Ƀut boh durian Dona rơbêh 14 ha mơ̆ng 10 boh sang mơnuih ƀôn sang ƀơi plơi thôn 19/5, să Krông Pač hơmâo rơnoh pĕ pơhrui truh kơ 350 tơn, ba nao bơjuă nua hăng rơnoh blung  55.000 rơbâo sa kg. Nao hrŏm bơjuă nua blơi hơmâo 10 boh sang bruă mơdrô blơi hăng ba sĭ pơ tač rơngiao boh troh đang hmua. Kông ty pơkă hnơ̆ng tơlơi dưi sĭ mơdrô boh troh đang hmua Nguyên Thuận (ƀôn prong Hồ Chí Minh) jing anom bruă pô bơjuă nua dưi hĭ hăng rơnoh blơi sa kg boh sầu riên asăt lĕ 68.000 prăk, dưm dưm hăng abih tih rơnoh prăk  blơi tŭ lĕ 23,8 klai prăk. Ơi Mai Đình Thọ, Anom bruă ngă hrŏm sĭ mơdrô boh troh đang hmua hơdjă rơgoh Krông Pač, tơring čar Dak Lak lăi, bruă bơjuă nua anao ƀu kơnong djru pơđĭ rơnoh tơlơi bơwih ƀong huă mơ̆ng boh durian đôč ôh, dŏ pơjing pran kơtang pioh kơ mơnuih pla tuh pơ alin pơđĭ tui gơnam sĭ mơdrô boh troh đang hmua.

“Găn rơgao tal bơjuă nua anai, pô sang bruă djơ̆ anăn blơi tŭ ăt hơ̆k mơak hrŏm mơ̆n, dưi ruah mă đang boh hiam klă hloh, jơman hloh pioh blơi hăng ba nao sĭ mơdrô kơ tuai blơi glăi. Ha bơnah dơ̆ng, mơnuih pô blơi drơ̆ng glăi klă, ƀu kơnong pơđĭ tui boh tŭ yua tơlơi bơwih ƀong huă đôč ôh, dŏ pơtrut pran jua tơlơi pơ-ư ang kơ ƀing ngă bruă pla hăng sĭ mơdrô boh durian”.

Bruă ngă bơjuă nua boh durian-sầu riêng amăng đang mơtam lĕ sa tơlơi kơñăm nao amăng tal pơphun Jơnum prong bruă Sầu riêng Dak Lak thun 2026, djru hrŏm  djă anăn sĭ mơdrô boh durian-sầu riêng mơ̆ng tơring čar tui jơlan gah pơgang anŏ hơdjă rơgoh, anŏ hiam klă, tơpă hnơ̆ng  laih anun pơđĭ kơtang tơlơi pơhno sĭ mơdrô. Tui hăng khul khua mua pơphun bruă ngă, mơ̆ng hrơi anai, truh abih kơnôl 20/8 ăt amra pơphun dua wơ̆t pơtum pơƀut boh durian pioh bơjuă nua blơi. Him lăng hơmâo 200 ha đang boh durian, rơnoh pơ alin glăi năng ai 4.600 tơn, ngă djơ̆ tơhnal pơkă boh sầu riêng hiam hơdjă hloh, hơmâo gru kơnăl anăn anih pla, hmua pĕ pioh ba nao bơjuă nua, pơjing rai plăng tơlơi pơhing pơtruh brơi plah wah sang bruă mơdrô hăng anih ngă hmua pla pơjing.

Ơi Lại Đức Đại, Khua Jơnum min mơnuih ƀôn sang să Krông Pač brơi thâo, boh tơhnal bơjuă nua blung a ƀuh tŭ yua rơgao hăng tơlơi dŏ čang rơmang mơ̆ng khul pơphun bruă bơjuă nua, ngă atur kơ să ăt ngă giong tơhnal pơkă bruă jao, bơjuă nua hăng pơđĭ tui rơnoh sĭ mơdrô boh durian.

“Tal bơjuă nua hrơi anai, boh tơhnal rơgao hăng anŏ dŏ čang rơmang mơ̆ng Khul khua mua pơphun bruă mă. Hơmâo khua mua jơnum min mơnuih ƀôn sang tơring čar, pơčrâo bruă, git gai pơjing bruă ngă amăng lu tơhnal pơkă ba sĭ mơdrô boh sầu riêng, ƀing gơmiơ hơmâo pơtong sit, bruă pơphun bơjuă nua lĕ sa amăng bruă hơdôm, yak nao pơtong rơđah anăn păn boh durian-sầu riêng Krông Pač lăi pha, boh durian tơring čar Dak Lak hnun mơ̆n amăng anih sĭ mơdrô. Mơnuih ngă hmua ƀu kơnong ba sĭ mơdrô gơnam gơñu amăng anih sĭ mơdrô prong đôč ôh, jing boh tơhnal mơ̆ gơñu pô lăp tŭ mă”.

Tơring čar Dak Lak ră anai hơmâo năng ai 45.000 ha đang boh durian. Thun 2025, rơnoh pĕ pơhrui hơmâo truh 390.000 tơn, pơhrui glăi prăk truh 1,1 klai USD. Thun anai, rơnoh pĕ pơhrui amra đĭ truh 500.000 tơn. Tui hăng Gơnong bruă Ngă hmua hăng Ayuh hyiăng tơring čar Dak lak lĕ, boh tơhnal bơjuă nua blung a jing atur piho kơ tơring čar, plơi pla ăt ngă pơgiong hơbô̆ bruă, pok pơhư prong bruă bơjuă nua amăng djop bơyan pĕ boh sầu riêng-durian pơ anăp adih, dĭ da gla kơñ.