Dŏng ƀơi anăp bah amăng sang lăng nao pơ̆ hnoh ia ataih năng ai ñu hơdôm yak tơkai, amai H’Uốt Niê, ƀơi ƀuôn Kla, să Krông Ƀuk, tơring glông Krông Pač bơngot biă kơ mơnuih amăng sang anô̆ lom hnoh ia anun dơlăm đơi mơ̆ kơnong kơ pơkra mă hơdôm pơga ber bĕ dơ̆ akô̆ tơ-ŭt. Mơnuih tha, čơđai muai, tơdah ƀu bưng lê̆ trun ƀơi hnoh ia dơlăm kah hăng ia bơmun klơi anai hă huĭ rơhyưt biă, ngă hơdôm sang anô̆ mơnuih ƀôn sang dô̆ hơdip mơda jum dar anun bơngot amăng pran jua:

  “Huĭ rơhyưt kơ mơnuih ƀôn sang, biă ñu čơđai muai, hmâo mơnuih rơbuh đih jôh tơkai tơngan laih lah. Huĭ rơhyưt biă samơ̆ ƀu thâo ngă hiưm hơpă ôh, gơñu ngă tui anun ta ăt dô̆ lăng đôč baih lah. Čang rơmang amra pơkra glăi, kiăng mơnuih ƀôn sang hơdip mơda hơđong, bơ̆ sang anô̆ kâo dô̆ hmâo mơnuih tha rơma, čơđai muai dong, ƀu hơđong pran jua ôh lah”.

Ơi Grik Mlô, Khua git gai Ping gah buôn Kla, să Krông Ƀuk, tơring glông Krông Pač brơi thâo, dong mơ̆ng hrơi pok pơhai tuh pơplai pơkra hnoh ia Đ3 găn plơi, neh wa ƀu tŭ ư laih hăng hơdră ngă mơ̆ng gong gai tơring glông hăng să. Neh wa na nao gum pơhiăp lăi nao tơlơi ngă khưi khai ăt kah hăng hơdôm tơlơi akă gal, huĭ rơhyưt mơ̆ng ring bruă anai truh hơdôm gưl gong gai, samơ̆ truh ră anai ăt akă dưi pơsir mơn:

  “Mơ̆ng hrơi pơkra giong hnoh ia anai ƀu dưi mă yua ôh. Kơnuk kơna tuh pơplai lĕ prăk kak rơngiă, hnoh ia ƀu dưi mă yua ôh, tui anun ngă rơngiă đôč đač ngăn drăp kơnuk kơna. Rơngiă prăk đôč, laih anun bơdjơ̆ nao neh wa mơnuih ƀôn sang, yua kơ lŏn tơhlom tơhroh na nao, sit truh hmâo hơjan lĕ tơhroh tơhlom trun yơh. Mơnuih ƀôn sang jum dar lĕ huĭ biă. Jơnum plơi pla, bưp mơnuih ƀôn lan neh wa gum pơhiăp na nao mơ̆ng anun truh kơ ră anai”.

Ơi Nguyễn Tiến Văn, Kơ-iăng Khua Jơnum min mơnuih ƀôn sang să Krông Ƀuk, tơring glông Krông Pač brơi thâo, hnoh ia Đ3 dưi pơkra giong thun 2015, samơ̆ kơnong kơ mă yua hmâo sa thun lĕ lui yơh. Bôh than ba truh lĕ, yua kơ hnoh ia anai than ngan ñu, samơ̆ pung kơ pơkra dlông hloh kơ hnoh phun hăng ber hloh hmua ia. Tui hăng ơi Văn, hnoh ia anai ră anai glut hlŭ lom hĭ, ƀu dưi mă yua dong tah:

  “Hnoh ia Đ3 anai pơphun mă yua amăng thun 2016, mă yua hmâo năng ai ñu sa thun lĕ hnoh ia anai ƀu dưi mă yua dong tah. Ră anai kơdol hĭ laih, glut hlŭ lom hĭ laih. Tơring glông ăt hyu hơduah ĕp lăng mơn hăng hmâo jơlan gah pơkra ming anô̆ răm samơ̆ ƀu ba glăi bôh tŭ yua ôh. Ră anai tơdah pơkra glăi thơ prăk mă yua lu biă”.

Hnoh ia Đ3 ataih rơbêh kơ 1,4km, dưi hmâo Jơnum min mơnuih ƀôn sang tơring glông Krông Pač pơsit tuh pơplai thun 2013 lĕ, sa amăng hơdôm črăn bruă mơng Rơwang bruă hnoh ia Krông Ƀuk Hạ. Tơdơi sa dua wot pơplih pơkra ring bruă hmâo abih bang rơnoh tuh pơplai giăm truh 15 klai prăk. Tơlơi lăp lăi lĕ, hlâo kơ tơring glông Krông Pač pơkra ring bruă anai, Grŭp wai lăng tuh pơplai hăng pơkra hnoh ia 8 gah Ding jum đang hmua hăng pơđĭ kyar ƀôn lan hmâo laih hră pơ-ar mrô 513/BLQ-TĐ rơkâo pơdơi tuh pơplai yua kơ prăk tuh pơplai lu (đĭ truh 180 klăk prăk sa ektar) laih anun ƀu ba glăi bôh tơhnal dong.

Hmâo mă hră pơtă, Jơnum min mơnuih ƀôn sang tơring glông Krông Pač ăt pơdah mơ̆n “Pơsit pran” hăng sa hră pơ-ar lăi glăi amăng akô̆ blan 10/2023. Amăng hră anai, tơring glông lăi lĕ bruă tuh pơplai kiăng biă. Tuh pơplai kơ hnoh ia pioh pơđoh kơ đang hmua hăng mă yua amra ba glăi bôh tŭ hloh hăng hmâo tơhnal sui thun, amăng ƀrư̆ hơđong tơlơi hơdip mơda mơnuih ƀôn sang amăng kual, djru pơtrut pơđĭ kyar bơwih ƀong, mơnuih mơnam ƀơi kual.

  Jai lăp đing nao hloh, khă hnoh ia Đ3 ƀu dưi yua laih, thun 2019 Jơnum min mơnuih ƀôn sang tơring glông Krông Pač tuh pơplai dong 850 klăk prăk pioh pơkra glăi. Bôh tơhnal, blan 8/2023, Anom pel ĕp kơđi tơlơi tơring čar Dak Lak pel ĕp hăng klah čun, ring bruă pơkra kơjăp hnoh ia hăng ro bôh pơtâo hmâo nua 850 klăk prăk hlut trun, hroh trun amăng hlung hnoh ia.

Ơi Trần Hồng Tiến, Khua git gai Ping gah tơring glông, Khua Khul pơ ala mơnuih ƀôn sang tơring glông Krông Pač brơi thâo, hluai tui tơlơi klah čun mơ̆ng Anom pel ĕp tơlơi hmâo mơ̆ng tơring čar, Ping gah tơring glông, Khul pơ ala mơnuih ƀôn sang glăk rơkâo Jơnum min mơnuih ƀôn sang tơring glông lăi pơthâo glăi hơdôm bôh yôm bơdjơ̆ nao hnoh ia Đ3 kiăng hmâo jơlan gah git gai pơsir. Bĕ tơlơi ring bruă ƀu dưi mă yua laih ngă rơngiă lui đôč đač dong prăk tuh pơplai pơkra glăi:

 “Ping gah tơring glông, Khul pơ ala mơnuih ƀôn sang ăt hmâo laih hơdôm grŭp nao ĕp lăng, thâo tơlơi. Tơdơi kơ ĕp lăng giong lĕ ăt hmâo hră pơ-ar rơkâo mơ̆n Jơnum min mơnuih ƀôn sang tơring glông lăi pơthâo glăi abih bang tơlơi hmâo ƀơi hnoh ia Đ3  anai. Jơnum min mơnuih ƀôn sang ăt lăi pơthâo glăi mơn hăng hmâo lăi pơthâo nao rai hăng Gơnong bruă đang hmua hăng pơđĭ kyar ƀôn lan hrŏm hăng hơdôm bôh ƀirô bơdjơ̆ nao, tơring čar hmâo nao ĕp lăng laih. Ñu gun lu biă hăng hơdôm tal jơnum mơnuih ƀôn sang, hăng bruă mă Khua khul ăt hmâo rơkâo đĭ laih mơn, rơkâo hăng tơring čar khom pơsit djop tum. Bĕ bruă ñu tui anun laih mơ̆, ră anai pơkra glăi dong ƀu djơ̆ tui tơlơi pơkă ôh, ñu glăi răm rai dong”./.