Đơ đam dêh čar ră anai hơmâo 2 kual pla sâm hơmâo nua anun lĕ sâm Ngọc Linh pla ƀơi hơdôm boh tơring čar: Quảng Nam, Kon Tum hăng kual pla sâm Lai Châu ƀơi tơring čar Lai Châu. Amăng anun, sâm Ngọc Linh hơmâo ia saponin lu hloh pơhmu hăng hơdôm djuai sâm hmư̆ hing amăng rŏng lŏn tơnah … Ƀing khua mua brơi thâo, bruă blơi mut sâm lu hloh, djuai sâm pơanăn mơng Việt Nam amăng hrơi blan laih rơgao hơmâo ngă hăng glăk bơbeč sat nao kơ mơnuih pla sâm amăng lŏn ia hăng anăn sâm mơng Việt Nam…

Ƀơi anih anom sĭ mơdrô ră anai, nua sâm Ngọc Linh djuai phun mrô 1 truh rơbêh 300 klăk prăk sa kĭ; sâm Lai Châu ăt hơmâo nua rơbêh 120 klăk prăk sa kĭ. Sit biă ñu, hơdôm anom bruă bơdjơ̆ nao hơmâo lu wŏt ĕp ƀuh bruă blơi mut ča čot mơng dêh čar Khač glăk pơ Việt Nam, pơluk hrŏm pơanăn mă sâm Ngọc Linh, sâm Lai Châu sĭ hăng nua rơgêh đôč pơhmu hăng djuai phun hơdôm pluh wŏt. Ƀing khua mua brơi thâo, kiăng pơsir hĭ bruă ngă soh hăng wai lăng kjăp djuai sâm phun hăng kơtưn amăng pơtô pơblang, lăi pơthâo brơi mơnuih ƀon sang kiăng pơhlôm mă yua sâm Việt Nam.