Ƀing khua hơmâo pơtô brơi hơdră akŏ pơjing, pơsit brơi, wai lăng mrô kual pla, anih anung gơnam hăng gơnam tam mơng hmua; lăi pơthâo tơlơi pơkă amăng Tơlơi pơtrun kiăng Pel ĕp sem lăng klin kman ƀơi phun pla hăng phun sầu riêng, hơbơi čên, pơtơi mơng Việt Nam ba sĭ pơ dêh čar Khač. Hrŏm hăng anun, ƀing khua hơmâo hrăm hơdră mă yua kmơk pruai hơdjă rơnuk rơnua, tŭ yua ƀơi phun sầu riêng; pơtô brơi bruă wai lăng arong aroač hlăt kman ngă răm phun pla ƀơi kual pla, mă yua ia jrao pơgang phun pla rơnuk rơnua, tŭ yua.

Dak Lăk hơmâo lu gơnam mơng hmua nua pơmă ba sĭ pơ dêh čar tač rơngiao. Biă ñu, tơdơi kơ hơmâo Ding jum ngă hmua hăng pơđĭ kyar plơi pla pơpha anih wai lăng hăng akŏ pơjing mrô kual pla, lŏn pla sầu riêng hơmâo hră pơsit dưi ba sĭ pơ dêh čar tač rơngiao laih anun hơmâo hră pơ-ar rơkâo mă mrô kual pla jai lu hloh.