Hơdôm wơ̆t pơphun ba pơdă gơnam sĭ mơdrô ƀơi Ƀuôn Ma Thuôt, hơdôm čơgăn dưm gơnam OCOP hăng gơnam hiam, yom phara mơ̆ng tơring čar mơ̆n lu tuai nao ĕp lăng hăng blơi yua. Amai Huỳnh Thị Thủy, sa čô mơnuih blơi gơnam sĭ mơdrô ƀơi Dak Lak, kah pơpha: Tơlơi mơ̆ ñu đing nao lĕ, anŏ tŭ yua hiam mŏng gơnam sĭ mơdrô hăng phun tơdŭ mơ̆ng pơpă hơmâo gơnam sĭ mơdrô anun. Ñu đing nao ruah mă gơnam sĭ mơdrô lăng jĕ giăm hloh, rơđah rơđong, thâo krăn pô, phun tơdŭ anih pơkra rai, biă mă ñu gơnam yua kơ Việt Nam ta pô pơkra, anun lĕ hơdră ta kiăng djru ba, blơi gơnam sĭ mơdrô tơdruă ămng dêh čar ta pô pơkra.

“Kâo čang rơmang gơnam sĭ mơdrô jai hrơi dưi pơđĭ tui anŏ tŭ yua hiam, pơthâo brơi arăng ƀuh lu hloh, kiăng mơnuih ƀôn sang amuñ thâo krăn hăng blơi yua. Rơngiao kơ đing nao anŏ tŭ yua hiam, lăng gah rơngiao hiam klă, pơhưč pran jua ăt đing nao mơ̆n. Tơdah sa mơta gơnam samơ̆ hơmâo lu djuai hơbô̆ phara, lu gru gơnam amra ngă lu mơta pơhưč mơnuih blơi tui anŏ či kiăng phara phara soh”.

Anŏ pơblih amăng tơlơi juăt blơi yua gơnam sĭ mơdrô hơmâo ngă tơnap kơ ƀing pơkra ming samơ̆ jing anŏ pơtrut pran jua mơ̆ng lu sang bruă khom pơblih phrâo hơdră pơkra ming. Gah bruă tơčoh eng ao, yă Nguyễn Thị Đượm- pô sang sĭ mơdrô gơnam bơnal eng ao gru grua đưm kual Dap Kơdư dŏ ƀơi Ƀuôn Ma Thuôt, tơring čar Dak Lak hơmâo ƀuh hlâo anŏ či kiăng hăng kiăo tui bruă pơblih anun, kiăng djơ̆ pran jua mơnuih blơi. Yă Đươm brơi thâo:

“Hăng tơlơi arăng či kiăng ră anai, tuai rai pơ Ƀuôn Ma Thuột lêng kơ hor soh eng ao gru grua đưm hăng hơmâo mơnuih hor blơi mă bơnal gru grua đưm, tơčoh hơbô̆ eng ao rơnuk phrâo. Samơ̆ lu mơnuih hor kơ gru grua hơđăp đôč. Sa tơlơi gêh hăl mơ̆ng ta lĕ ta dưi ngă djơ̆ tui tơlơi kiăng mơ̆ng tuai blơi”.

Gah gơnam sĭ mơdrô mơnong ƀong huă, lu sang bruă pơkra ming anet ăt hơduah ĕp jơlan nao phara phrâo mơ̆n. Amai Dương Thị Trúc Linh, dŏ ƀơi phường Tuy Hòa, tơring čar Dak Lak, pô anăn gơnam sĭ mơdrô ia ngă mơnâo ƀâo jơman dưm amăng mơnong ƀong huă Út Vũng Tàu, gơnam gơñu tŭ mă hră pơsit OCOP 3 asar pơtŭ, kah pơpha: tơlơi kiăng mơ̆ng mơnuih blơi yua lĕ, pơblih na nao ƀu hơđong ôh. Mơnuih blơi ƀu kơnong đing nao kơ anŏ gêh găl đôč ôh, wơ̆t rơnoh blơi, ƀơi anŏ arăng ĕp ten truh pơ hơdră pơkra ming tơpă hơnơ̆ng, rơgoh hơdjă ăt kah hăng lăng nao anŏ hiam klă pơhưč mơta lăng  kơ gơnam sĭ mơdrô anun.

“Gơnam sĭ mơdrô lêng kơ mă gơnam pơkra ming hơmâo amăng plơi pla, djơ̆ lăp hăng tơlơi pơsit mơ̆ng kơnuk kơna pơkă anun lu mơnuih hor blơi. Anŏ arăng kiăng blơi ră anai lĕ hơdjă rơgoh, biă mă ñu hăng gơnam sĭ mơdrô raih daih, anet. Anai lĕ črăn gum hrŏm pơtrut pơđĭ kyar mơ̆ gơmơi hlăk pơtum ngă tui”.

Hơdôm boh sang bruă pơkra ming gơnam sĭ mơdrô lu, prong hlăk pơblih phrâo kơtang biă mă pơpha djuai mơnuih, tuai blơi či kiăng. Tui hăng amai Châu Yến Duyên, kông ty Yến Sào Thành Dung, să Krông Pač, tơring čar Dak Lak: Hlâo adih, kông ty pơkra ming rai gơnam sĭ mơdrô yến sào yom pơmă pioh sĭ mơdrô pơ tač rơngiao. Samơ̆ ră anai, kông ty jai hrơi đing nao kơ anih sĭ mơdrô, blơi yua amăng dêh čar ta pô, laih dơ̆ng pơkra ming rai lu mơta gơnam sĭ mơdrô, kiăng pơhưč ƀing tuai blơi lu hloh.

“Kông ty hơmâo kơsem min hăng pơkra ming lu gơnam sĭ mơdrô djơ̆ găl hăng tơlơi hor mơ̆ng tuai blơi, gơnam rơnoh man ƀrô, kah hăng gơnam yến sào dưm amăng gêt anet, hơmâo pơtel gru anăn hiam bơngač wơ̆t mơnâo ƀâo jơman, tuai juăt ruah blơi. Rơngiao kơ anun, ƀing gơmơi ăt dŏ pơkra ming lu mơta gơnam yến sào hiam pơmă hloh, rơnoh sĭ djơ̆ lăp hăng gơnam pơkra laih anun amuñ mă yua mơtam”.

Hơdôm tơlơi kah pơpha mơ̆ng mơnuih blơi yua hăng sang bruă sĭ mơdrô pơkra ming brơi ƀuh, tơlơi lir hơbit plah wah dua bơnah jai hrơi tong ten hloh. Mơnuih blơi yua dong yua hăng blơi lu gơnam Việt Nam ta pô pơkra ming,  yua djơ̆ hăng tơlơi kiăng, thâo krăn rơđah tong ten, hơdjă rơgoh; lơ̆m anun, sang bruă mơdrô ăt gir run pơblih pơkra ming kiăng mơnuih blơi yua đăo kơnang hloh laih anun pok prong anih sĭ mơdrô. Tơlơi pơdjru nao rai anai, ƀu kơnong djru kơ gơnam sĭ mơdrô mơ̆ng tơring čar Dak Lak dưi ƀuh ƀô̆ mơta amăng sang sĭ mơdrô pởong siêu thị đôč ôh, dŏ pơdah thâo sĭ mơdrô amăng plăng internet juăt sĭ mơdrô amăng điện tử, laih anun ba anăn gơnam sĭ mơdrô djă anăn Việt jai hrơi hơđong hloh.