Truh ră anai, klin pơtah čroh ƀơi un ƀu ƀơi hơdôm hơpluh să, phường amăng tơring čar Dak Lak, khŏm pơrai hĭ rơbêh 1.000 drơi un amăng giăm 100 boh sang anŏ rông un. Yă Đặng Thị Thủy, Kơ-iăng Khua gơnong bruă ngă hmua hăng ayuh hyiăng lŏn mơnai tơring čar Dak Lak brơi thâo, bruă pơgang klin hơmâo pơtrut kơtang ƀu djơ̆ kơnong kiăng pơgang brơi gơnong bruă rông hlô, pơhlôm mơnong ƀong hơdjă đôč ôh ăt pơgôp hơkrŭ glăi bruă blơi yua mơnong un:

“Anai lĕ tơlơi akŏ phun djru brơi mơnuih ƀôn sang hơđong amăng rông hlô, kah hăng pơhlôm lơm gơnam ba sĭ mơdrô mơng hơdôm anih čuh hơtă. Ră anai, ƀing gơmơi kơtưn amăng bruă pơgang gơnam ƀong hơdjă, kiăng pơhlôm mơnong lơm sĭ brơi mơnuih blơi yua kiăng hơdjă, djơ̆ tơlơi kiăng. Anai lĕ tơlơi ngă klă, ngă kơ mơnuih blơi yua hơđong pran jua”.

Hrŏm hăng bruă wai lăng bruă sĭ mơdrô mơng anom bruă wai lăng hlô rông, pơgang klin ƀơi hơdôm anih čuh hơtă ăt ngă tui khut khăt, tui tơlơi krăo lăng kjăp. Ơi Phạm Quốc Thương-Pô sang čuh hơtă un ƀơi plơi Tân Hiệp, phường Tân An, tơring čar Dak Lak brơi thâo, kiăng pơgôp amăng bruă pơgang klin pơtah čroh ƀơi un, sang ñu đing nao ƀiă dong kơ bruă blơi pơhrui un.

“Abih bang un ba rai pơ anai lêng kơ wai lăng tong ten. Un blơi mơng hơdôm drông war lêng kơ hơmâo hră pơ-ar čih tong ten, ƀu djơ̆ un blơi pơhrui ča čot ôh, yua anun hơđong pran jua pơhlôm brơi un sĭ mơdrô brơi mơnuih blơi yua, djơ̆ hăng hơnong pơkă kjăp phik mơng ƀing wai lăng hlô rông, yua anun sang anŏ gơñu pơhlôm djơ̆ hơnong pơkă”.

Klin pơtah čroh ƀơi un hơđuh đĭ amăng lu ƀon lan amăng tơring čar Gia Lai. Ngă glêh tơnap brơi mơnuih rông hlô, klin ăt ngă bơdjơ̆ nao kơtang kơ bruă sĭ mơdrô mơng ƀing hyu sĭ mlia yua mơnuih ƀôn sang bơngôt ƀu gưt blơi ƀông mơnong yua hŭi un ƀă klin.

Ơi Huỳnh Ngọc Diệp, Khua anom bruă wai lăng hlô rông tơring čar Gia Lai brơi thâo, anom bruă hơmâo hăng glăk gum hrŏm kjăp hăng djop ƀon lan kiăng ngă tui hơdôm hơdră pơgang klin kman kjăp hloh. Laih dong, anom bruă bơdjơ̆ nao ăt kơtưn pel ĕp, wai lăng kjăp hơdôm anih čuh hơtă un hăng sĭ mơdrô.

“Tui hơduah ĕp  un čuh hơtă ƀơi hơdôm anih čuh hơtă pơƀut amăng ƀon lan, ƀuh hrŏ trun pơhmu hăng blan hlâo. Gơnong bruă ăt lêng kơ pơtô pơblang hăng pơhŭi hlâo neh met wa thâo klin pơtah čroh ƀơi un huăi lar hyu amăng ană mơnuih ôh, yua anun neh met wa hơđong pran jua blơi yua, ƀing ta nao ruah mơnong ƀơi hơdôm sang sĭ mơdrô hmư̆ hing, anih wai lăng anom bruă wai lăng hlô mơnong, anun pơhlôm hơdjă”.

Tui lăi pơthâo mơng Ding jum ngă hmua hăng ayuh hyiăng lŏn mơnai, ră anai đơ đam dêh čar hơmâo giăm ha rơbâo anih amăng 34 boh tơring čar, ƀôn prong hơmâo klin. Rơbêh 330.000 drơi un hơmâo pơrai hĭ. Ƀơi anăp kơ bruă klin pơtah čroh ƀơi un glăk hơđuh đĭ kơtang amăng đơ đam dêh čar Kơ-iăng Khua dêh čar ơi Trần Hồng Hà phrâo mă bruă hăng Ding jum ngă hmua hăng ayuh hyiăng lŏn mơnai, djop ding jum, gơnong bruă bơdjơ̆ nao kơ tơlơi sit nik hăng hơdră bruă lăp djơ̆, tơlơi akŏ phun amăng pơgang klin, pơhlôm brơi mơnong un sĭ mơdrô amăng hơdôm blan rơnuč thun 2025. Kơ-iăng Khua dêh čar ơi Trần Hồng Hà git gai Ding jum ngă hmua hăng ayuh hyiăng lŏn mơnai ječ ameč pel ĕp glăi djop tơlơi pơkă ră anai amăng pơgang klin kman, amăng anun đing nao pơkă tơlơi gơgrong amăng mă drah, hơnong pơkă anŏ kơtang, tơlơi dưi lăi pơthâo klin brơi rĭm gưl (să, tơring čar, gơnong glông), rơkâo Kơnuk kơna ba tơbiă hră pơ-ar tui hră klah čun kiăng pơplih pơkra, pơhrua hơdră bruă, tơlơi pơkă lăp djơ̆ hăng hơbô̆ bruă gong gai 2 gưl.