Lơ 20/10, Jơnum min mơnuih ƀôn sang tơring čar Dak Lak pơphun Jơnum klah čun ƀơƀiă 5 thun ngă tui Tơlơi pơtrun pơsit mrô 98/2018 mơ̆ng Gong gai dêh čar kơ hơdră bruă pơsur pơđĭ kyar anom mă bruă hrŏm, pơlir amăng bruă ngă đang hmua, sĭ blơi gơnam hăng pơlir bruă blơi sĭ gơnam ƀơi tơring čar. Tui tơlơi lăi pơthâo glăi amăng mông jơnum, hluai tui Tơlơi pơtrun pơsit 98 thun 2018 mơ̆ng Gong gai dêh čar, tơring čar Dak Lak hmâo mă yua pơplih tañ laih, pơčeh phrâo, ba glăi bôh tơhnal amăng bôh nik, djru lu anom bơwih ƀong, Anom mă bruă hrŏm hăng mơnuih ngă đang hmua hmâo dong tơlơi gal pơđĭ kyar bruă đang hmua, pơđĭ tui prăk pơhrui glăi.

Đơ đam tơring čar ră anai hmâo năng ai ñu 150 bôh anom mă bruă hrŏm gah đang hmua, rơbêh kơ 270 blah blok, đang war hăng rơbêh kơ 15.500 bôh sang anô̆ mơnuih ngă đang hmua hmâo pơlir hơbit ngă đang hmua blơi sĭ gơnam hăng anom bơwih ƀong sĭ mơdrô. Bruă gum hrŏm hơdră pơlir ba glăi lu bôh tŭ yua kơ hơdôm bơnah gum hrŏm. Hơdôm bôh anom bơwih ƀong, anom mă bruă hrŏm hmâo mrô gơnam pioh sĭ hơđong, anô̆ klă; pơsir gơnam sĭ hyu kơ mơnuih ngă đang hmua hluai tui hơdôm hră pơkôl pơlir hơbit, pơjing bruă mă kơ mơnuih ƀôn sang. Hrŏm hăng anun, bruă pơlir hơbit pơjing rai gơnam hơdjă, pơhlôm klă, hơdôm phun akha rơđah mơ̆ng hơpă kơ mơnuih blơi yua, pơjing bruă mă kơ mơnuih mă bruă. Bruă mă yua hơdôm hơdră phrâo amăng ngă đang hmua djru plai ƀiă bơdjơ̆ nao ƀu klă kơ đang hmua./.