Tơdơi hơmâo Ding jum ngă hmua hăng pơđĭ kyar ƀon lan pơčrông lô hăng kĭ pơkôl hăng anom bruă wai lăng sĭ mơdrô pơ tač rơngiao dêh čar Khač kơ bruă ba hruh čim čăng črah mơng Việt Nam ba sĭ pơ dêh čar Khač, kông ti Yến sào Thành Dung, tơring glông Krông Pač, tơring čar Dak Lak hơmâo ngă hră pơ-ar brơi ba sĭ mơdrô hruh čim čăng črah hăng truh blan 11/2023, anom bơwih ƀong sĭ mơdrô gah anom bruă wai lăng sĭ mơdrô dêh čar Khač tŭ ư. Amăng tal ba nao sĭ blung a, kông ti hơmâo ba nao sĭ 300 kĭ hruh čim čăng črah, hăng nua ñu 12 klai prăk.

Đơ đam tơring čar Dak Lak ră anai hơmâo rơbêh 1.000 boh sang anŏ rông čim čăng črah, hăng giăm 1.300 boh sang pioh mă hruh čim. Bruă ba sĭ mơdrô pơ tač rơngiao blung a mơng Dak Lak yôm phăn biă mă yua dêh čar Khač lĕ anih blơi pơhrui hruh čim čăng črah prong hloh amăng lŏn tơnah ră anai. Dưi ba sĭ mơdrô pơ tač rơngiao amra djru brơi hơdôm anom bơwih ƀong sĭ mơdrô hruh čim čăng črah amăng tơring čar hơmâo tơlơi gal prong, laih dong ba glăi pơhrui brơi mơnuih rông čim čăng črah hăng hơdôm anom bruă sĭ mơdrô pơ tač rơngiao.