Hơdôm sang anŏ pla boh sầu riêng ƀơi să Krông Pač, tơring čar Dak Lak brơi thâo, bruă mă hyu blơi boh sầu riêng hlăk pơblih mơ̆ng bruă hyu bơrơsua hơñăp kah hăng hlâo jing bruă ngă hrŏm, pơlir hơbit, đing nao kơ anih sĭ mơdrô hơmâo đang hmua čih anăn bơkơnăl anăn gru mrô, wai lăng klă anŏ hiam mơ̆ng blung a.

Ơi Mai Hữu Sơn, khua pơ ala sang bruă mơdrô juăt hyu blơi boh sầu riêng durian, pioh ba sĭ pơ dêh čar tač rơngiao brơi thâo, lơ̆m sang bruă mơdrô hăng mơnuih ƀôn sang hơmâo kah pơpha djru ba tơdruă glăm ba amăng bruă pla pơjing, wai lăng răk rem truh pơ bruă sĭ mơdrô, sem lăng ngă tui djơ̆ tơlơi pơkă anŏ hơdjă rơgoh mơ̆ng anih sĭ mơdrô či kiăng, amra gêh găl hloh, laih dơ̆ng ngă atur brơi kơ bruă ngă hrŏm sui thun, pơgăn hĭ anŏ ngă tă tăn hŭi biă ba truh tơlơi ƀu klă amăng bruă blơi hăng sĭ mơdrô.

“Sang bruă mơdrô pô pơphun lir hơbit hăng mơnuih ƀôn sang ƀơi 4-5 gru anăn mrô pơkă anih pla. Hơdôm mrô gru kơnăl anai yua kơ lu sang bruă ngă hrŏm, mơnuih ƀôn sang ngă pô, sang bruă kơnong ngă hrŏm, pơlir hơbit hyu blơi gơnam hăng ba sĭ mơdrô. Tơlơi anai yom biă mă jing tơlơi đăo kơnang, sang bruă mơdrô jing anih tơki, lăp đăo kơnang mơ̆ng mơnuih ƀôn sang ĭn ah hăng ngă hrŏm”.

Gah khul wai lăng phun ngă bruă mơdrô boh sầu riêng, ơi Lê Anh Trung, Khua Khul boh sầu riêng Dak Lak lăi pơtong, tơlơi drơ̆ng glăi mơ̆ng anih sĭ mơdrô  hlâo kơ truh bơyan pĕ boh sầu riêng jing sa tơlơi bơkơnăl klă. Lơ̆m sang bruă mơdrô ƀu bơrơsua hyu dưm pơkôl prăk kăk, pioh pơkong pô đang, kiăng blơi hlâo tañ kah hăng hlâo adih ƀu hơmâo dơ̆ng tah, tơlơi ngă hrup anun, pơkong lui hlâo hăng pơđĭ trun nua tă tăn, laih anun ba truh tơlơi pơdjơ̆ sao, bơrơsua nao rai, ră anai ƀu hơmâo dơ̆ng tah.

“Bruă nao pơkă pơkôl tañ tơl đang či blơi kah hăng hlâo sit mơ̆n amra hơmâo lu tơlơi ƀu klă ôh. Tơdah nua trun, dua bơnah amuñ biă mă hơmâo tơlơi pơdjơ̆ sao nao rai laih anun ngă rơngiă hĭ tơlơi lir hơbit. Yua kơ anun, bruă akŏ pơjing khul pơgang rơnoh sĭ mơdrô tong ten, amra lui hĭ tơlơi ƀu klă dưi hơmâo lu sang bruă mơdrô hơmâo kơnuih nao blơi, pơhlom brơi ngă djơ̆ rơnoh či kiăng gơnam sĭ mơdrô ƀơi anih či blơi”.

Hơdôm tơlơi pơblih klă anai yua hơmâo tơlơi djru hrŏm mơ̆ng akŏ bơyan mơ̆ng gong gai kơnuk kơna tơring čar. Ơi Lại Đình Đại, Khua Jơnum min mơnuih ƀôn sang să Krông Pač, tơring čar Dak Lak brơi thâo, să hơmâo akŏ pơjing Khul kah pơpha bruă mă hăng Grup krăo lăng, ngă hrŏm hăng anom bruă hơmâo tơlơi thâo sa hnơ̆ng, Khul grup sầu riêng hăng djop anom bruă pel ĕp pơtô brơi mơnuih ƀôn sang pla pơjing hăng ngă tui djơ̆ tơlơi pơkă; bruă krăp lăng hăng mă yua gơnam yua ngă hmua, mă čơđeh ba sem lăng anŏ đôm glăi ia jrao Cadimi hăng ia jrao pơgang phun pla, laih anun wai lăng tong ten gru anăn mrô pơkă anih pla, anih ngă hmua hăng sang bruă dưm amăng hruh kơdung piho sĭ mơdrô.

Tơring čar ăt prăp lui bruă ngă hrŏm sang bruă mơdrô hyu blơi, ba nao sĭ mơdrô mơ̆ng bơyan pĕ boh kiăng thâo tañ tơlơi pơhing ƀơi anom sĭ mơdrô. Him lăng rơnuč blan 7 anai, să amra pơphun juă nua sĭ mơdrô blung a hăng rơbêh 14,5 ha đang boh sầu riêng hơmâo laih anăn gru mrô pơkă anih pla, hmua sầu riêng, rơnoh pĕ pơhrui 300 tơn, hơmâo lu sang bruă mơdrô gum hrŏm. Ơi Lại Đình Đại brơi thâo dơ̆ng:

“Thun anai ba bruă wai lăng rơnuk rơnua pơhlom akŏ klôn, hlơi dưi hơmâo hră hyu blơi kah blơi, laih anun hơdôm ƀing ngă hmua ăt tui anun mơ̆n, anom bruă pơkă dưi hơmâo ngă brơi hră laih, dưi yơh nao blơi pơmut. Dua dơ̆ng lĕ, djop sang dưm ƀudah hơjai djă pioh boh sầu riêng khom ngă djơ̆ tơhnal pơkă, pơhlom hơdjă rơgoh, rơnuk rơnua mơnong ƀong huă kah dưi dưm. Klâo lĕ, khom hơmâo bruă wai lăng, ngă hră dưi mă bruă amăng să. Ƀrư̆ ƀrư̆ tui anun, amra ngă tui khut khăt pơhlom rơnuk rơnua akŏ klôn hyu blơi boh sầu riêng amăng să, ngă djơ̆ tơlơi pơtrun tơpă soh”.

Dak Lak ră anai, hơmâo năng ai 44.000 ha đang sầu riêng (Durian), amăng anun hơmâo 33.000 ha hlăk pĕ boh, pơhrui glăi thun 2026 him lăng truh 500.000 tơn. Tơdơi kơ lu thun bong ƀơi anăp bruă hyu blơi tŭ kơ hơmâo, bơrơsua nao rai ngă lŭk pŭk, pơđĭ trun nua ča čot, ră anai anih anom sĭ mơdrô boh durian ƀơi Dak Lak ƀơƀrư̆ hơđong tui laih. Lơ̆m gong gai kơnuk kơna hruă kơjăp bruă git gai wai lăng, sang bruă mơdrô akŏ pơjing khul ngă hrŏm tong ten laih anun mơnuih ƀôn sang ngă tui djơ̆ tơlơi pơtrun pla pơjing pơgang anŏ hơdjă rơgoh, sit mơ̆n anom bruă sầu riêng hlăk ngă tui sa atur pơđĭ kyar kơjăp hơđong, ngă djơ̆ klă hloh tơlơi kiăng amăng anih anom sĭ mơdrô hăng tač rơngiao hrơi blan pơ anăp adih.