Glăk dŏ pơkra glăi tơlơi čih pôr amăng plang web chonongsandaklak.vn, ayong Y Pốt Niê, Khua kông ti TNHH Êđê kơphê brơi thâo, plang sĭ mơdrô điện tử anai hơmâo pơhrup hiam, mă yua amuñ kơ mơnuih sĭ hăng mơnuih blơi yua hơmâo anăn gơnam rơđah rơđông.

“Blung a ba glăi tơlơi gêh gal kơ mơnuih blơi, tal dua lĕ anom bơwih ƀong kar hăng ƀing gơmơi amra pơmut gơnam amăng plang amuñ hloh, hơdră ta mă yua pơmut gơnam amăng plang amuñ, wơ̆t hăng mơnuih ƀu thâo boh thâo măi mok hai gơñu ăt thâo mă yua smartphone ƀudah laptop dưi ngă, yua hnun pô kâo hok mơ-ak laih anun čang rơmang plang web chonongsandaklak.vn jai hrơi đĭ kyar hloh laih anun hơmâo lu mơnuih thâo, hmư̆ hing, ƀu kơnong ƀơi Dak lăk mơ̆ wơ̆t hăng đơ đam dêh čar Việt Nam, wơ̆t hăng rŏng lŏn tơnah thâo kơ sang čơ gơnam mơ̆ng hmua anai”.

Tui hăng amai Lê Thị Nga, wai lăng mơ̆ng Kông ti Kơphê Vương Thành Công, rơngiao kơ tơlơi gêh gal kiăng mơnuih blơi hăng mơnuih sĭ bơrơƀih, hơduah tơña, huăi hơmâo pô pơgăp brơi ngă gong jơlan, Sang čơ gơnam mơ̆ng hmua Dak Lăk online jing anih kiăng hơdôm anom bơwih ƀong mut ĕp anăn gơnam, anih pơkra gơnam tañ hăng sit.

“Ƀing gơmơi kơnang biă kơ sang čơ anai laih anun gơmơi čang rơmang sang čơ anai pok rai tơlơi pơplih phrâo kơ bruă ngă hmua Việt Nam lăi hrŏm hăng Dak Lăk lăi hơjăn”.

Tui hăng yă Lại Thị Loan, Khua khul mơnuih ngă hmua tơring čar Dak Lăk, bruă mut hrŏm Sang čơ gơnam mơ̆ng hmua Dak Lăk online amra pơtrut hơdôm anom bơwih ƀong hrŏm, ƀut ngă ƀong, khul grup pơkra gơnam, mơnuih ngă hmua thâo pơmin pơkra gơnam yôm kiăng pơđĭ tui nua, pơkra gơnam rơnuk rơnua, tui hơnong pơkă hăng rơkâo tŭ yap anăn hmư̆ hing. Laih dong djru mơnuih ngă hmua thâo tơlơi kiăng ƀơi anih sĭ mơdrô, mơ̆ng anun pơkra gơnam hăng thâo pơplih gơnam lăp djơ̆ hăng anih blơi kiăng; djru pơƀuh tơlơi gêh gal, tơlơi hơmâo mơ̆ng bruă hmua tơring čar, mơ̆ng anun iâu pơthưr tuh pơ alin, pơkra gơnam kiăo tui nua pơkă gơnam mơ̆ng hmua...

“Ƀing gơmơi hơmâo akŏ pơdong Anom bruă wai lăng sang čơ krăp lăng na nao kiăng gơnam djơ̆ tui hăng tơlơi čih blung a, ăt kah hăng djru kơ mơnuih sĭ mơdrô pơhlôm djơ̆ hră pơ-ar laih anun pơhlôm klă kơ pô blơi hăng pô sĭ. Tuč rơnuč ñu lĕ pơđĭ tui prăk pơhrui, pơđĭ tui tơlơi hơdip mơ̆ng mơnuih ngă hmua djru pơđĭ kyar tơlơi hơdip kơjăp ăt kah hăng mă yua boh thâo mrô amăng bruă ngă hmua, amăng bruă sĭ gơnam đah mơ̆ng rim čô mơnuih ngă hmua ƀrô jing mơnuih ngă hmua ăt ƀrô jing sa čô mơnuih bơwih ƀong rơgơi ƀơi đơ đam đang hmua mơ̆ng ñu”.

Ơi Nguyễn Thiên Văn, Kơ-iăng khua jơnum min mơnuih ƀôn sang tơring čar Dak Lăk brơi thâo, ƀơi tơring čar hơmâo 152 mơta gơnam mơ̆ng hmua hơmâo dăp mrô mơ̆ng 3 asar pơtŭ truh kơ lu hloh, yua hnun bruă pơƀuh gơnam pơtruh nao rai mơnuih pơkra hăng mơnuih blơi hluai tui glông điện tử ba sĭ gơnam jing kiăng biă mă. Ơi Nguyễn Thiên Văn pơsit, amăng hrơi blan pơ anăp, hơdôm bruă sĭ mơdrô điện tử amra hơmâo ngă klă hloh, dưi pơhno nao rai hloh. Khul mơnuih ngă hmua kiăng djru hơdôm anom ngă ƀong hrŏm, sang anŏ sĭ mơdrô, neh met wa prăp lui klă, dưm kơnar mơ̆ng bruă pla rông truh kơ pĕ pơhrui, răk lui gơnam...pơhlôm klă abih bang, ngă hră pơ-ar čih pơthâo anih pơkra gơnam.

“Rơkâo Khul ngă hmua tơring čar pôr pơthâo brơi djŏp mơnuih kơ tơlơi pơhing điện tử ăt kah hăng lăi pơthâo djŏp tơlơi pơkôl pơkă bơdjơ̆ nao bruă ba gơnam pơ glông sĭ mơdrô mơ̆ng pô. Tal dua amăng bruă pơphun ngă, jing bruă pơkra gơnam klă, bruă pơkă nua, bruă pơđĭ tui nua yôm mơ̆ng gơnam tam ăt kiăng Khul mơnuih ngă hmua git gai kơjăp hloh dong kiăng hơdôm ding kơna ƀu pơdơi pơđĭ tui anŏ klă kơ hruh gơnam, anih pơkra gơnam ăt kah hăng anăn gơnam”.

Pô hyu mă tơlơi pơhing mơ̆ng črăn hơdră anai hơmâo mông ră ruai hăng yă Lại Thị Loan, Khua khul mơnuih ngă hmua tơring čar Dak Lăk - anom bruă wai lăng mơ̆ng Chonongsandaklak.vn kơ rơnoh pơkă dưi mut amăng sang čơ gơnam mơ̆ng hmua online ăt kah hăng tơlơi grong bruă mơ̆ng Khul amăng bruă mă yua, wai lăng plang sĭ mơdrô điện tử anai.

Rơkâo kơ ih brơi thâo lơ̆m mut amăng plang chonongsandaklak.vn mơnuih sĭ kiăng pơhlôm rơnoh pơkă hơget lĕ?

-Yă Lại Thị Loan: Lơ̆m mut amăng plang sĭ mơdrô điện tử sang čơ sĭ gơnam mơ̆ng hmua Dak Lăk.vn lĕ hăng mơnuih ngă hmua amăng anom ngă ƀong hrŏm, anom bơwih ƀong khul grup ngă bruă iâu klah čun jing mơnuih sĭ mơdrô khŏm pơhlôm tal sa lĕ gơnam klă, hơdôm mơta gơnam hơmâo ba sĭ pơhlôm djŏp hơnong pơkă hrŏm laih dong amra kiăo tui tơlơi phiăn ăt kah hăng tơlơi pơkă mơ̆ng Sang čơ kơ hơdră blơi sĭ; tal klâo lĕ lơ̆m mut sĭ, mơnuih sĭ amra hơmâo pơtô brơi ngă hiư̆m đah mơ̆ng pơđĭ kyar gơnam mơ̆ng ƀing gơñu klă hloh đah mơ̆ng djơ̆ hăng anih sĭ mơdrô kiăng. Bơ hăng mơnuih blơi lĕ lơ̆m blơi gơnam amăng plang web ăt khŏm pơhlôm rơđah rơđông, kơjăp ăt kah hăng pơhlôm hơdôm bruă bơdjơ̆ nao pơtruh hăng mơnuih sĭ amra hơmâo ngă tui.

- Tui anun mut amăng Sang čơ sĭ gơnam mơ̆ng hmua online anai gơñu amra hơmâo tơlơi gêh gal hiư̆m pă?

-Yă Lại Thị Loan: “Blung a lĕ hăng pô sĭ, ƀu kơnong dưi sĭ gơnam đôč ôh mơ̆, yôm hloh lĕ ta pơƀuh pôr pơhing kơ gơnam tam, tơlơi ră ruai bơdjơ̆ nao gơnam ta sĭ kiăng abih bang mơnuih thâo; hloh dong lơ̆m mut sĭ tui plang web, rơngiao kơ bruă pơƀuh gơnam, pô sĭ dưi hơduah ĕp sem lăng anih sĭ mơdrô amăng tơring čar ăt kah hăng tơlơi kiăng blơi kiăo tui bơyan kiăng thâo arăng kiăng blơi hiư̆m pă, bơyan hiư̆m pă, mơ̆ng anun ta thâo rơđah ră anai anih sĭ mơdrô kiăng tơlơi hơget đah mơ̆ng pơplih bruă pơkra gơnam; klâo dong lĕ hơmâo anih pơtruh nao rai hăng anom bơwih ƀong či akŏ pơjing anih pơkra gơnam hơmâo nua pơmă, biă ñu anom bơwih ƀong amra hơmâo lu tơlơi gêh gal anun lĕ anŏ rơđah mơ̆ng gơnam, ƀơi anai hơmâo lu mơta gơnam dưi pơhmu kơ anŏ klă, nua hăng anih pơkra gơnam laih anun hơđong pran blơi yua gơnam.

- Tui hăng ih pơmin, Jing anom bruă wai lăng plang sĭ mơdrô điện tử anai, Khul mơnuih ngă hmua tơring čar amra wai lăng, djru ƀing ba sĭ gơnam amăng plang web anai hiư̆m pă đah mơ̆ng pơhlôm gơnam klă ăt kah hăng djơ̆ tơlơi phiăn?

-Yă Lại Thị Loan: Khul mơnuih ngă hmua tơring čar Akŏ pơdong grup wai lăng sang čơ laih anun hơmâo tơlơi pơkă rơđah laih tơlơi gơgrong bruă mơ̆ng grup wai lăng hăng Khua anom bruă wai lăng ăt kah hăng ding kơna amăng grup wai lăng amra gơgrong bruă krăp lăng tơlơi pơhing, hơdôm bruă blơi sĭ amăng plang điện tử đah mơ̆ng pơhlôm kơ pô sĭ hăng pô blơi dưi ngă mă ƀing gơñu samơ̆ ăt hơmâo tơlơi krăp lăng kơjăp hơdôm tơlơi pơhing kơ gơnam ba sĭ laih anun tơdah hơmâo tơlơi soh lĕ amra pơsir tui tơlơi phiăn, ƀu pioh hơmâo tơlơi soh glăi hơnong pơkă ôh. Tơlơi pơmin anai jing anih sĭ mơdrô mơ̆ Khul mơnuih ngă hmua tơring čar gir akŏ pơdong yua tơlơi klă ƀu djơ̆ yua kiăng ƀong lơi ôh mơ̆ kiăng pơƀuh anăn gơnam hmư̆ hing mơ̆ng tơring čar akŏ pơdong anăn gơnam hmư̆ hing mơ̆ng tơring čar, mơ̆ng anun pơsit anăn gơnam mơ̆ng hmua Việt Nam.

- Sui pơ anăp, Khul amra hơmâo hơdră ngă bruă hăng pok prong plang sĭ mơdrô điện tử anai hiư̆m pă thơ?

-Yă Lại Thị Loan: Hăng djŏp bruă sĭ mơdrô điện tử ƀudah boh thâo mrô lĕ jai hrơi kiăng pơplih phrâo đah mơ̆ng lăp djơ̆ hăng tơlơi pơđĭ kyar, jing Plang sĭ mơdrô điện tử Chonongsandaklak.vn ăt hnun mơn, amra pơplih tui kiăng klă hloh. Tơdah 500 jơgăn pơdă gơnam aset đơi pơhmu hăng tơlơi kiăng lĕ amra pok thim dong laih anun gơmơi ngă bruă kah pơpha tui rơwang bruă mơn, hơmâo akŏ bruă pơkra klă tui ăt kah hăng pok prong jơgăn pơdă gơmam tơdah hơmâo lu mơnuih kiăng yua, laih anun pơplih na nao yơh, bruă wai lăng ăt khŏm ngă kơjăp hloh mơn kiăng anih sĭ mơdrô điện tử mă bruă tŭ yua hloh, ƀu djơ̆ dưi sĭ hơdôm pă ôh amăng ha hrơi ôh mơ̆ phun ñu lĕ pơƀuh hyu gơnam mơ̆ng hmua mơ̆ng tơring čar ăt kah hăng mơ̆ng dêh čar Việt Nam hăng hơdôm mơta gơnam OCOP mơ̆ng 63 boh tơring čar.

- Bơni kơ ih hăng hơdôm tơlơi hơmâo lăi nao!