Tơring čar Dak Lak ră anai hơmâo 22.500 ha pla boh sầu riêng, dưm dưm hăng 43% đơ đam phun boh troh amăng tơring čar, rơnoh pơhrui glăi giăm 188.000 tơn. Đơđam tơring čar hơmâo 49 kual pơkă mrô pla hơmâo pơsit brơi đơ đam 1.800 ha hăng 17 boh anih pơsit ba sĭ mơdrô hơmâo dưm amăng hruh kơdŭng pơthâo anăn pioh ba sĭ mơdrô. Thun blan rơgao, bruă djru pơsit brơi mrô pla boh sầu riêng, ba nao pơ dêh čar tač rơngiao mơ̆ng Dak Lak kơđông hĭ, hăng giăm 40 pok hră aka pơsir. Gong gai kơnuk kơna hăng anom bruă djop tơring glông anih pla boh sầu riêng hơmâo pơsir brơi ĕp lăng čih pơkra anăn sầu riêng djŏp anŏ gêh găl ba sĭ mơdrô pơ dêh čar tač rơngiao găl tơlơi phiăn jơlan phun.

Blan 8 pơ anăp, Dak Lak amra hơmâo 9000 ha boh sầu riêng amăng tơring čar truh bơyan pĕ boh. Lơ̆m anun tơring čar hơmâo pơsit brơi 63 kual hơmâo mrô pla, đơ đam hmua hơmâo 2000 ha. Tơlơi kiăng ngă hăng kual pla boh sầu riêng dưi lăng kah hăng pơsit brơi mrô tơhnal pơkă gru anih pla khom hơmâo 10 ha pơngŏ, ƀu hơmâo pla hrŏm hăng đang boh troh pơkŏn ôh, ngă djơ̆ tơlơi pơkă wai lăng bruih ia jrao, hơbâo pruai djơ̆ tơlơi pơkă hơdjă rơgoh arăng sem lăng bruă pơgang phun pla. Khă tui anun, yua boh sầu riêng ƀơi Dak Lak pla raih daih, pla plah wah amăng đang kơphê, đang boh troh pơkŏn, bruă lir hơbit plah wah mơnuih ngă hmua hăng sang bruă sĭ mơdrô aka ƀu tong ten djơ̆ tơlơi phiăn pơtrun, bruă mă pla hăng pruih jrao laih anun hơbâo pruai lu đơi kiăng pơboh jor ăt dŏ hơmâo, anun ƀu thâo pơsit tong ten boh troh sĭ mơdrô pô hmua hlơi rơđah rơđong...hơdôm tơlơi anun dŏ ngă gun bruă ngă hră pơsit mrô pơkă kual.

Kiăng pơtrut tañ bruă ngă hră pơsit gru mrô kual pla, Jơnum min mơnuih ƀôn sang tơring čar Dak Lak hơmâo jao nao ĕp lăng, pơsit brơi bruă anai lĕ, jao kơ Anom bruă wai lăng bruă hmua hăng pơđĭ kyar plơi pla tơring čar; jao anom bruă wai lăng phun pla hăng pơgang phun pla tơring čar pơtô brơi ƀing apăn bruă gah anom bruă ngă hmua thâo tong ten kơ bruă anai. Ơi Lê Văn Thành, Khua anom bruă wai lăng phun pla hăng pơgang phun pla Dak Lak brơi thâo, hrŏm hăng boh sầu riêng, tơring čar dŏ hơmâo akŏ bruă pơsit brơi mrô kual pla lu djuai boh troh pơkŏn gêh găl yua kơ anun bruă pơtô hrăm, akŏ pơjing bruă mă, jao wai lăng gru mrô kual pla pơjing amra pơphun tañ mơ̆n:

“Anom bruă wai lăng bruă pla pơjing hăng pơgang phun ƀing gơmơi dưi jao ngă anom bruă gong jơlan pơsit gru mrô kual pla pơjing, hơmâo jak iâu Sang bruă Pơgang phun pla dêh čar djru pơtô tong ten, tum teč kơ ƀing apăn bruă gah anom bruă ngă hmua gưl tơring glông. Ƀing apăn bruă anom pơlir hơbit ngă ƀong hrŏm, ƀing apăn bruă amăng sang bruă wai lăng bruă pla pơjing hăng pơgang phun pla tơring glông, anom pơsur bruă ngă hmua, anom pơđĭ kyar plơi pla.....abih bang sang bruă anun gơmơi hơmâo jak iâu soh. Laih anun truh lơ 9/6 rơgao hơmâo pơtô hrăm ƀơi plơi prong Ƀuôn Ma Thuôt lăi pơthâo bruă pơsit gru mrô anih pla pơjing kiăng pok pơhai truh pơ plơi pla”.

Phrâo anai, Khul ngă hrŏm boh sầu riêng tơring čar Dak Lak ăt pơphun jơnum pơtruh brơi ĕp anih anŏm sĭ mơdrô boh sầu riêng thun 2023. Ƀơi mông jơnum, ƀing pơ ala kơ djop sang bruă sĭ mơdrô gah bruă boh sầu riêng hơmâo kah pơpha tơlơi pơhing bruă mă ngă hmua pla boh sầu riêng, bruă hyu blơi hăng sĭ mơdrô boh sầu riêng mơ̆ng hơdôm tơring čar gah kual dơnung thun 2023, tơlơi hrăm brơi kơ tơring čar Dak Lak, hơdôm tơlơi thâo thăi pơđĭ kyar pơđĭ rơnoh sĭ mơdrô boh sầu riêng mơ̆ng hơdôm dêh čar thâo ming pơkra, djă pioh tơdơi kơ pĕ boh sầu riêng, hơdôm tơlơi gêh găl hăng tơlơi tơnap dưi pơsir hĭ mơ̆ng bruă sĭ mơdrô boh sầu riêng. Hơdôm sang bruă ngă ƀong hrŏm, grup ngă ƀong hrŏm ăt kah pơpha tơlơi pơhing pla hăng sĭ mơdrô, git gai wai lăng sang bruă ngă ƀong hrŏm hăng tơlơi tơnap tap lơ̆m pok pơhai ƀơi kual pla boh sầu riêng.

Hrŏm hăng anun, Khul ngă hrŏm sĭ mơdrô boh sầu riêng Dak Lak ăt pôr tơlơi pơhing akŏ bruă pla boh sầu riêng tui anŏ pơkă rơgoh pioh sĭ mơdrô hăng tač rơngiao, pơčrâo tong ten anih pla, djru ding kơna amăng khul ngă hrŏm sĭ mơdrô kiăng pơđĭ rơnoh sĭ mơdrô boh sầu riêng hơđong kjăp. Ƀơi mông jơnum anai, Khul sĭ mơdrô boh sầu riêng tơring čar Dak Lak hơmâo kĭ pơkôl hăng Anom kơsem min pơđĭ kyar bruă ngă hmua, kông ty pơčruh ngăn boh thâo ia rơgơi komputer Autoagri hăng lăi pơthâo bơnah tơlơi pơhing plang internet mơ̆ng Khul ngă hrŏm hăng anăn Hiephoisauriengdaklak.org.vn kiăng pơtruh nao rai hăng lu khul tơring čar pơkŏn. Nao jơnum pơtruh nao rai tơlơi pơhing, hơmâo ơi Tống Văn Hiếu, Kơ-iăng Khua phun kông ty pơčruh ngăn pơkra ming boh troh đang hmua mrô 1, tơring glông Krông Pač, tơring čar Dak Lak brơi thâo:

“Hăng anŏm bruă sĭ mơdrô bơni biă mă khul grup hơmâo ngă hrŏm pơtruh nao rai sĭ mơdrô djơh hăng anai. Yua hơmâo khul ngă hrŏm hơdôm tơlơi kiăng ngă amra pôr pơthâo djop mơta gơnam sĭ mơdrô pơtruh brơi kơ mơnuih thâo lu amăng bruă sĭ mơdrô boh sầu riêng. Blung hlâo, khom pơđur ƀing thâo anun pơtô brơi, kiăng abih bang mơnuih djru pơgôp hiăp đah mơ̆ng thâo pơblih glăi bruă pơkra gơnam sĭ mơdrô, dưi ba hyu sĭ mơdrô pơ anih gleh ba sĭ mơdrô”.

Jing tơring čar hơmâo lu tơlơi gêh găl, pioh pơđĭ kyar pla boh sầu riêng, thun blan rơgao, hrŏm hăng djru mơnuih ngă hmua tŭ yua hloh, gong gai kơnuk kơna hăng djop anom bruă ƀơi Dak Lak đing nao biă mă ba hyu sĭ mơdrô, biă mă kơnang kơ anih sĭ mơdrô tui jơlan phun. Hrŏm hăng anun, tơring čar Dak Lak dŏ pok pơhai kơčăo bruă lông ngă lăng pla boh sầu riêng ba yua boh thâo ia rờơi hăng ngă hrŏm akŏ pơjing hơƀô̆ bruă đang hmua hiam pla boh sầu riêng pioh tuai hyu ngui ĕp lăng, djru kơ bruă nao hrăm lăng sit nik, dưi pơtruh brơi mơnuih ngă hmua hrăm tui, ba tuai čuă ngui, ĕp lăng. Kơnang mơ̆ng anun, djop bruă pơtô hrăm ba yua boh thâo ia rơgơi, pơphun lu bruă mă ngă hmua ba gru hiam pla boh sầu riêng. Tơhnal pơkă kiăng pơđĭ tui tơlơi thâo hluh mơ̆ng mơnuih ngă hmua djuai ƀiă hăng lir hơbit pơđĭ kyar bơwih ƀong huă lu khul mơnuih ba yua pơblih phrâo mrô; lông ba yua boh thâo ia rơgơi phrâo ĕp lăng hơdră wai lăng pơgang đang hmua boh sầu riêng hăng ngă hrŏm ba pơdă sĭ mơdrô pơdah thâo amăng plang tơlơi pơhing điện tử.