Hăng đơ đam pla rơbêh 720.000 ha, amăng anun 95% lĕ pơjeh kơphê Robustan, Việt Nam ră anai sa amăng hơdôm dêh čar pla kơphê hăng sĭ mơdrô tơpung kơphê Robusta lu hloh ƀơi rŏng lŏn tơnah, dưm dưm hăng 40% rơnoh sĭ mơdrô kơphê ƀơi lŏn tơnah. Bruă pla hăng pơkra ming tơpung kơphê Robusta lĕ, pơsir bruă mă kơ hơdôm rơtuh boh sang anŏ mơnuih ngă hmua, biă mă ñu amăng kual Dap Kơdư.

Khă tui anun, anom bruă kơphê Robusta hlăk dong ƀơi anăp tơlơi lông lăng. Ră anai, rơbêh 70% mrô sang anŏ ngă hmua, ba yua hơbâo pruai kmơ̆k dưm amăng đang hmua lu đơi hnơ̆ng pơkă, ngă rơnoh prăk tuh pơ alin lu hloh hăng ngă tơba lŏn, ia jơman mơ̆ng tơpung kơphê ăt hrŏ tui mơ̆n. Lơ̆m anun, tơlơi pơhing mă bruă pĕ boh kơphê ăt dŏ mơtah aka ƀu tơsă abih, hơmâo na nao đôč. Boh tơhnak arăng kơsem min lăng mơ̆ng Sang bruă kơsem min tơlơi thâo ngă hmua pla pơjing hăng pla kyâo kual Dap Kơdư brơi ƀuh, bruă pĕ kơphê dŏ mơtah, ngă rơngiă hĭ anŏ ia jơman truh 22% rơnoh asar kơphê lom, laih dơ̆ng ngă rai asar kơphê bô hĭ hăng ƀu djơ̆ hnơ̆ng pơkă anŏ jơman ia kơphê či mơñum laih anun bơbeč truh rơnoh sĭ mơdrô dơ̆ng.

Ƀơi mông jơnum, lu khua mua nao jơnum lăi, lơ̆m anih anom sĭ mơdrô ƀơi jar kmar jai hrơi hruă kơjăp, sem lăng tong ten hloh, anŏ pơkă hiam ia kơphê jơman, pơđĭ kyar bruă pla kơphê hơđong, hơduah ĕp kiăng thâo anih pla, pơkra ming tơpung kơphê hăng ngă pơhrŏ ƀiă anŏ ngă hơƀak jrak kơ ayuh hyiăng anih hơdip jum dar, bruă pơđĭ tui anŏ tŭ yua hiam kơphê Robusta kiăng sem lăng mơ̆ng bruă pla pơjing, pĕ kơphê, truh kơ ba yua boh thâo ia rơgơi pơčrang tong ten djơ̆ boh thâo ia rơgơi phrâo; pĕ khom tơguan tơsă abih, pơkra ming djơ̆ hơdră pơkă hnơ̆ng, laih dơ̆ng pơgang ruăi sĭ mơdrô rơnoh yom, hơđong plah wah mơnuih ngă hmua, sang bruă ngă hrŏm, ƀing ngă bruă mơdrô. Amăng anun, kiăng pơtong rơđah tơlơi gơgrong ba mơ̆ng rim sang anŏ pla pơjing, ming pơkra tơpung kơphê Robusta Việt Nam amăng anih anom sĭ mơdrô ƀơi rŏng lŏn tơnah. Ơi Thái Như Hiệp, Kơ-iăng khua Khul kơphê-kakao Việt Nam, lăi lĕ:

“Kiăng pơđĭ tui boh tŭ yua hiam kơphê Robusta Việt Nam ƀing ta kiăng pơphun mơ̆ng bruă ruah pơjeh, lŏn ngă hmua, anih pla, ia bruih, bruă juăt ngă hăng abih bang gơnam yua mă bruă ngă hmua pla pơjing, djop mơta ngă djơ̆ tơhnal pơkă soh. Khă hnun, tơlơi thâo mơneč mă bruă kơnong sa mơkrah đôč, boh tŭ yua anai, pơkă rơnoh sĭ mơdrô tui anŏ či kiăng, pơphun ĕp lăng, pơkă hnơ̆ng tơpă, djơ̆ lăp hnun kah hăng pơkă nua kơphê djơ̆ găl hăng mơnuih ngă hmua”.

Kơnuih hăng anăn păn jing dêh čar ba akŏ ƀơi rŏng lŏn tơnah sĭ mơdrô, pơkra ming tơpung kơphê Robusta, Việt Nam hlăk dŏ ƀơi anăp, tơlơi kiăng khom pơblih mơ̆ng bruă pơđĭ tui hnơ̆ng tŭ yua hiam hăng rơnoh sĭ mơdrô. Tơlơi anun ƀu kơnong kơnang nao kơ tơlơi thâo ngă bruă pla pơjing hăng kơ-uă tơpung đôč ôh, dŏ jing sa bruă mă kiăng hơdai  gum hrŏm, thâo lir hơbit tong ten plah wah mơnuih ngă hmua, sang bruă ngă hrŏm, ƀing ngă bruă mơdrô hăng djop sang bruă kơnuk kơna pô wai lăng. Mơ̆ng anun, kơphê Robusta Việt Nam amra hơmâo anŏ gêh găl tong ten hloh, pơsit anăn sĭ mơdrô, pơđĭ kơtang tơlơi pơhno hăng pơđĭ kyar hơđong kơjăp amăng anih anom sĭ mơdrô ƀơi jar kmar.