Dak Lăk ră anai hơmâo 803 anom ngă ƀong hrŏm, pơhưč năng ai 71.000 ding kơna hăng 23.000 čô mơnuih mă bruă re se. Prăk pơhrui glăi mơ̆ng Anom ngă ƀong hrŏm hơmâo năng ai 1 klai 800 klăk prăk/thun. Hơdôm anom ngă ƀong hrŏm, ƀut ngă hrŏm ƀơi tơring čar blung a pơlir hăng bruă pơkra gơnam hơmâo nua, ngă hrŏm pơtruh nao rai hăng anom bơwih ƀong prong hăng hơmâo boh tŭ yua.

Tui hăng ơi Huỳnh Bài, Khua khul pơlir hơbit anom ngă ƀong hrŏm tơring čar Dak Lăk ră anai, kiăng anom ngă ƀong hrŏm pơđĭ kyar klă, amăng hrơi blan pơ anăp, gong gai djŏp gưl kiăng hơmâo hơdră djru kơ Anom ngă ƀong hrŏm pơsir hĭ tơnap tap, pơtrut pơkra gơnam klă hloh. Laih dong, gir djru ba hơdôm Anom ngă ƀong hrŏm amăng bruă sĭ mơdrô, pơƀuh hyu gơnam, pơtruh pơkra gơnam, pơlir hăng tơlơi hơmâo, tơlơi gêh gal mơ̆ng rim kual plơi pla.