Dak Lak ră anai hơmâo rơbêh 657 rơbâo ektar lŏn ngă hmua, pơđĭ kyar djop djuai phun pla anun lĕ kơphê, kơsu, tiu, boh ñông, phun kyâo boh troh pơkŏn. Amăng anun, kơphê đơ đam giăm 213 rơbâo ektar, hăng dưi pơhrui glăi rơbêh 550 rơbâo tơ̆n rĭm thun. Kơphê lĕ gơnam đang hmua phun, ba glăi prăk pơhrui kơ mơnuih ƀon sang ƀơi Dak lak. Sit biă ñu, bruă pơđĭ kyar tañ đơi, kiăng pĕ pơhrui lu, juăt yua lu kmơk, ia jrao pơgang kah hăng bruă luh nao pla kơphê, ngă hmua tui hluai hor amra bơdjơ̆ sat nao kơ bruă pơđĭ kyar hơđong kjăp mơng gơnong bruă kơphê.

Amăng mông jơnum bơkơtuai, ƀing khua mua hơmâo lăng glăi boh tŭ yua pok pơhai hơdôm bruă kiăng ngă hiam glăi đang glai, sit biă ñu hăng hơbô̆ bruă pla kơphê pơlir hăng đang glai. Amăng giăm 5 thun laih rơgao, hơbô̆ bruă ngă hmua hăng đang glai pơlir hơbit lơm ngă lông lăng ƀơi hơdôm boh ƀon lan amăng tơring čar Dak Lak ba glăi lu tơlơi dưi brơi mơnuih pla kơphê hăng pơgôp ngă hiam glăi jum dar ƀơi rĭm boh ƀon lan. Tơlơi anai bơdjơ̆ nao djop mơta mơnuih mơnam hluai tui bruă pơhưč mơnuih mă bruă hăng hrưn đĭ rơnoh yôm mơng bruă mă. Laih dong hơbô̆ bruă anai pơhlôm brơi kyâo glai jum dar, plai ƀiă pruih ia brơi kơ phun pla, ngă lŏn pơsah rơ-ơ̆, sit biă ñu amăng bơyan không phang. Nai prin tha Nguyễn Thị Ngọc Quyên, Anom pơtô bruă đang glai, Sang hră gưl prong kual Dap kơdư brơi thâo:

“Hăng hơdôm kual ră anai glăk lĕ lŏn ngă hmua samơ̆ neh met wa hơmâo ngă hmua sui thun laih, kiăng mă glăi pioh kơ pla kyâo glai lĕ tơnap tap biă mă yua tơlơi anai amra bơdjơ̆ nao tơlơi bơwih ƀong huă kơ neh met wa glăk gơnang nao lŏn ngă đang hmua. Yua anun, hơdră bruă mơng Kơnuk kơna lĕ ăt brơi neh met wa pla kơphê amăng lŏn glai samơ̆ pơsur neh met wa pla kơphê hrŏm hăng đang glai, anun plĕ pla pơplah kyâo pơtâo kiăng hơmâo phun kyâo pơging hơ-ui hăng tơdah pơsit tong anai lĕ pla đang glai neh met wa amra apah prăk tui hơdră wai lăng glai rưng mơn”.

Ƀing khua mua ăt brơi thâo, kiăng pơplih tơlơi pơmĭn mơng mơnuih ƀon sang kơ bruă ngă hmua hơđong kjăp, đing nao wai pơgang jum dar, pơlir bruă ngă hmua hăng bruă wai lăng glai rưng. Ƀing khua mua rơkâo kiăng kơsem min hơdră wai lăng, mă yua lŏn pla đang glai mă glăi mơng lŏn pla kơphê, pok pơhai hơdôm anih pơtop hrăm, jơnum pơtô pơblang, lăi pơthâo hơdôm hră pơ-ar djơ̆ tơlơi phiăn phrâo kiăng hrưn đĭ pran gơgrong mơng djop bơnah bơdjơ̆ nao tui hơnong pơkă hơdră apah wai lăng glai rưng. Ơi Trần Hữu Nghị, Khua anom bruă kơsem min đang glai Nhiệt đới Việt Nam brơi thâo, hơdôm hơdră hơmâo lăi pơthâo kiăng wai pơgang lŏn ngă hmua ră anai, pla ƀiă hơdôm tơlơi bơbeč sat nao glai rưng. Laih dong ngă hiam glăi lŏn pla glai kyâo, ngă hmua glăk sat tui, pơkra glăi, wai pơgang lŏn ngă hmua hơđong kjăp, hluai tui ayuh hyiăng pơplih.

“Tơlơi bơdjơ̆ nao mơng ayuh hyiăng pơplih jai tong ten, bơyan hơjan ƀuh hơjan kơtang ƀiă hăng amăng ƀiă hrơi amuñ ngă ia ling dăo, bơyan phang sui ƀiă yua anun ngă khŏt ia. Yua anun hơdôm hơdră anai amra pơgôp djru brơi gong gai hăng mơnuih ƀon sang, ƀing mơnuih pla kơphê kơtưn ngă hmua pơlir hăng pla kyâo glai kiăng plai ƀiă hơdôm tơlơi bơdjơ̆ sat lơm ayuh hyiăng pơplih sat”.

Tui ƀing rơgơi kơhnâo Anom bruă kơsem min đang glai Nhiệt đới Việt Nam, amăng hrơi blan pok pơhai ngă hmua, đang glai pơlir hơbit hăng phun kơphê ƀơi tơring čar Dak Lak hơmâo ba glăi boh tŭ yua. Pơhmutu bruă pơplih pla kơphê hơjăn hơdai nao pla pơplah lu phun kyâo, kiăng kơ huăi ngă khŏt ia. Lơm pla pơplah kơphê hăng hơdôm phun pla pơkŏn, phun pla ăt hiam mơn, mơnuih ngă hmua hơmâo dong gơnam pơhrui hăng sit biă ñu lĕ ngă hiam lŏn, kyâo pơtâo jum dar ăt tui anun mơn…

Anom bruă kơsem min đang glai Nhiệt đới Việt Nam rơkâo anom bruă bơdjơ̆ nao tơring čar Dak Lak gum hrŏm pơtrut kơtang bruă pla kơphê amăng hơbô̆ bruă ngă hmua, đang glai pơlir hơbit tui boh thâo phrâo, ngă hmua hơdjă, đĭ tui gơnam pơhrui, bơkơtưn kơtang hăng ba glăi rơnoh yôm lơm sĭ mơdrô./.