Tơring čar Dak Lak ră anai hơmâo giăm 33.000 ektar sầu riêng, amăng anun, tơring glông Krông Pač arăng lăng lĕ kual pla sầu riêng prong hloh amăng tơring čar. Jing tơring čar pơđĭ kyar sầu riêng tañ hloh đơ đam dêh čar, samơ̆, gơnong bruă sầu riêng tơring čar Dak Lak glăk dong ƀơi anăp kơ lu tơlơi lông, anun lĕ kual pla pơjing raih daih, lu hloh lĕ pla pơplah hăng kơphê; kual pla pơjing dŏ anet; kual arăng pơkra brơi mrô dŏ aset, boh pla aka ƀu pơhlôm bơkơnar; pơlir hơbit aka ƀu kjăp, pơlir hơbit gơnam măi mok pơkra pơjing ha ƀu ha amăng plĕ….

Ƀing khua mua brơi thâo, kiăng pơsir hĭ hơdôm tơlơi tơnap tap anai kiăng hơmâo tơlơi mut hrŏm mơng djop bơnah, mơng mơnuih ngă hmua, kơnuk kơna, ƀing rơgơi kơhnâo hăng anom bơwih ƀong sĭ mơdrô. Tui Nai tha prin, nai prin tha Trần Văn Hâu, boh sầu riêng kiăng lăng kar gơnam yôm hloh, yua anun kiăng đing nao boh thâo amăng pla pơjing brơi rĭm boh kual.

“Ƀing ta kiăng pơjing bruă mă yua boh thâo amăng pla pơjing bruă rĭm kual, hrŏm hăng hơdôm tơlơi thâo thăi, tơlơi găn rơgao mơng mơng ƀôn sang kah hăng pla boh sầu riêng hiam hơdjă. Boh sầu riêng lĕ tơlơi yôm hloh. Yua anun, djop bơnah mut hrŏm amăng pơlir hơbit mơng mơnuih ngă hmua truh pơ kơnuk kơna, anom bơwih ƀong sĭ mơdrô, djop bơnah kiăng đing nao pơjing anăn apăn sĭ mơdrô sầu riêng amăng ƀon lan gơñu hăng sầu riêng mơng Việt Nam, ngă tui anun kah dưi pơđĭ kyar hơđong kjăp”.

Bơ tui mơnuih rơgơi kơhnâo gah ngă hmua Nguyễn Thị Thành Thực, Việt Nam aka ƀu hơmâo tơlơi pơtrun tong ten črâo ba kơ bruă pơjing mrô kual pla, tơlơi anai glăk ngă tơnap tap, sư̆ rơbư̆ hăng dŏ gơnang nao arăng, đa ƀu dưi amăng tơlơi pơkôl pơkă ngă hrŏm hăng hơdôm anom bruă lơm ba sĭ pơ tač rơngiao.

“Ƀing gơmơi čang rơmang hăng rơkâo gah Ding jum ngă hmua hăng pơđĭ kyar ƀon lan, djop gơnong bruă hơmâo tơlơi črâo ba kơ mrô kual pla pơjing Việt Nam. Lơm ƀing ta pơsit tong hăng hơmâo tơlơi pơdah kơ boh thâo mơng mrô kual pla, ngă tui anun ta kah mơng dưi lăi pơthâo tar ƀar rŏng lŏn tơnah hăng tơkâo jar kmar tŭ yua. Ƀing ta kiăng ngă pô, anăm ngă tui hơdôm boh dêh čar pơkŏn”.

Mơng tơlơi sit nik amăng pla pơjing sầu riêng ƀơi ƀon lan, ơi Trần Văn Thắng, pô pơ ala anom bơwih ƀong hrŏm gah ngă hmua mơtah, tơring glông Krông Pač, tơring čar Dak Lak, čang rơmang kơnuk kơna hơmâo hơdră pơđĭ kyar gơnong bruă sầu riêng sui pơ anăp hrŏm hăng hơdôm hơdră pơsir hĭ tơnap tap hmao tlôn:

“Yua dŏ tơnap tap amăng mă yua prăk kak, boh thâo phrâo, mơnuih mă bruă…Yua anun ƀing gơmơi čang rơmang hơdôm anom bruă bơdjơ̆ nao djru brơi. Tơdah dưi djru brơi prăk kak lĕ klă hloh ƀudah djru brơi boh thâo pla pơjing, črâo brơi kiăng ngă hiưm pă dưi pơhlôm brơi klă hloh, pơhlôm prăk tuh pơ alin aset hloh hăng gơnam pơhrui lêng hiam hơdjă, hơđong sui pơ anăp, djơ̆ hăng tơlơi rơkâo mơng anih anom blơi pơhrui pơ tač rơngiao”.

Jơnum ngui sầu riêng Krông Pač, tơring čar Dak Lak tal 2 thun 2024 hơmâo pơphun hiam klă, kơđŏm glăi lu tơlơi mơ-ak amăng pran jua mơnuih ƀôn sang hăng tuai čuă ngui. Jơnum ngui pơhưč rơbêh 350 anih pơdă prưng gơnam mơng anom bơwih ƀong sĭ mơdrô, anom bơwih ƀong hrŏm, hơdôm anih pơkra gơnam-sĭ mơdrô boh sầu riêng, gơnam OCOP hăng gơnam đang hmua hiam hơdjă, gơnam yua amăng ngă hmua…amăng tơring čar hăng hơdôm boh tơring čar pơkŏn, pơgôp lăi pơthâo lu gơnam tam, boh troh hiam hơdjă mơng ƀon lan.

Amăng mông jơnum ngui, tal blung a hơdôm boh sầu riêng hiam hloh mơng tơring glông Krông Pač ba nao bơkơtưn blơi, khul pơphun dưi sĭ 3 boh sầu riêng hăng anăn “Nữ hoàng sầu riêng”, hăng mrô prăk rơbêh 2,8 klai prăk. Abih tih mrô prăk pơhrui glăi amăng tal sĭ sầu riêng amra mă yua djru brơi tơlơi hơdip mơnuih mơnam, bruă pơtop hrăm, djru brơi mơnuih pla sầu riêng kơ boh thâo pla pơjing, bơwih brơi phun pla klă hloh, djơ̆ hăng tơlơi rơkâo sĭ mơdrô pơ tač rơngiao.

Jơnum ngui sầu riêng Krông Pač, tơring čar Dak Lak tal 2 hơmâo ba tơbiă hơdôm hơnong pơkă. Tuai čuă ngui mơng tač rơngiao, khua anih jưh, hơdôm anom bơwih ƀong sĭ mơdrô amăng lŏn ia hăng tač rơngiao đing nao gơnong bruă sầu riêng hăng sit biă ñu lĕ mơnuih ƀôn sang amăng tơring čar hăng hơdôm boh tơring čar ngă hiưm pă kiăng pơjing gơnong bruă sầu riêng hơđong kjăp. /.