Tui anun, Jơnum min mơnuih ƀôn sang tơring čar Dak lăk kiăng Khua jơnum min mơnuih ƀôn sang tơring glông, plơi prong git gai hơdôm anom bruă, mơnuih pơkra, sĭ mơdrô kơphê čih pơkra hơdră ngă bruă, pơtrut wai lăng kơjăp hloh đang kơphê truh bơyan pĕ pơhrui; pơtô pơblang, iâu pơthưr hơdôm anom bruă, mơnuih mơnam ƀu dưi pĕ kơphê mơtah ôh, pơhlôm kơphê tơsă truh kơ 85% kah mơ̆ng pĕ (tơdah giăm puih bơyan lĕ, pơhlôm hơmâo boh tơsă đoi đom ñu 80%). Laih dong, hơmâo hơdră ngă tơnap hăng ƀing blơi sĭ kơphê mơda; pơtô brơi mơnuih ƀôn sang prăp lui anih ƀhu, măi ƀhu tơdah hơjan hlim sui hŭi ngă răm kơphê.