Tơring čar glăk pơƀut pơsir brơi kiăng hơmâo lu kual pla sầu riêng dưi ba sĭ sit nik pơ dêh čar tač rơngiao, kiăng hmao amăng bơyan pĕ mơng akŏ thun 8 pơ anăp. Tui hăng ơi Lê Văn Thành, Khua Anom bruă tơjŭ pla hăng pơgang phun pla Dak Lăk, amra hơmâo năng ai ñu 9000 ha đang sầu riêng ƀơi tơring čar amra hơmâo pĕ pơhrui amăng blan 8 pơ anăp. Amăng anun, tơring čar kơnong brơi hơmâo 63 mrô pơkă kual pla sầu riêng đôč, hăng 2.000ha.

Kiăng pơtrut tañ bruă brơi mrô pơkă kual pla, Jơnum min mơnuih ƀon sang tơring čar Dak Lăk hơmâo jao bruă hơduah ĕp, pơsỉ glăi kual pla kơ hơdôm anom bruă ngă hmua hăng pơđĭ kyar plơi pla tơring glông; jao kơ Anom bruă tơjŭ pla hăng pơgang phun pla tơring čar pơtŏp brơi bruă kơ abih bang ƀing khua, mơnuih bruă mă bơdjơ̆ nao bruă anai. Ơi Lê Văn Thành brơi thâo, hrŏm hăng sầu riêng, Dak Lăk prăp lui brơi mrô pơkă kual pla kơ abih bang djuai phun pla hmư̆ hing, anun bruă pơtô brơi hơdră akŏ pơdong, brơi hăng wai lăng mrô pơkă kual pla amra hơmâo ngă tañ.