Amăng anun, kơnong kơphê hơmâo 490 klăk dolar Mi, boh troh hơmâo 120 klăk dolar. Lăi pơthâo amăng mông jơnum tum pơƀut bruă tuh tia pơkra gơnam sĭ mơdrô, ơi Đoàn Ngọc Có - Kơ-iăng khua gơnong bruă hmua hăng pơđĭ kyar ƀôn lan tơring čar Gia Lai brơi thâo, tơlơi anai hơmâo mơ̆ng bruă ngă hrŏm kjăp kơplah wah bruă ngă hmua hăng sĭ mơdrô. Ră anai amăng tơring čar hơmâo rơbêh 256.000 ha phun pla hmư̆ hing hơmâo pla tui hơnong pơkă GlobalGAP, Rain, Forest, Oganic, 4C...Amăng anun rơbêh 58.000 ha hơmâo hră pơsit anăn păn, hăng hơdôm rơtuh ha hơmâo pơtruh nao rai pơkra gơnam, kơplah wah mơnuih ngă hmua hăng anom bơwih ƀong, hơmâo tơlơi gum hrŏm mơ̆ng rơbêh 200 boh anom ngă ƀong hrŏm, djru ba sĭ gơnam amuñ hloh.

Amăng thun 2023, bruă ngă hmua hăng tuh tia pơkra gơnam sĭ mơdrô ăt pơphun lu mông jơnum kơ pơđĭ kyar ngă hmua kjăp, pok prong anih sĭ mơdrô gơnam, gơñăm nao pơ hơdôm boh dêh čar hơmâo Kĭ hră sĭ mơdrô rơngai kah hăng EU, Japan, Hàn Quốc...; pơtrut sĭ mơdrô, hyu ĕp mơnuih ngă hrŏm bơwih ƀong.