Hơdôm blan hăng anai, rơbêh kơ 700 bôh sang anô̆ mơnuih ƀôn sang djuai ania Dao ƀơi plơi Đoàn Kết, să Ia Piơr, tơring glông guai dêh čar Čư̆ Prông khom hơdip hrom hăng ƀâo brŭ čuk mơng 3 blah đang hmua rông un phrâo mă yua. Ayong Hoàng Văn Niên, ƀơi plơi Đoàn Kết brơi thâo, hơdôm mông bơngot yua kơ ƀâo brŭ hloh lĕ mơng mơmot truh kơ mlăm. Neh wa kơnong kơ thâo krư̆ bah amăng sir, gôm adung mơbah, đa gôm wot lom đih pit.

 Ră anai ƀơi să Ia Piơr hmâo 14 rơwang bruă rông hlô hmâo hăng hmâo pơdŏng laih. Să giăm guai lĕ Ia Lâu hmâo 19 rơwang bruă. Ayong Hoàng Văn Niên bơngot kơ tơlơi hơdip mơng sang anô̆ lom abih bang hơdôm rơwang bruă rông hlô mă yua.

“Lom anom bơwih ƀong či mă yua, gơñu ƀuan ƀu hmâo ƀâo brŭ ôh, pơjing bruă mă kơ mơnuih mơnuih ƀôn sang. Samơ̆ ră anai ƀu ƀuh hmâo bruă mă ƀu hmâo, ƀâo brŭ lĕ čuk čăk. Ră anai phrâo hmâo hơdôm blah đang war đôč mă yua, tơdơi anai hmâo hơdôm blah đang war adih dong mă yua thơ, ƀu thâo hơdip hiưm hơpă dong tah?”.

 Mơnuih ƀôn sang brơi thâo, akô̆ blan 4/2023, Jơnum min mơnuih ƀôn sang să Ia Piơr hmâo laih mông mă bruă hăng pô pơ ala kơ 3 rơwang brua rông un pơphun. Hră pơ-ar mă bruă lăi rơđah: Hơdôm anih anom pơsir djah mơng bruă rông un akă giong, samơ̆ hmâo đang war mă yua 3 blan laih, rông hơdôm pluh rơbâo drơi un. Ơi Bùi Văn Phụng – Khua git gai Ping gah să Ia Piơr brơi thâo:

 “Rơkâo gưl dlông, lom hơdôm blah đang war pơkra giong lĕ, pơdŏng grŭp mơnuih hyu pel ĕp, pơsit rơđah, tơdah pơhlôm lĕ brơi mă yua. Ră anai, gưl Ping gah gong gai plơi pla tơnap biă, yua kơ sa lĕ să ƀu juăt hăng bruă anai, dua lĕ să ƀu hmâo tơlơi dưi”.

 Ră anai đơ đam tơring čar Gia Lai hmâo 46 rơwang bruă rông hlô dưi pơsit hơdră pơtrun tuh pơplai, amăng anun hmâo 16 rơwang bruă mă yua. Bruă pơlar hơdôm rơwang bruă rông hlô hmâo pơdah laih lu tơlơi ƀu gal lom pel ep, pel ĕp abih bang amăng rơnuč thun 2022. Kiăo tui anun, kah hăng abih bang hơdôm rơwang bruă kơnong kơ hmâo đang war, kơƀah hơdôm anih anom djru gah tlôn kah hăng pơkra gơnam ƀong, pơkra gơnam tam, ƀudah gơnam mă mơng djah rông hlô. Yua anun, akă pơjing rai lu nua yôm hăng bruă mă kơ mơnuih mă bruă ƀơi plơi pla.

Hrom hăng anun, sa dua rơwang bruă dưi čơkă mă ngă pơhư̆č tuh pơplai, samơ̆ pơdŏng giong ƀu ƀơi anăp rông hlô mơ̆ brơi arăng apah. Lu rơwang bruă mă yua lom đang war akă pơhlôm hơdôm tơlơi pơkă kơ pơgang anih anom dô̆. Biă ñu hmâo anih đa pơkra đang war rông krư̆ hlô mơ̆, ƀu tuh pơplai pơkra anih pơsir djah.

  Hơdôm rơwang bruă ră anai hmâo abih bang rơbêh kơ 43.000 drơi, sĭ hơdôm pluh rơbâo tơn añăm mơnong hăng ia tơsâu rim thun. Khă hnun hai, phrâo gum hơgôp kơ ngăn drăp tơring čar Gia Lai 17 klai prăk đôč, biă ñu lĕ hơdôm prăk apah lŏn hăng hơdôm prăk apah pơkon.

 Kiăng pơsir tơlơi anai, Jơnum min mơnuih ƀôn sang tơring čar Gia Lai hmâo laih hră pơ-ar črâo ba Gơnong bruă kơčăo bruă hăng tuh pơplai gum hrom hăng hơdôm gơnong bruă, anom bruă pơtô brơi dong ƀing tuh pơplai ngă giong hră pơ-ar tui tơlơi pơkă; ngă tui hơdôm tơlơi pơkă kơ pơgang gah anih anom dô̆; hyu pơhrui prăk mă jia hăng sa dua rơwang bruă. Ơi Đinh Hữu Hòa – Kơ-iăng Khua gơgrong bruă Gơnong bruă wai lăng kơčăo bruă hăng tuh pơplai tơring čar Gia Lai brơi thâo:

“Hăng gơnong bruă rông hlô, Gơnong bruă wai lăng kơčăo bruă hăng tuh pơplai pơphô brơi kơ Jơnum min mơnuih ƀôn sang tơring čar kơđiăng amăng bruă ngă pơhư̆č rơwang bruă, kơnong kơ ngă pơhư̆č hơdôm rơwang bruă prong, rông hlô sir nao rai, mă yua hơdră phrâo kiăng pơhlôm anih anom dô̆ hăng hơdôm rơwang bruă nao hrom hăng bruă pơkra hơdôm gơnam mơng rông hlô kiăng pơhlôm hmâo nua; ƀu pơhư̆č hơdôm rơwang bruă anet raih daih, hơdră sô hơđăp”.

 Tơlơi rông hlô ngă hơƀak anih anom dô̆ ƀu djơ̆ kơnong kơ ƀơi tơring čar Gia Lai mơ̆ ñu dô̆ pơphun ƀơi lu anih anom pơkon amăng kual Dăp Kơdư. Kơnong ƀơi tơring glông Čư̆ Jut, tơring čar Dak Nông hmâo 37 bôh đang war rông un hơbit, prong. Amăng anun, lu đang war rông hlô amăng mrô anai ngă hơƀak anih anom dô̆, ngă bơdjơ̆ nao prong truh tơlơi hơdip mơda mơnuih ƀôn sang jum dar. Rơđah biă ñu kah hăng đang war sang anô̆ ơi Lê Văn Hùng, ƀơi plơi Nam Tiến, să Ea Pô, tơring glông Čư̆ Jut hmâo hơdră rông 2.400 drơi un. Lom pơphun bruă, đang war hmâo pơđoh laih ia djah hmâo mrô hloh kơ rơnoh pơkă lăp djơ̆. Yua anun, Jơnum min mơnuih ƀôn sang tơring čar Dak Nong hmâo ba tơbiă tơlơi pơsit phak tơhmal đang war anun hăng mrô prăk 347 klăk 500 rơbâo prăk. Rơngiao kơ bruă phak tơhmal prăk, Jơnum min mơnuih ƀôn sang tơring čar dô̆ ngă ơi Hùng khom pơdơi bruă pơkra hơdôm ring bruă, pơdơi bruă mă mơng đang war hăng rit đuăi nao pơ̆ anih lăp djơ̆ hăng rơwang pơkă./.