Đơ đam tơring čar hơmâo 619 boh dơnao pơkong ia hăng rơnoh ia pơkong 650 klăk met khô̆i; 161 boh bơnư̆ pơkong ia, 76 boh anih dưm măi ƀôp ia hăng dua arăt jơlan nao rai ƀơi bơnư̆ akŏ tli. Yua bơbeč djơ̆ ia hơjan hlim ngă, kơthel truh anun lu ring bruă bơnư̆ pơkong ia răm hĭ, ngă rơngiă tơlơi rơnuk rơnua kơ bơnư̆ pơkong ia, biă mă ñu bruă bơwih brơi pruih ia kơ hmua đang.

Ơi Nguyễn Công Hạnh, Kơ-iăng khua kông ty sa ding kơna wai lăng bơnư̆ pơkong ia Dak Lak pôr pơhing, ră anai, kông ty hlăk wai lăng 345 ring bruă bơnư̆ pơkong ia anet prong bơwih brơi djop ia bruih năng ai 80 rơbâo ha phun pla hăng rông akan hơdang. Tal hơjan hlim phrâo anai, hơmâo lu ring bruă ƀơi Ea Sup răm hĭ, pơ tơring glông Krông Ana, Lak, Krông Bông ăt hơmâo mơ̆n. Anom bruă sĭ mơdrô  wai lăng bơnư̆ brơi jŭ yap abih anŏ răm rai, dăp hơdră mă bruă ming pơkra glăi, rơkâo ĕp prăk rŭ pơkra ngă kjăp glăi samơ̆ aka ƀu hơmâo prăk ôh.