Ƀu kơnong jing anih anom pla sầu riêng prong hloh hăng rơbêh 8000 hektar truh thun bơyan pĕ boh đôč ôh, Krông Pač dŏ jing anih anom phun blơi pơƀut boh sầu riêng, pioh dưm amăng kơdŭng, ba sĭ mơdrô hăng tač rơngiao mơ̆ng tơring čar Dak Lak laih anun amăng kual Dap Kơdư. Kiăng pơhlôm pơgang klă bơyan pĕ pơhrui, gong gai kơnuk kơna djop gưl amăng tơring glông Krông Pač hơmâo kơtưn brơi pơgang rơnuk rơnua jơlan glông, pơhlôm hơđong mơnuih ƀôn sang nao rai, krăo lăng tong ten bruă sĭ, blơi hăng pơhlôm boh tŭ yua hiam mơ̆ng gơnam tam sầu riêng.

Tuấn Long pô čih tơlơi čih pơhing Gong phun jua pơhiăp Việt Nam dŏ ƀơi kual Dap Kơdư, hơmâo mông tơña hăng ră ruai tom Khua git gai ping gah tơring glông Krông Pač ơi Trần Hồng Tiến kơ boh yôm phun anun tui anai.

-Ơ ơi, bruă djru mơnuih ƀôn sang hăng sang bruă sĭ mơdrô pô blơi, bơwih brơi bruă sĭ mơdrô boh sầu riêng, gong gai kơnuk kơna ƀơi tơring glông hơmâo pok pơhai hơdră ngă hơgĕt lĕ ?

-Ơi Trần Hồng Tiến : Khua mua phun amăng ping gah tơring glông ăt git gai pơčrâo bruă pok pơhai pĕ pơhrui boh sầu riêng thun anai brơi klă. Ră anai, Jơnum min mơnuih ƀôn sang tơring glông hơmâo akŏ pơjing khul, grup apăn bruă hyu sem lăng; djop anom bruă tơhan kông an, ƀing ngă bruă wai lăng đang hmua….kơtưn hyu sem pơhlôm tơlơi rơnuk rơnua bơyan pĕ boh sầu riêng thun anai, pơhlôm anăm brơi hơmâo tơlơi rung răng, ƀing soh sat koh pơrai đang sầu riêng dŏ mơda aka tha truh blan pĕ kông ngăn yôm hăng ngă hơđong tơlơi pơmin pran jua ană plơi pla.

-Truh bơyan pĕ boh sầu riêng, Krông Pač amra čơkă lu mơnuih mă bruă apah mơ̆ng anih pơkŏn glăi mă bruă, tui anun bruă wai lăng mrô mơnuih, pơgang tơlơi rơnuk rơnua hơđong amăng tơring glông, dưi prăp lui hiư̆m pă, ơ ơi ?

-Ơi Trần Hồng Tiến : Ƀing gơmơi hơmâogit gai pơčrâo trun sa Grup mă bruă dŏ ƀơi anăp či hơdôm kual pla hăng pơƀut boh sầu riêng lu, pơprong amăng tơring glông, kơtưn bruă wai lăng tong ten mrô mơnuih rai mă bruă apah mơ̆ng lu tơring čar pơkŏn, kiăng pơgang tơlơi pơhing rơnuk rơnua, pơsir bruă mă klă hiam amăng tơring glông. Git gai grup lu anom bruă kơtưn ngă hrŏm hyu sem, hyu ĕp lăng, jŭ yap glăi, pơtô pơčrâo ba sang bruă sĭ mơdrô kĭ hră ƀuăn rơ̆ng ba mơnuih mă bruă apah ƀơi anih sĭ blơi boh sầu riêng či mă bruă, khom hơmâo hră kĭ hăng djop sang anŏ mơnuih ngă hmua hăng sang bruă sĭ mơdrô bơnah blơi, bơnah sĭ kiăng ngă bruă tơpă djơ̆ tơlơi phiăn, djơ̆ tơlơi pơkôl pơkă amăng hră pơƀuăn hlâo.

-Jơlan dêh čar mrô 26 găn nao pơ tơring glông Krông Pač kơniă biă, him lăng hlâo tơnap biă mơ̆n pơhlôm bruă rô nao rai pơdŭ pơgiăng boh sầu riêng amăng bơyan pĕ pơhrui. Kiăng bĕ hĭ tơlơi kơđông jơlan yua rơdêh nao rai lu đơi kơniă jơlan, tơring glông hơmâo hơdră hơgĕt pơsir tơlơi anai?

-Ơi Trần Hồng Tiến : Ƀing gơmơi hơmâo jao kơ tơhan kông an, Anom bruă bơwih ƀong huă-wai lăng jơlan glông dăp hơdră pơpha jơlan nao, ruah anih kah hăng tơdron pơrơguăt drơi jăn, brơi rơdêh pơprong kôngtener jưh hăng dŏ tơguan dăp gơnam amăng rơdêh, pơgăn tơlơi juăt ƀuh rơdêh jưh ƀơi ter jơlan prong, ƀơi akiăng ngă kơniă jơlan rô nao rai…bơbeč truh bruă rô rơbat mơ̆ng ană plơi pla. Ră anai, ƀing gơmơi hyu ĕp lăng, ruah mă hơdôm tơdron đă boh lông, anih pơrơguăt drơi jăn brơi jưh rơdêh pơprong mơ̆ng djop kông ty kiăng djru ba anom bruă pơdŭ pơgiăng mut tơbiă amuñ hloh, bơwih brơi bruă sĭ mơdrô boh sầu riêng kơ mơnuih ƀôn sang.

-Kiăng pơđĭ kyar hơđong kjăp gơnam sĭ mơdrô boh sầu riêng, bruă pơhlôm anŏ hiam tŭ yua ñu lơ̆m pĕ pơhrui lĕ yôm mrô sa. Tơlơi anai dưi ngă tui hiư̆m pă, ơ ơi ?

-Ơi Trần Hồng Tiến : Kiăng pơhlôm kơ bruă pla pơjing ming pơkra gơnam sĭ mơdrô hiam hơdjă, rơnuk rơnua, ngă djơ̆ hnơ̆ng pơkă hiam, ƀing gơmơi git gai pơčrâo trun abih bang glông bruă kơđi čar, kơtưn pơtô pơblang brơi mơnuih ƀôn sang, jak iâu djop sang anŏ pla boh sầu riêng sit pĕ pơhrui, khom djop hnơ̆ng pơkă truh tơsă, kiăng pơhlôm hiam, jơman, djă bong kơnuih sĭ mơdrô  hơmâo anăn Sầu riêng Krông Pač, laih anun ngă hiư̆m pă djă kjăp tơlơi đăo kơnang hăng djop sang bruă sĭ mơdrô.

-Hnun yơh djơ̆,  bơni kơ ih hŏ!