Tơdơi kơ hơdôm hrơi hơjan hlim blan 7, lu mơnuih apăn bruă ƀơi đang glai Yok Đôn yua rơdêh pơdŭ pơgiăng hơdôm rơtuh phun asar mơng anih pla anah ba nao pơ Tiểu khu 526 kiăng kơ pla. Ơi Nguyễn Trung Hiếu, kơ-iăng khua anom bruă boh thâo hăng ngă hrŏm jar kmar, đang glai dêh čar Yok Đôn brơi thâo, 100% mrô anah kyâo hơmâo pla ƀơi hơdôm đang pla anah kyâo, kah hăng mă pơjeh mơng phun pơprong ba glăi pla. Hrơi blan kơsem min pla anah hơmâo ngă tui giăm 2 thun laih, truh ră anai, hơmâo pla anah hăng pla pơjing amăng rơbêh 1.000 anah kyâo amăng đơ đam lŏn glai. Ơi Nguyễn Trung Hiếu lăi pơthâo kơ bruă pla anah phun asar ƀơi đang glai dêh čar Yok Đôn amăng hrơi blan laih rơgao.

“Blung hlâo lĕ ƀing gơmơi kiăo tui nao lăng tơl hơdôm kual hơmâo phun asar, laih dong jŭ yap glăi phun asar, tơdơi anun pơkă luh pla hăng kual pla pơjing. Tơdơi kơ kiăo tui lăng hơdôm tơlơi gêh gal mơng phun asar ƀơi hơdôm kual glai rưng amăng đang glai dêh čar Yok Đôn. Ƀing gơmơi hok mơ-ak biă mă, yua dưi pơgôp amăng bruă djă pioh hơdôm phun kyâo yôm anai amăng đang glai dêh čar Yok Đôn”.

Phun asar lĕ phun kyâo pơprong, glông truh pơ 25 met, prong 1 met. Ƀơi tơring čar Dak Lak, hơmâo lu phun asar čăt amăng đang glai dêh čar Yok Đôn, kual đang glai Ea Sô…Phun asar lĕ kyâo khăng, kjăp, lăng hiam biă mă, anai lĕ kyâo yôm hloh pioh pơkra pơjing kơƀang grê, gơnam tam dưm amăng sang. Hơdôm thun laih rơgao, yua bruă trơ̆i mă lu đơi ngă kơ phun kyâo anai jai hrơi aset tui.

Ơi Nguyễn Hữu Tạo - Kơ-iăng khua anom bruă wai lăng đang glai dêh čar Yok Đôn brơi thâo, ră anai amăng đang glai dêh čar Yok Đôn dŏ giăm 200 phun asar pơprong, tơdah ƀu hmao tlôn pơdjuai, wai lăng amra ngă rơngiă mơtăm tơdơi anai. Tui ơi Tạo, bruă kơsem min pla pơjing anah kyâo yôm tui grup IIA jai lu tui pơgôp djă pioh pơjeh kyâo yôm, pơgôp pơđĭ kyar glai rưng hơđong kjăp, kah hăng hơmâo lu dong djuai phun kyâo. Ơi Nguyễn Hữu Tạo brơi thâo:

“Đang glai hơmâo ba tơbiă akŏ bruă kơsem min boh thâo kiăng djă pioh hăng pơđĭ kyar phun asar. Ră anai hơmâo pla anah laih, hăng glăk pel ĕp hơdôm anih pla amăng kual glai rưng dŏ kơƀah kyâo, hăng amra pok pơhai jao pơjeh brơi neh met wa djuai ania ƀiă kiăng kơ pla pơjing, pơđĭ kyar djop anih. Bruă pơđĭ kyar phun asar amra pơgôp hrưn đĭ tơlơi hơdip kơ neh met wa”.

Đang glai dêh čar Yok Đôn (Dak Lak) lĕ kual glai rưng prong tal 2 đơ đam dêh čar, hăng rơbêh 115.000 ektar. Glai rưng ƀơi anai hơmâo lu anŏ yôm phara, pơplah hrŏm hăng lu phun kyâo pơtâo phara. Tui tơlơi pơkă, amăng bơyan hơjan hlim thun 2023 thun anai, đang glai dêh čar Yok Đôn amra pơtrut bruă pla anah kyâo hăng djru brơi giăm 3.000 anah kyâo asar brơi neh met wa kual mơnuih djuai ania ƀiă pla hăng pơđĭ kyar glai kyâo jum dar kual ngă đang hmua./.