Ơi Nguyễn Văn Việt, Khua anom kơčăo bruă, Ding jum ngă hmua hăng pơđĭ kyar ƀon lan lăi pơthâo, găn rơgao 9 blan gơnong bruă ngă hmua dưi pơđĭ kyar lu hloh amăng djop mơta hơmâo: Pla pơjing, rông hlô; đang glai hăng akan hơdang. Hrŏm hăng anun, nua gơnam tam amăng djop gơnong bruă ngă hmua amăng 9 blan ăt đĭ lu hloh, giăm 1,1 klăk klai prăk. Gơnong bruă hơmâo pơhlôm mơnong ƀong huă, anih anom sĭ mơdrô đăo gơnang hloh, sit biă ñu lĕ amăng blan 9, sĭ mơdrô kyâo pơtâo pot glăi đĭ tui, sĭ akan hơdang hrŏ trun ƀiă đôč.

“Kơ bruă pơđĭ kyar anih anom sĭ mơdrô đăo gơnang hloh. Blan 9, sĭ mơdrô đĭ 22% amăng 3 mơta gơnam đang hmua phun. Truh ră anai rơnoh sĭ mơdrô pơ tač rơngiao gơnam đang hmua, kyâo pơtâo, akan hơdang dưm dưm 38,48 klai đôlar Mi, amăng 3 blan dŏ glăi him lăng rĭm thun amra sĭ mơdrô giăm 5 klai đôlar Mi, ƀing gơmơi amra dưi sĭ mơdrô giăm 54 klai đôlar Mi”.

Bơdjơ̆ nao tal hơduah ĕp tal 4 mơng Jơnum min kual Mi kô̆ (EC) amăng blan 10 thun anai kơ bruă pơgăn hyu mă ča čot, ƀu lăi pơthâo hăng ƀu djơ̆ tơlơi pơkă (IUU), ơi Trần Đình Luân, Khua anom bruă wai lăng mă akan hơdang brơi thâo, amăng hrơi blan laih rơgao, bruă pel ĕp, krăo lăng hơmâo pơtrut, hrŏm hăng anun lĕ bruă ngă tui hơdôm tơlơi pơkă amăng tơlơi phiăn hơmâo khut khăt pok pơhai. Samơ̆, gun găn prong hloh ră anai mơng IUU, anun lĕ song nan ngă soh lơm hyu mă akan hơdang amăng kual ia rơsĭ arăng, anai lĕ tơlơi akŏ phun ba truh kơ bruă amra lui hĭ tơlơi bơtơhmal mơng EC hăng gơnong bruă akan hơdang mơng Việt Nam hă ƀŭ:

“Tơlơi gun găn lĕ bruă phak aka ƀu pơhlôm ha amăng plĕ kơplah wah hơdôm boh ƀon lan. Sit biă ñu hơmâo hơdôm boh ƀon lan bruă phak ba glăi tŭ yua, ngă tui hơdôm jơlan gah klă biă mă samơ̆ ăt dŏ mơn ƀơi hơdôm boh ƀon lan aka ƀu ngă khut khăt. Hrŏm hăng anun, bruă čih glăi bruă wai lăng ƀattô mut nao rai đĭ tui samơ̆ aka ƀu truh 100%. Kơ bruă anai amra tŏ ngă tui hơdôm tơlơi pơkă mơng tơlơi phiăn; mơng wai lăng ƀattô mut nao rai kiăng dưm truă măi kiăo tui lăng lơm tơbiă hyu mă akan hơdang hăng ba glăi akan hơdang pơ tơdrun”.

Tui Kơ-iăng khua ding jum ngă hmua hăng pơđĭ kyar ƀon lan Phùng Đức Tiến, ƀơi anăp kơ hơdôm tơlơi tơnap tap, tơlơi lông, Ding jum ngă hmua hăng pơđĭ kyar ƀon lan tŏ ngă tui tŭ yua bruă pơplih phun pla, hlô rông, pok phư hơdôm anŏ pơtrut pơđĭ kyar amăng bơwih ƀong, pơkra pơjing hăng blơi pơhrui gơnam đang hmua. Thun 2023, gơnong bruă ngă hmua amra dưi ngă pơgiong, tŏ tui lĕ gong phun pơtrut tơlơi bơwih ƀong huă. Kiăng dưi ngă tui hơnong pơkă ba tơbiă, Ding jum pơsit 10 hơdră bruă akŏ phun, amăng anun pơtrut bruă pơsur sĭ mơdrô kiăng dưi đĭ tui pơhrui hăng sĭ mơdrô pơ tač rơngiao:

“Ƀing ta đing nao hơdôm tơlơi gal mơng anih anom sĭ mơdrô hăng gơnam tam, 2 mơta anai kiăng nao hrŏm hluai tui anih anom pơphun bơwih ƀong hăng hơmâo gơnam pioh pơkra pơjing. Yua anun yơh hơdôm anih anom sĭ mơdrô hơmâo hơnong pơkă hăng ƀing gơmơi hơmâo ƀơƀrư̆ pơmut nao, ƀing gơmơi amra pơtrut kơtang hăng đăo gơnang nao kjăp tui tơlơi pơkă lĕ 54 klai truh 55 klai đôlar amăng thun anai mơ̆ Kơnuk kơna, Khua dêh čar jao brơi gơnong bruă ngă hmua amra pơgiong hĭ mơtăm”.

Ăt amăng mông jơnum hăng ƀing čih tơlơi pơhing, yă Nguyễn Thị Thu Hương, Kơ-iăng khua anom bruă wai pơgang phun pla brơi thâo, hăng 74 mrô kual pla pơjing hăng 40 anih anom dưm amăng kơthung arăng pơhrui glăi lĕ yua gah Việt Nam gơgrong ngă tui. Tơdah hơdôm boh dêh čar blơi mut pơhrui glăi amra ngă tơnap tap amăng bruă pơsir hĭ, bơbeč nao kơtang bruă sĭ mơdrô gơnam đang hmua./.