Anai lĕ tơlơi pơtrun mơ̆ng grup ĕp lăng mơ̆ng khul pơ ala mơnuih ƀôn sang tơring čar Dak Lak amăng mông mă bruă hăng jơnum min mơnuih ƀôn sang tơring čar, ngă tui Hră pơtrun mơ̆ng khul pơ ala mơnuih ƀôn sang tơring čar kơ bruă “Pơđĭ kyar pla kơphê hơđong kjăp truh thun 2020 laih anun anăp nao truh thun 2030” iâu klah čun Hră pơtrun 24. Tơdơi kơ 7 thun ngă tui Hră pơtrun 24 mơ̆ng thun 2017-2023, lu boh yôm phun pơkă kah hăng rơnoh kơphê pơhrui glăi rơbêh 510.000 tơn sa thun, hnong boh giăm lơ̆m 1 hektar 2 tơn 7, đĭ tui 14% pơkă hăng tơhnal pơtrun mơ̆ng Hră pơtrun.

Đơ đam kơphê hơmâo hră pơsit djơ̆ rơnoh pơkă hiam 30.300 hektar, asar kơphê hiam 100.000 tơn, năng ai 90% rơnoh kơphê pĕ pơhrui, ƀhu krô hăng djă pioh wai lăng djơ̆ hơdră. Ƀơi mông mă bruă, ƀing khua mua jơnum lăi lĕ,bruă pok pơhai Hră pơtrun 24 ăt dŏ lu anŏ kơƀah, gun gan, boh nik ñu ĕp prăk čan rŭ pla glăi kơphê, aka ƀu hơmâo bruă hơdai gum hrŏm lu tơring glông hăng đing nao aka ƀu lăp anun yơh lŏm pok pơhai ngă tui aka ƀu hmao kru, tŭ yua, đơ đam đang kơphê pơsit hiam klă aka ƀu lu ôh….grup hyu ĕp lăng rơkâo, djop gơnong bruă, djop tơring glông kiăng đing nao glăm ba hloh amăng bruă pok pơhai ngă tui Hră pơtrun 24 mơ̆ng jơnum min pơ ala mơnuih ƀôn sang tơring čar. Amăng anun, Jơnum min mơnuih ƀôn sang tơring čar khom tañ jơnum pơtong glăi bruă ngă tui hră pơtrun anai.