Amăng hơdôm hrơi anai, nao pơ hơdôm să kual ataih, asuek să Dă Sar, Dă Nhim, tơring glông Lạc Dương, tơring čar Lâm Đồng amra lăng ƀơi anăp đang pla atiso mơtah mơda rôk đang hmua hăng kơčong čư̆ mơnuih djuai ania ƀiă. Hơdôm boh sang anŏ ƀơi anai dưi pơklaih mơng ƀun rin yua kơ pla phun jrao anai. Amai Jrang K’Sáu, dŏ amăng ƀut plơi 6, să Dă Sar, tơring glông Lạc Dương brơi thâo, hlâo adih kơnong kơ pla phun kơphê hăng añăm tam ƀiă hrơi đôč, pơhrui glăi ƀu hơđong. Hơmâo tơlơi gum djru hăng pơtrut pơsur mơng gong gai ƀon lan, sang anŏ ñu hơdai nao pla lông lăng. Hơmâo tơlơi djru brơi pơjeh phun pla hiam, kmơk pruai hăng boh thâo pla pơjing, tơdơi kơ 4 blan dong mơng hrơi pla, ñu dưi pơhrui glăi rơbêh 10 klăk prăk. Amai Liêng Jrang K’Sáu brơi thâo:

“Bruă pla pơjing yua kmơk pơluk hăng djah djâo, eh rơmô, mơ̆ ƀu yua kmơk akan pruai brơi phun atiso. Anai lĕ phun pla arăng đŏi mă hla kiăng kơ tuk mơñum hăng ngă jrao yua anun arăng ƀu pruih ia jrao pơgang. Kông ti hơmâo čih ană phun jrao yua anun kiăng pla pơjing brơi kơ djơ̆”.

Amăng hrơi blan laih rơgao, lu neh met wa djuai ania ƀiă ƀơi să Dă Sar, Dă Nhim, tơring glông Lạc Dương, tơring čar Lâm Đồng dưi pơklaih mơng ƀun rin yua pla phun atiso, pơlir hơbit hăng hơdôm anom bơwih ƀong sĭ mơdrô. Neh met wa ngă tui bruă pơplih hĭ phun kơphê tha, hlăt mŏt pơčrăm hơdai nao pla atiso. Tơdơi kơ 4 blan, phun atiso dưi đŏi hla laih hăng hơmâo kông ti blơi pơhrui abih mơtăm. Rĭm wŏt hrơi tơjuh, ƀing yua boh thâo phrâo mơng anom bơwih ƀong sĭ mơdrô lêng kơ nao tơl đang hmua hrŏm hăng neh met wa pel ĕp phun pla, črâo brơi boh thâo wai lăng. Laih dong, neh met wa hơmâo djru brơi kmơk, boh thâo pla pơjing hăng pơhrui. Truh ră anai, đơ đam tơring glông Lạc Dương pơđĭ kyar 3 anih pơlir hơbit pla pơjing hăng pơhrui atiso. Ơi Sử Thanh Hoài, Khua git gai Ping gah tơring glông Lạc Dương brơi thâo, hơdôm hơbô̆ bruă amăng tơring glông lêng kơ anăp nao hơdră kiăng neh met wa mut hrŏm pla pơjing, pơlir hơbit hăng anom bơwih ƀong sĭ mơdrô blơi pơhrui gơnam tam:

“Ră anai ƀing gơmơi sem lăng giăm 1.000 met karê amăng ha thun, duh hĭ prăk tuh pơ alin brơi neh met wa dŏ glăi kmlai mơng 25 truh pơ 30 klăk prăk. Anai lĕ phun pla lăp djơ̆ hăng tơlơi gal mơng ayuh hyiăng lŏn mơnai, bruă pla pơjing kơ neh met wa ră anai, ƀing gơmơi glăk pơčrông sai lu biă dong. Năng ai ñu dưi pơsir hĭ abih tơlơi rơkâo mơng mơnuih ƀon sang. Anom bơwih ƀong sĭ mơdrô wai lăng bruă pla pơjing hăng blơi pơhrui gơnam tam. Anai ăt lĕ jơlan yak nao mơ̆ tơring glông Lạc Dương hơmâo mơ-it nao kiăng pơhlôm brơi klă hloh tơlơi hơdip brơi mơnuih ƀon sang hăng mơnuih blơi pơhrui”.

Hrŏm hăng brưa ngă tui hơdră pla pơjing tui tơlơi pơkă amăng bruă pơlir hơbit bơwih ƀong jai hrơi pok prong kiăng pơhlôm brơi hơđong bruă sĭ mơdrô brơi mơnuih pla kah hăng sĭ mơdrô mơng hơdôm anom bruă pơkra pơjing ăt yôm phăn biă mă. Ơi Hoàng Sỹ Bích, Khua gơnong bruă ngă hmua hăng pơđĭ kyar ƀon lan tơring čar Lâm Đồng brơi thâo, hơdră bruă akŏ phun mơng anai truh thun 2030 lĕ đing nao pơlir pla pơjing hrŏm hăng blơi pơhrui atiso lăi phara hăng djop phun jrao ba glăi tơlơi dưi amăng kual lăi hrŏm. Đing nao mă yua boh thâo phrâo amăng kơsem min ruah pơdjuai pơjeh hăng boh thâo pla pơjing, wai lăng brơi pơhrui glăi hmâo hmăi, klă dong amăng pla pơjing, hơdră bruă, kiăng pơjing hơdôm phun jrao dưi bơkơtưn amăng sĭ mơdrô. Laih dong, pơtrut kơtang mă yua boh thâo pôr pơhing amăng bruă wai lăng, wai lăng mơng bruă pla truh pơkra pơjing, mă yua hơdôm phun kyâo jrao; djru čih anăn apăn sĭ mơdrô, mrô kual pla pơjing, pơkra pơjing hăng blơi pơhrui gơnam phun kyâo jrao, pơhlôm djơ̆ tơlơi rơkâo tui hơnong pơkă, tơlơi pơkă mơng dêh čar, jar kmar amăng anih anom blơi pơhrui hăng sĭ mơdrô pơ tač rơngiao.

“Rơngiao kơ bruă lăi pơthâo anai, laih dong wai lăng, mă yua, bruă pok pơhai wai lăng gơnam hiam hơdjă kah hăng hơmâo tơlơi đing nao biă mă. Yua anun ƀing gơmơi ăt hơmâo sa akŏ bruă mơng gơnong bruă ngă hmua hăng pơđĭ kyar ƀon lan kiăng pok pơhai bruă wai lăng gơnam đang hmua hơdjă amăng pơkra pơjing hăng pơđĭ kyar hăng wai lăng anăn apăn sĭ mơdrô”.

Sit biă ñu amăng hơdôm boh ƀon lan brơi ƀuh, rơnoh pơhrui glăi mơng bruă pla phun kyâo jrao lu ƀiă pơhmu hăng hơdôm phun pla pơkŏn. Ƀơi hơdôm boh să, phun atiso ƀu djơ̆ kơnong phun pơklaih mơng ƀun rin, pơhrŏ trun ƀun rin mơ̆ dŏ lu sang anŏ ƀơi Lâm Đồng hơmâo prăk pơhrui lu, dưi hrưn đĭ pơdrong asah./.