Lơm hơmâo lu mơnuih hor mơñum kơphê jơman, glăk ba glăi tơlơi gal amăng sĭ mơdrô hăng nua đĭ lu hloh pơhmu hăng ba hyu sĭ asar kơphê. Ƀuh tơlơi dưi anai, lu anom bơwih ƀong sĭ mơdrô ƀơi Gia Lai hơmâo ba jơlan hlâo tuh pơ alin klă, anăp nao bruă bơwih ƀong brơi sir kjăp mơng ruah pơjeh, pla pơjing truh pơ uă pơkra. Ơi Nguyễn Tiến Định-Khua kông ti pơčruih ngăn kơphê Việt Nam United, tơring glông Chư Prông, Gia Lai brơi thâo:

“Ƀing gơmơi ƀuh kơphê jơman phara lĕ jơlan gah ngă mơng gơnong bruă kơphê rŏng lŏn tơnah yua anun ƀing gơmơi amra ƀu dong gah rơngiao ôh. Lơm ngă bruă hăng hơdôm boh sang anŏ, ƀing gơmơi ăt gơgrong pơlăi nao rai boh thâo hăng mơnuih ngă hmua kiăng ƀing gơñu hluh tơdah kiăng sĭ kơphê hơmâo nua ƀiă kiăng hrưn đĭ pla kơphê hiam hloh kiăng pơhrui glăi lu ƀiă dong”.

Ƀu djơ̆ kơnong lĕ bruă ngă mơng anom bơwih ƀong sĭ mơdrô, kơphê hiam jơman ăt ba glăi tơlơi pơplih amăng pla pơjing mơng mơnuih ngă hmua hăng hơdôm anom bơwih ƀong sĭ mơdrô. Mơng đing nao pla pơjing hơđong kjăp, neh met wa hơmâo mă yua hơdră pla hiam hơdjă, pĕ ruah asar tơsă, rao rơgoh hăng amu hăng pra dưm gah rơngiao.

Ƀơi tơring glông Đăk Đoa, anom bơwih ƀong hrŏm gah ngă hmua hăng bơwih bơwang Lam Anh hơmâo tơlơi truh kih hăng hơbô̆ bruă pla hiam hơdjă hluai tui tơlơi sit nik. Kơphê hiam jơman mơng anom bơwih ƀong hrŏm ƀu djơ̆ kơnong pơsit gơnam OCOP 4 asar pơtŭ gưl tơring čar đôč ôh mơ̆ ăt dưi ba sĭ mơdrô pơ lu anih amăng lŏn ia hăng tač rơngiao. Ơi Lê Hữu Anh-Khua anom bơwih ƀong hrŏm brơi thâo:

“Hăng rup rap mơnuih ngă hmua gir kơtir mă bruă, đăo gơnang nao rơnoh mơng asar kơphê, ƀing gơmơi hơmâo pơplih bruă bơwih brơi phun pla, hrưn đĭ nua mơng gơnam tam. Tơlơi anai ƀu djơ̆ kơnong djru đĭ tui nua kơphê đôč ôh mơ̆ ăt pơgôp pơhrŏ trun ƀun rin, djru neh met wa hrưn đĭ pơdrong asah mơng asar kơphê”.

Ră anai, Gia Lai hơmâo pơjing 34 anih pơlir hơbit hrŏm hăng bruă sĭ mơdrô kơphê, hăng đơ đam đang hmua rơbêh 43.500 ektar; tum pơƀut 26 anom bơwih ƀong sĭ mơdrô hăng 8 anom bơwih ƀong hrŏm. Lu anom bơwih ƀong sĭ mơdrô hơmâo khin hơtai pla kơphê hơdjă, tuh pơ alin uă pơkra kiăng hrưn đĭ klă jơman hăng đĭ tui nua gơnam. Kiăng kơphê hiam hơdjă hăng kơphê jơman dưi tơbiă mơng hơdôm hơbô̆ bruă, gong gai hơdôm boh ƀon lan amăng tơring čar glăk pok pơhai lu hơdră djru sit nik, mơng bruă dưm dăp kual truh pơlir anom bơwih ƀong sĭ mơdrô hăng hơdôm anih blơi mut jar kmar. Ơi Đoàn Ngọc Có-Kơ-iăng Khua gơnong bruă ngă hmua hăng ayuh hyiăng lŏn mơnai tơring čar Gia Lai brơi thâo:

“Truh thun 2030, rơngiao kơ bruă pơđĭ kyar kơphê jơman 2.300 ektar, Gia Lai amra ba 80% đang hmua pla kơphê amăng đơ đam tơring čar dưi pla tui hơnong pơkă hơmâo hră pơsit. Laih dong ƀing ta pơđĭ kyar kơphê jơman hăng kơphê tui hơnong pơkă kiăng djơ̆ tơlơi kiăng, Gia Lai ăt glăk gir run pơhưč tuh pơ alin kiăng dưi man pơdong anih anom, sang măi uă pơkra kơphê kiăng lu tui anih pơkra kơphê amăng tơring čar, kah hăng hrưn đĭ nua kơphê”.

Hăng tơlơi gir run ƀu pơdơi mơng anom bơwih ƀong sĭ mơdrô, mơnuih ngă hmua hăng gong gai, kơphê Gia Lai glăk ƀơƀrư̆ pơsit tong kơdrưh ang mơng kual pla kơphê hiam amăng rŏng lŏn tơnah. Bruă pơplih mơng pla raih daih hơdai nao pla đing nao hiam hơdjă hăng nua hơđong, kah hăng ba glăi pơhrui lu ƀiă kơ mơnuih ngă hmua, laih dong pơgôp hrưn đĭ anăn apăn kơphê Việt Nam. /.