơlan nao rai amăng plơi pla lêng man pơkra hiam hruaih. Kơnong rơwang thun 2019-2024, tơring glông hơmâo man pơkra phrâo 519 ring bruă, ngă pơgiong hăng mă yua 451 ring bruă. Lu ring bruă djru brơi mơnuih mơnam hơmâo pơgiong hăng mă yua ba glăi tŭ yua sit nik, pơgôp pơđĭ kyar bơwih ƀong huă-mơnuih mơnam, pơplih ƀô̆ mơta plơi pla. Ơi Thạch Soi, mơnuih ƀôn sang dŏ amăng plơi Hội Trung, tơring kual Hội Thượng, hok mơ-ak brơi thâo:

“Kơnuk kơna lêng kơ đing nao kiăng tơlơi hơdip kơ mơnuih ƀôn sang jơnap hloh, sit biă ñu mơnuih djuai ania ƀiă. Sit biă ñu, hlâo adih jơlan rơhaih kơnong 2 met, ră anai pok prong jing 3 met yơh, mơnuih ƀôn sang dong yua biă mă, ƀing gơñu pơyơr lŏn kiăng gong gai čuk pơkra jơlan, mơng anun ngă kơ bruă găn nao rai gêh gal, ană bă nao sang hră amuñ ƀiă”.

Mơng rơnoh prăk kah trun rơbêh 103 klai prăk mơng Jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng jơlan hơdră tui hơnong pơkă dêh čar amăng pơhrŏ trun ƀun rin, rơwang thun 2021-2025; tơring glông Trần Đề hơmâo kơnuk kơna djru brơi 344 boh sang anŏ, djru brơi lŏn dŏ kơ 37 boh sang anŏ, pơplih bruă bơwih ƀong brơi rơbêh 360 boh sang anŏ, djru brơi ia yua brơi kơ rơbêh 190 boh sang anŏ; tuh pơ alin man pơkra 28 ring bruă hơmâo tơdrông, jơlan glông amăng plơi pla, să tơnap tap hloh. Laih dong, man pơdong hăng pơkra ming sang sĭ mơdrô ƀơi kual mơnuih djuai ania ƀiă, djru pơđĭ kyar bơwih ƀong huă, hơmâo lu hơdră bơwih ƀong amăng mơnuih mơnam, pơtô brơi bruă mă…Ơi Trịnh Văn Bé, Kơ-iăng Khua Jơnum min mơnuih ƀôn sang tơring glông Trần Đề brơi thâo, tơring glông lêng kơ pơsit tong bruă djuai ania ƀiă hăng hơdră djru mơnuih djuai ania ƀiă lĕ bruă jao yôm phăn, yua anun, pơ anăp anai, tơring glông amra đing nao ngă tui lu hơdră bruă kiăng pok pơhai ngă tui ba glăi tŭ yua hloh.

“Đing nao tuh pơ alin brơi hơdôm boh să, plơi pla tơnap tap hloh anun lĕ: pơsir hĭ bruă bơdjơ̆ nao lŏn sang, sang dŏ, lŏn hmua, ia yua; djru pơđĭ kyar bơwih ƀong huă brơi mơnuih mơnam; tuh pơ alin man pơkra anih anjom, jơlan glông, djru brơi tơlơi bơwih ƀong huă, tơlơi hơdip amăng kual mơnuih djuai ania ƀiă. Hơkrŭ kjăp anih anom kơđi čar amăng ƀon lan, đing nao pơtô hrăm, hrưn đĭ klă amăng bruă mă brơi ƀing apăn bruă, sit biă ñu ƀing apăn bruă djuai ania ƀiă. Đing nao pơđĭ kyar mơnuih apăn bruă, lu dong mơnuih thâo thăi pơlir hăng bruă pơtô hrăm, pơtô bruă brơi mơnuih djuai ania ƀiă”.

Tui Khua git gai Ping gah tơring čar Sóc Trăng Lâm Văn Mẫn, Sóc Trăng hơmâo găn rơgao rơwang mơng thun 2019-2024 lu tơnap tap. Lơm anun, tui tơlơi git gai mơng Khua mua djop gưl Ping gah, gong gai hăng mơnuih ƀôn sang tơring čar, sit biă ñu mơnuih djuai ania ƀiă hơmâo tŏ tui gru grua gum pơgôp, pran khăp kơ lŏn ia, gir run pơplông găn rơgao tơnap tap, tơlơi lông, ba glăi lu tơlơi dưi prong prin. Amăng rơwang thun 2019-2024, tơlơi bơwih ƀong huă amăng tơring čar tŏ tui pơđĭ kyar. Kơnong 6 blan akŏ thun 2024, dưm dưm rơbêh 6,5%, lu hloh pơhmu rơnoh pơhrui mơng hơdôm boh tơring čar amăng đơ đam dêh čar (6,42%), dong tal 6 amăng kual lŏn dăo ia krông Cửu Long. GRDP mơng rĭm akŏ mơnuih truh rơnuč thun 2023 rơbêh 60 klăk prăk/mơnuih/thun.

Ơi Lâm Văn Mẫn ăt pơsit tong, mơng rơnoh prăk mơng 3 jơlan hơdră tui hơnong pơkă dêh čar hơmâo yua pơmut hrŏm, pok pơhai ngă tui tŭ yua kiăng tuh pơ alin, hrưn đĭ, man pơkra phrâo anih anom anih anom, jơlan glông bơwih ƀong huă-mơnuih mơnam kual mơnuih djuai ania ƀiă, yua anun, truh ră anai, djop să lêng kơ hơmâo jơlan đuăi rơdêh ôtô mut nao tong krah să; rơbêh 99% mrô sang anŏ kual mơnuih djuai ania ƀiă mă yua glông hrĕ apui lơtrik dêh čar; mrô sang anŏ mă yua ia hơdjă rơbêh 99,6%. Sit biă ñu, bruă pơhrŏ trun ƀun rin ƀơi kual mơnuih djuai ania ƀiă hluai tui anŏ pơplih klă; đơ đam tơring čar hơmâo djru brơi bruă pơplih bơwih ƀong kơ 4.600 boh sang anŏ hăng 67 hơbô̆ bruă pơđĭ kyar bơwih ƀong huă, pơgôp  hơmâo lu dong hơdră bơwih ƀong huă hăng pơhrŏ trun ƀun rin hơđong kjăp. Yap truh rơnuč thun 2023, amăng tơring čar dŏ rơbêh 4.000 boh sang anŏ lĕ mơnuih djuai ania ƀiă, pơhrŏ trun 6.500 boh sang anŏ pơhmu hăng 2021.

“Mrô sang anŏ ƀun rin dưm dưm pơhrŏ trun 2% ha thun; amăng anun, mrô sang anŏ Khmer ƀun rin 3% ha thun. Hơdră djru mơnuih mơnam hơmâo ngă tui hơmâo hmao, djơ̆ hăng mơnuih. Amăng rơwang thun 2019-2024, tơring čar djru man pơdong 14.826 boh sang anŏ brơi mơnuih ƀun rin; amăng anun, hơmâo 6.184 boh sang brơi kơ sang anŏ ƀun rin djuai ania ƀiă”.

Hơdôm tơlơi dưi hơmâo tơlơi gir run tui bruă kơđi čar hăng tơlơi git gai khut khăt mơng djop gưl Ping gah, gong gai djop gưl amăng tơring čar Sóc Trăng, hrŏm hăng anun lĕ tơlơi gir run, găn rơgao hrưn đĭ mơng mơnuih djuai ania ƀiă amăng tơring čar, mơng anun, hrơi hơmâo yak nao pơplih amăng djuai ania ƀiă./.