Mơguah lơ 11/1, Gơnong bruă Ngă hmua hăng pơđĭ kyar plơi pla tơring čar Dak Lak pơphun jơnum bơkơtuai anăn “Hơdră pơsir hlom bom hmua pơdai mơtah mơda hiam pơhrŏ djah sat hăng pơđĭ hnong boh pơdai” kiăng pơčrong sai pơblih tơlơi thâo thăi, hơduah ĕp khul bruă mă djơ̆ lăp pioh pơtrut anom bruă ngă hmua ƀơi tơring čar pơđĭ kyar hơđong, pơhlôm djop mơnong ƀong huă, braih pơdai lir hơbit hăng pơgang ayuh hyiăng anih dŏ jum dar lŏn mơnai glai klô.

Ngă hmua pla pơdai ƀơi Dak Lak ră anai ba akŏ hlâo amăng kual Tong krah treng hang ia rơsĭ hăng Dap Kơdư abih bang đơ đam hmua rah pơtem lĕ rơbêh 100.000 hektar, dưm dưm hăng giăm 35% đơ đam hmua đang rim thun amăng tơring čar; rơnoh boh pơdai hơmâo truh 69 tă lơ̆m sa hektar, thun 2023 bruă ngă hmua pơhrui glăi truh 800.000 tơn pơdai. Dak Lak akŏ pơjing anih anom ngă hmua sa dơnong pioh sĭ braih, kiăng dưi djop anŏ rơkâo blơi amăng dêh čar hăng sĭ mơdrô hăng tač rơngiao. Khă tui anun, ƀơi mông bơkơtuai, lu mơnuih lăi: bruă ngă hmua pla pơdai ră anai ƀu ƀiă ôh tơlơi tơnap, lông lăng yua kơ ayuh hyiăng pơblih. Kiăng kơ bruă ngă hmua hơđong kjăp, pơhlôm braih hiam, pơhrŏ ƀiă anŏ bơbeč mơ̆ng ayuh hyiăng ngă, đing nao bruă ruah pơjeh pơdai djơ̆ găl, mă yua hơbâo kmơ̆k pruai rơgoh, yua ia jrao djơ̆ lăp, ngă tui bruă ngă hmua pơdar nao rai hlom bom, đing nao kơ boh thâo ia rơgơi hơdră ngă hmua tơjŭ pla pơdai pơjeh phrâo.