Sang anŏ ơi Phan Văn Xuân dŏ amăng ƀut plơi 2, să Phú Lễ, tơring glông Ba Tri kah hăng hơdôm boh sang anŏ amăng plơi pla ƀu mơhao ngă tui hơbô̆ bruă rông rơmô sĭ čuh hơtă. Yua 2 thun rơgao, nua rơmô sĭ čuh hơtă, ană ƀe sĭ pioh rông lêng kơ trun kơtang, mơnuih rông pơhrui glăi aset hloh. Ơi Xuân brơi thâo:

“Rông rơmô ha thun ha mơkra tuh sa drơi rơmô ania sĭ kơnong 15 klăk prăk, kmlai dŏ 5 klăk mơ̆ aka ƀu yap wŏt thun blan čem rông, pơgang kman dong. Mơ̆ rông rơmô kơnô sa drơi kmlai pơhrui glăi kơnong 3 klăk mơ̆ rông mơng 13-15 blan. Rơk sang anŏ pla mă, đa yua lŏn apah pla rơk. Lơm anun, kâo rông 4 drơi rơmô ania, rĭm thun tuh 8 drơi, ră anai dŏ kơnong 1 drơi, rông ƀu anăm dong tah, yua sĭ ƀu hơmâo nua”.

Bơ tui ơi Nguyễn Văn Tân, mơnuih ƀôn sang să Phú Lễ brơi thâo, ñu lui rông yơh yua sĭ ƀu hơmâo nua:

“Rơmô sĭ trun đơi, neh met wa ƀơi anai huač lu biă mă, nua rơmô sĭ đĭ trun. Ră anai neh met wa ruh hĭ drông war yua rông rơmô sĭ čuh hơtă ngă neh met wa huač rơbêh 5 klăk prăk. Hlâo anun sĭ 40 klăk prăk sa drơi bơ ră anai 30 klăk prăk. Mah čem rông djop mơn, ƀơi anai 10 boh sang anŏ dŏ kơnong 3-4 boh sang đôč dŏ rông”.

Rông rơmô sĭ čuh hơtă, rơmô tuh hrôh lĕ bruă bơwih ƀong phun mơng mơnuih ƀôn sang să Phú Lễ hăng abih tih rơmô rông rơbêh 5.800 drơi, lu hloh ƀơi tơring glông Ba Tri. Samơ̆ giăm anai, lu sang anŏ ruh hĭ drông war, hơdai nao bơwih ƀong pơkŏn dong, ƀu gưt rông rơmô dong tah. Ơi Hạ Văn Chức, kơ-iăng khua Jơnum min mơnuih ƀôn sang să Phú Lễ brơi thâo:

“Dua thun giăm anai rơmô ƀơi să Phú Lễ hrŏ trun, yua nua blơi gơnam ƀong đĭ kơtang mơ̆ nua rơmô trun yua anun mơnuih ƀôn sang ƀu rông lu dong kar hăng hlâo anun dong tah mơ̆ ruah hlô rông hiam pơkŏn dong. Ră anai, ƀon lan ăt hơmâo pơtô pơblang brơi mơnuih ƀôn sng anăm sĭ ha wŏt mơtăm mơ̆ lui hĭ ƀơƀrư̆ đôč kiăng pơhlôm yua gơnam ƀong čem rông amăng đang hmua, hăng tơlơi bơwih ƀong tŏ tui ƀơƀrư̆ kiăng hơđong rông rơmô”.

Tui jŭ yap mơng Jơnum min mơnuih ƀôn sang tơring glông Ba Tri, mrô rơmô amăng ƀon lan ră anai giăm 97.000 drơi lu hloh ƀơi hơdôm boh să An Đức, Phú Lễ, An Bình Tây, An Hiệp, Tân Xuân…dưm dưm giăm 2/3 mrô rơmô đơ đam tơring čar. Amăng hrơi blan anai, rơmô rông čuh hơtă giăm 17 klăk sa tă; ană ƀe mơng 14-16.500 rơbâo sa drơi. Mơng thun 2016, anom bruă wai lăng boh thâo ia rơgơi jao hră pơsit anăn apăn gơnam sĭ mơdrô “Rơmô Ba Tri”. Rơngiao kơ bruă bơkơtưn nua sĭ mơdrô rơmô mơng gah rơngiao, rơmô amăng ƀon lan giăm anai ăt juăt ƀu ƀă kman bơbrah tut ƀơi klĭ, mơnuih rông rơngiă lu prăk pơjrao, pơhrui ƀu hơmâo. Gong gai, anom bruă bơdjơ̆ nao hơmâo đing nao gum djru mơnuih ngă hmua pơđĭ kyar rông rơmô tui jơlan gah hiam hơdjă samơ̆ bruă sĭ mơdrô ăt aka ƀu dưi pơhlôm brơi. Ơi Dương Minh Tùng, Khua Jơnum min mơnuih ƀôn sang tơring glông Ba Tri brơi thâo:

“Nua rơmô lĕ yua mơng anih anom sĭ mơdrô mơ̆ ƀing gơmơi ăt ƀu dưi thâo lơi yua anun ƀu dưi ngă hiưm pă lơi. Tơring glông ăt lui ruh yơh, pơjing anăn apăn sĭ mơdrô Rơmô Ba Tri ăt hơmâo laih, ƀing gơmơi ăt lăi pơthâo mơnong mơng rơmô Ba Tri. Rĭm wŏt jơnum amăng tơring čar hơmâo tơlơi rơkâo…Ƀing gơmơi ăt iâu pơthưr tuh pơ alin man pơdong anih phun sĭ gơnam đang, hơmâo lŏn samơ̆ 2-3 anom tuh pơ alin nao pel ĕp, ăt glăi hĭ đôč mơ̆ aka ƀu hơmâo hră pơ-ar tuh pơ alin, anai ngă tơnap tap”.

Ba Tri lĕ ƀon lan ter ha ia rơsĭ, bơdjơ̆ nao kơtang lơm ayuh hyiăng pơplih, tơlơi hơdip kơ mơnuih ƀôn sang dŏ lu tơnap tap. Bruă hơkrŭ bơwih ƀong huă, biă mă ñu tŏ tui hăng pơđĭ kyar rông rơmô čuh hơtă mơng mơnuih ƀôn sang ƀơi anai kiăng hơđong tơlơi bơwih ƀong huă lĕ bruă kiăng hloh mơ̆ gong gai hăng gơnong bruă bơdjơ̆ nao amăng ƀon lan kiăng hơmâo hơdjă bruă tong ten, tŭ yua ƀiă dong./.