Amăng lu hrơi rơgao, ƀơi Anih čuh tă mơnŏng pơƀut sa anih Nhơn Bình,(gah Kông ti TNHH Pơkra gơnam ƀong huă Quy Nhơn), phường Quy Nhơn Đông, bruă pel ĕp hlô rông blơi mut hơmâo wai lăng kjăp. Hlâo či ba nao pơ anih čuh tă, un (bui) hơmâo pơčrang lăng gah rơngao ƀơ̆i. Pơ anai, pô sang čuh tă khŏm lăi pơthâo djŏp tơlơi kơ anih blơi, anih pơgiăng hăng mrô un. Mơnuih apăn bruă sem lăng tong ten. Ơi Nguyễn Quang Thái, Kơ-iăng khua kông tu brơi thâo, rơngiao kơ ƀing apăn bruă ia jrao hlô rông pel ĕp, sit anom bơwih ƀong ăt hơmâo hơdră phara kiăng wai lăng anŏ klă bruă čuh tă: “Tơdah ƀuh un hơmâo nam ruă djơ̆ klin jing kông ti amra lăi pơthâo hăng anom apăn bruă, anom pơjrao hlô rông kiăng ngă tui djơ̆ hăng tơlơi pơtrun”.

Tui hăng yă Nguyễn Thị Ngân Hà, mă bruă pơ Anih pơčrang lăng kman hăng pơjrao hlô, Anom bruă rông hlô hăng Pơjrao hlô tơring čar Gia Lai, klin pơtah čroh ƀơi un glăk hơđuh kơtang, bơngơ̆t biă mă. Kơnong amăng sa blan rơgao, Gia Lai ƀuh 5 anih hơmâo klin, abih tih ñu hơmâo hơdôm rơtuh drơi un laih ba čuh prai. Sit hnun yơh, bruă wai lăng čuh tă, pơhlôm mơnŏng un klă, jai hrơi hơmâo ngă tơnap hloh:“Ƀing gơmơi wai lăng bruă blơi un mơ̆ng 9 mông mơguah, pel ĕp pơčrang lăng truh 9 mông mơmot, laih anun ƀing gơmơi sem lăng glăi abih bang pơhlôm un klă truh 1 mông 30 mơnit mơguah hrơi tơdơi čuh tă amra hơmâo mơnŏng klă pơ anih čuh tă hăng ba hyu pơ anih sĭ mơdrô”.

Abih bang tơring čar Gia Lai ră anai hơmâo 11 anih čuh tă hlô mơnŏng rôn pơƀut ha anih hăng giăm 800 anih čuh tă ngă mă pơ sang pô. Anom bruă wai lăng bruă hlô mơnŏng tơring čar Gia Lai glăk git gai hơdôm boh tơring pel ĕp, sem lăng abih bang hơdôm anih čuh tă, ăt kah hăng sang sĭ mơdrô bui mơnŭ ƀơi tơring čar. Pok pơhai hyu pôr pơthâo pơ djŏp anih pơgang pơhlôm klin kheng kơ mơnuih ƀôn sang thâo, biă ñu hơdôm boh sang rông bui, un. Tơlơi kiăng lĕ abih bang mơnuih thâo hluh kơ tơlơi hŭi rơhyưt mơ̆ng klin kheng, biă ñu lĕ bruă pơdŭ pơgiăng, sĭ mơdrô, ba sĭ un hăng gơnam pơkra mơ̆ng un mơ̆ blơi ƀu hơmâo hră pơ-ar, amuñ ba hyu klin kơtang biă.

Ơi Huỳnh Ngọc Diệp, Khua anom rông hlô mơnŏng hăng pơjrao hlô tơring čar Gia Lai, brơi thâo dong:“Amăng hrơi mông glăk hơmâo klin tui anai, gơmơi git gai kơ Khul rông hlô pơjrao hlô mơ̆ng djŏp kual ngă hrŏm hăng gong gai hơdôm boh tơring či wai lăng bruă čuh tă anet mơ̆ng tơring čar aka ƀu hơmâo man pơdong anih čuh tă hlô rông pơƀut sa anih. Amăng mông blơi un, ƀuh un djơ̆ klin lĕ gơmơi brơi pơčlah mơtăm. Tơdơi kơ anun tui hluai kơ klin kheng mơn, biă ñu lĕ klin pơtah čroh ƀơi un lĕ gơmơi amra ba čuh hĭ, mă yua apui pơ-iă hang hăng tơlơi pơtô ba či čuh prai.

Rơngiao kơ krăp lăng anih čuh tă, wai lăng klin kheng, kiăng pơgăn klin pơtah čroh ƀơi un lar hyu tañ, mơ̆ng blan 7, tơring čar Gia Lai hơmâo akŏ pơdong 4 anih dŏ gak wai pơgang klin kheng ƀơi hlô pơtruh hăng lu anom bruă jăng jai anai, ƀơi hơdôm kual hơmâo klin kơtang, djru bruă krăp lăng, pơgang klin kjăp hloh./.