Anai jing sa amăng hơdôm hơdră hơmâo ba tơbiă ƀơi mông jơnum “Pơjing glăi anih anom glai klô ƀơi Dak Lăk: Tơlơi gêh gal hăng tơlơi lông lăng” yua Anom bruă wai lăng đang glai pơphun lơ 15/12, ƀơi plơi prong Buôn Ma Thuột. Dak Lăk ră anai hơmâo rơbêh 657 rơbâo ha lŏn ngă hmua, hơmâo lu djuai phun pla sui thun kah hăng kơphê, kơsu, tiu, boh ñông, boh troh. Amăng anun, kơphê hơmâo giăm 213 rơbâo ha, hăng mrô rơbêh 550 rơbâo tơn rim thun.

Ƀơi mông jơnum, khua pơ ala hơmâo pơtŏng glăi boh tŭ yua hơdôm bruă rŭ glăi glai klô, biă ñu hăng hơbô̆ bruă kơphê ngă hmua pơlir hăng pla glai. Ƀing khua lăi, hơbô̆ bruă hơmâo ba glăi boh tŭ yua bơwih ƀong, pơđĭ tui prăk pơhrui kơ mơnuih ngă hmua. Gum djru kơ mơnuih mơnam mơn hăng bruă pơhưč mơnuih mă bruă hăng pơđĭ tui anŏ yôm hrơi mă bruă. Laih dong hơbô̆ bruă anai tŭ yua hăng ayuh hyiăng, djru plai ƀiă ia kiăng pruih amăng đang hmua, ngă lŏn djrưh, biă ñu amăng bơyan không phang.