Tom brơi (lơ 11/9), ƀơi plơi prong Buôn Ma Thuột, Dak Lăk, Hră pơhing Bruă hmua Việt Nam - anom apăn bruă Grup git gai pơphun Jơnum bơkơtuai pơtruh bruă ngă hmua 970 (Ding jum bruă hmua hăng pơđĭ kyar ƀôn lan) ngă hrŏm hăng Gơnong bruă hmua hăng pơđĭ kyar ƀôn lan tơring čar Dak Lăk, Khul pla sầu riêng Dak Lăk, Anom bruă pơgang phun pla, Anom bruă pơtŏng lăng anŏ klă, pơkra hăng pơđĭ kyar anih sĭ mơdrô pơphun jơnum Bơkơtuai “Pơtŏng glăi bruă pơtruh pơkra gơnam, blơi yua, ba sĭ sầu riêng pơ tač rơngiao thun 2023 hăng Hơdră pơđĭ kyar tŭ yua, hơđong kơjăp sầu riêng Việt Nam”. Pơhiăp ƀơi mông jơnum, Khua ding jum bruă hmua hăng pơđĭ kyar ƀôn lan ơi Lê Minh Hoan brơi thâo, dơ̆ng mơ̆ng hrơi hră pơtrun pơčrang lăng sầu riêng hơmâo kĭ, pok jơlan ba sĭ sầu riêng sit nik, ding jum pơmin hlâo laih kơ tơlơi tơnap ră anai mơ̆ng bruă ngă sầu riêng.

Kiăng dưi găn rơgao tơnap tap, wơ̆t pô pơkra (mơnuih ngă hmua) hăng pô blơi (anom bơwih ƀong) ƀu dưi kơnong kơ lăng nao tơlơi klă mơ̆ng pô đôč ôh mơ̆ kiăng djru ngă klă brơi bruă pơkra sầu riêng pơ anăp anai. Anom bruă wai lăng kơnuk kơna, gong gai, anom bơwih ƀong khŏm djru ngă mơ̆ng blung a mơtăm, hrŏm hăng mơnuih ngă hmua kiăng mơnuih ƀôn sang thâo djŏp mơta tơlơi pơhing či pơplih bruă pơkra gơnam.