Jơnum anai hơmâo rơbêh 30 boh sang bruă sĭ mơdrô rai mơ̆ng ƀôn prong Hồ Chí Minh hrom hăng 200 čô khua mua pơ ala djop sang bruă sĭ mơdrô, anom ngă ƀong hrom, mơnuih ngă hmua amăng tơring čar Dak Nông. Dak Nông ră anai, hơmâo 4 mơta bruă pla pơjing sĭ mơdrô phun kah hăng: Kơphê rĭm thun ba sĭ mơdrô rơbêh 350 rơbâo tơn, tiu rĭm thun sĭ mơdrô 60 rơbâo tơn, kơtăk kơsu 31 rơbâo tơn hăng asar boh ñông rĭm thun 20 rơbâo tơn. Rơngiao kơ anun, hơmâo lu gơnam sĭ mơdrô mơ̆ng đang hmua kah hăng boh čroh, ta juăt lăi boh troh, añăm pơtam, hơbơi pơtơi.

Tơring čar ăt hơmâo tơlơi gêh găl pioh pơtrut pơđĭ kyar bruă čem rông hlô mơnong hăng akan hơdang. Truh ră anai, Dak Nông hơmâo pơsit 4 kual lŏn ngă hmua pla pơjing, ba yua boh thâo ia rơgơi phrâo amăng đang kơphê, tiu hăng pơdai hmua ia hăng rơnoh giăm truh 2 rơbâo hektar mơkrah; hơmâo rơbêh 85.000 hektar djop mơta phun pla ba yua ia rơgơi phrâo. Ƀơi mông jơnum, lu anom bruă rai mơ̆ng ƀôn prong Hồ Chí Minh hrom hăng lu sang bruă sĭ mơdrô, anom ngă ƀong hrom, mơnuih ngă hmua tơring čar Dak Nông hơmâo pơčrong sai tơpă hơdôm tơlơi kiăng ngă hrom amăng bruă pla pơjing sĭ mơdrô boh čroh đang hmua hăng čang rơmang ngă hrom mơ̆ng lu bơnah.