Gir run pơđĭ tui rơnoh kiăng hơmâo rơbêh 80% anom ngă hrŏm mă bruă hơđong, hơmâo kơmlai; amăng thun anai, akŏ pơdong boh ƀiă kiăng hơmâo 5 hơbô̆ bruă sang bruă ngă hrŏm, amăng anun, đing nao hơbô̆ sang bruă ngă hrŏm phrâo, sang bruă ngă hrŏm lir hơbit pơhlôm rơnoh yom. Anai lĕ, tơhnal pơkă dưi hơmâo khul lir hơbit djop sang bruă ngă hrŏm tơring čar Dak Lak pơkă lui hlâo ƀơi mông jơnum jak iâu bơkơtưn mă bruă thun 2025. Ƀơi mông jơnum jak iâu, Khul pơlir hơbit djop sang bruă ngă hrŏm tơring čar Dak Lak hơmâo iâu pơthưr abih bang sang bruă ngă hrŏm ăt pơtrut pran jua prăp lui hlâo, pơčeh phrâo, pơtrut ba yua boh thâo ia rơgơi, pơblih yua mrô hăng lir hơbit rơnoh yom kiăng pơtrut boh tŭ yua amăng bruă mă.

Mơ̆ng anun, pơđĭ tui rơnoh sang bruă ngă hrŏm mă bruă hơđong, tŭ yua, hơmâo kơmlai lĕ mơ̆ng 80% pơngŏ; mrô sang bruă ngă hrŏm mă bruă thâo rơgơi rơbêh 55%; sang bruă ngă hrŏm tơdu ƀu đĭ kyar trun gah yŭ 10%. Amăng thun anai, akŏ pơdong boh ƀiă hơmâo 5 boh sang bruă ngă hrŏm tui hơbô̆ phrâo, lir hơbit rơnoh mă bruă sĭ mơdrô. Ơi Huỳnh Bài, Khua khul lir hơbit djop sang bruă ngă hrŏm tơring čar Dak Lak brơi thâo, khul pơlir hơbit amra hơmâo hơdră djru ba gêh găl kiăng abih bang sang bruă ngă hrŏm dưi ngă djơ̆ tơhnal pơkă.