Găn rơgao 2 thun ngă tui, hơmâo rơbêh 3.400 čô mơnuih hơmâo pơtop hrăm kiăng hrưn đĭ klă dong hơdôm boh tơhnal amăng wai lăng lŏn mơnai hăng ayuh hyiăng, rơbêh 1.000 boh sang anŏ ƀun rin hăng giăm ƀun rin hơmâo akŏ bruă djru brơi gơnam ngă đang hmua hluai tui hră plih gơnam hăng abih tih nua ñu rơbêh 5 klai prăk, pơgiong man pơkra phrâo/pơkra ming 69 dơnao pơkŏng ia pioh pơgang ayuh hyiăng pơplih sat amăng abih tih 260 dơnao ia tui hơnong pơkă.

Đĭ pơhiăp amăng mông ngă lơphet, ơi Nguyễn Hoài Dương, Khua gơnong bruă ngă hmua hăng pơđĭ kyar ƀon lan tơring čar Dak Lak brơi thâo, hăng tơlơi gum djru mơng Jơlan hơdră pơđĭ kyar mơng Sang gum hơbit djop dêh čar, Khua ding jum ngă hmua hăng pơđĭ kyar ƀon lan hơmâo ngă gêh gal brơi mơnuih ƀon sang ƀơƀrư̆ pơklaih mơng ƀun rin hăng pơđĭ kyar tui jơlan gah hơđong kjăp.