Hmua hơmâo djŏp ia, pơdai glăk mơtah ƀlip ƀơi hmua pơdai 132, să Čư̆ Ea Lang, tơring glông Ea Kar, tơring čar Dak Lăk. Yang hrơi dong pơ-iă hang, ao pơsah yua tuh ia hâ̆o, samơ̆ Sa Moan Krông ăt tlao yôp mơn ƀơi hmua pơdai mơtah mơda. Sa Moan Krông sang ñu ƀơi ƀuôn Briu, să Čư̆ Huê, tơring glông Ea Kar brơi thâo, yua ƀu hơmâo lŏn ngă hmua, sang anŏ ñu hơmâo kơnuk kơna brơi hmua anai mơ̆ng thun 2016. Kơnong sa thun blung a ƀu hơmâo đơi ôh yua aka ƀu thâo ngă hmua, samơ̆ tơdơi kơ hơdôm thun, sang anŏ ngă hmua dua bơyan, 10 tơn pơdai rim thun. Bơyan phang thun anai kơtang biă, hmua sang anŏ ñu gah rơnuč bơnư̆ pơđoh ia, anun jing Sa Moan khŏm prok nao pơ hmua či mă ia:

“Ƀơi ƀuôn Ea Đơk anai, ƀuôn Briu hơmâo hơdôm rơtuh boh sang anŏ hơmâo kơnuk kơna brơi hmua pơdai, sang anŏ gơmơi hơmâo 3 sao 7 hmua pơdai. Jơlan nao pơ hmua ataih, khŏm nao lăng pơdai hăng mă ia djơ̆ hrơi hơmâo ia kah mơ̆ng dưi”.

Ơi Nguyễn Ngọc Hòa, Khua Jơnum min mơnuih ƀôn sang să Čư̆ Elang brơi thâo, rơngiao kơ “hmua pơdai 132” hơmâo mă yua tui Tơlơi pơtrun 132/2003 mơ̆ng Khua dêh čar, brơi kơ neh met wa djuai ƀiă ƀu hơmâo hmua, bơyan puih phang anai, mơnuih ngă hmua amăng să hơmâo rah pơtĕm 500 hektar hmua pơdai. Mơ̆ng akŏ bơyan, gong gai iâu pơthưr neh met wa rah pơtĕm djơ̆ bơyan, anăm ngă ôh pơdai ƀơi tơkai hmua ƀu hơmâo ia, anun truh ră anai pơdai huăi kơƀah ia ôh.

“Không phang amra hơmâo mơn. Hăng bruă pơđoh ia mơ̆ng Kông ti bơnư̆ kŏng ia, să lăi pơthâo hăng mơnuih ƀôn sang, biă ñu lĕ mơnuih hơmâo hmia pơdai thâo ngă hrŏm hăng kông ti bơnư̆ kŏng ia, kiăo tui hrơi pơđoh ia mơ̆ng rim kual đah mơ̆ng thâo nao mă ia pơđoh amăng hmua. Kiăng huăi pơđoh lui ia khưi khai, ƀudah ƀu truh ôh pơ hơdôm blah hmua pơ ataih”.

Kông ti Bơnư̆ kŏng ia Dak Lăk pơdong ƀơi Ea Kar wai lăng 20 ring bruă bơnư̆ kŏnh ia, hơmâo 18 boh dơnao, 1 bơnư̆ ia blai hăng 1 anih ƀŏp ia. Đơ đam hmua pruih ia mơ̆ng Kông ti anai lĕ 3.220 ha djŏp djuai phun pla. Amăng anun hơmâo 1.800 ha phun kyâo sui thun hăng 1.150 ha pơdai ia. Ơi Nguyễn Tiến Sĩ, Khua kông ti Bơnư̆ kŏng ia Dak Lăk ƀơi Ea Kar brơi thâo: Ră anai 14 boh dơnao ia yua Kông ti wai lăng, ia ăt hơmâo lu đôč.

Ƀơi kông ti bơnư̆ kŏng ia Ea Rớt, jing ring bruă bơnư̆ kŏng ia prong hloh ƀơi tơring glông Ea Kar, dưi pơđoh 18 klăk met khô̆i ia. Rơbêh 1 blan anai, 10 čô mơnuih mă bruă pơ ring bruă anai kah pơpha hrơi mă bruă, dŏ gak, krư̆, pok ia hrơi mlăm. Ơi Phạm Ngọc Linh, gơgrong bruă pơđoh ia Bơnư̆ kŏng ia Ea Rớt brơi thâo, amăng dơnao ră anai dŏ glăi 45% đôc. Khua mua, mơnuih mă bruă mơ̆ng anih pơđoh ia khŏm hyu pel ĕp na nao bruă mă ia mơ̆ng hơdôm bơnư̆ ia mơ̆ng hơdôm boh sang anŏ, pơhlôm mă ia pơkrem, tŭ yua:

“Amăng dơnao ăt hơmâo djŏp ia pioh pruih kơ phun pla amăng bơyan puih phang anai. Abih bang mơ̆ng khua truh mơnuih mă bruă mơ̆ng anom bruă amra ngă hrŏm hăng gong gai či pôr pơhing, brơi mă yua ia pơkrem hloh”.

Glăk amăng bơyan không phang kơtang ƀơi kual Dap Kơdư, kơƀah ia hơmâo ƀơi lu anih, bơbeč kơ bruă ngă hmua pla pơjing. Samơ̆ mơnuih ngă pơdai ƀơi tơring glông Ea Kar, tơring čar Dak Lăk prăp lui hlâo laih ia ngă hmua. Bơyan puih phang ƀơi să glăk dưi bĕ mơn adai không phang kơƀah ia.