Plơi Đoàn Kết, să Ayun Hạ, tơring glông Phú Thiện lĕ anih bơbeč nao kơtang hloh yua không phang kơsing pah. Hơmâo laih rơbêh 80 ektar hmua pơdai khŏt ia đang lŏn, him lăng amra rơngiă abih. Ƀơi anăp tơlơi sit nik anai, Jơnum min mơnuih ƀôn sang să Ayun Hạ hơmâo akŏ pơjing grup djru ječ, hrŏm hăng mơnuih ƀôn sang ĕp mă kuăi pok phư čroh Ia Ake hăng mă yua 21 ia bơmun kiăng ƀô̆p pruih brơi phun pla. Jơnum min mơnuih ƀôn sang tơring glông Phú Thiện ăt hơmâo hră pơ-ar mơ-it nao Jơnum min mơnuih ƀôn sang tơring čar Gia Lai hăng djop gơnong bruă, anom bruă bơdjơ̆ nao rơkâo djru brơi prăk kak brơi ƀon lan pioh bong glăi không phang khŏt ia, laih dong rơkâo sui pơ anăp kiăng hơmâo anih ƀô̆p ia brơi hmua pơdai ƀơi plơi Đoàn Kết. Ơi Nguyễn Anh Tuấn, Kơ-iăng khua Jơnum min mơnuih ƀôn sang tơring glông Phú Thiện brơi thâo:

“Amăng bơyan không phang khŏt ia, tơring glông hơmâo git gai hơdôm anom bruă bơdjơ̆ nao pel ĕp glăi đơ đam đang hmua amra răm rai yua khŏt ia hăng črâo brơi mơnuih ƀôn sang ƀô̆p hơdôm čroh ia glăk hơmâo kiăng pruih brơi phun pla glăk kơƀah ia. Git gai hơdôm boh ƀon lan pel ĕp, jŭ yap glăi hơdôm anŏ răm rai mơng anun hơmâo hơdră djru brơi mơnuih ƀôn sang hơmâo đang hmua răm rai yua khŏt ia”.

Không phang ăt ngă hơdôm rơbâo boh sang anŏ dŏ hơdip amăng să giăm guai Ia Nan, tơring glông Đức Cơ, tơring čar Gia Lai ƀu hơmâo ia yua. Ơi Nguyễn Thanh Kiên, dŏ amăng plơi Đức Hưng, să Ia Nan brơi thâo, neh met wa khŏm nao ataih kiăng pơgiăng glăi ia yua, hyu blơi ia pơkŏn nua pơmă.

“Kơ ia yua rĭm hrơi amăng sang anŏ lăi phara hăng abih bang mơnuih amăng plơi pla hnun mơn glăk tơnap tap biă mă, truh bơyan phang jing 3 blan ƀu hơmâo ia yua. Ia nao sŏ ba glăi pioh tơnă hơbai đôč mơ̆ ăt yua nao yua rai, ha hrơi yua giăm 3 kơthung ia”.

Ƀơi anăp kơ tơlơi tơnap yua không phang, ơi Nguyễn Chúc, Kơ-iăng Khua anom bruă wai lăng dơnao pơkŏng ia Gia Lai lăi pơthâo hơdôm hơdră pơsir ƀơi ƀon lan.

“Kiăng pơhlôm ia yua amăng bơyan phang hăng kơƀah ia pruih brơi phun pla, mơng tơring čar truh pơ ƀôn lan ăt pok pơhai hơdôm hơdră bruă kiăng ngă tui pơhlôm brơi ia yua lăp djơ̆ hăng tơlơi sit nik kiăng plai ƀiă phun pla răm rai yua kơƀah ia, đing nao hơdôm phun pla pơhrui glăi lu hloh kiăng aset ƀiă anŏ răm rai, ngă tui hơdră pruih ia pơplih, pơhlôm rơ-ơ̆ brơi amăng lŏn hơdôm phun pla truh bơyan pơhrui. Mă yua djop ia krông čroh hnoh kiăng pruih brơi phun pla hăng mă yua klă hloh hơdôm boh dơnao pơkŏng ia kiăng pơhlôm brơi ia yua kơ neh met wa ngă hmua”.

Ơi Lưu Trung Nghĩa, Khua gơnong bruă ngă hmua hăng pơđĭ kyar ƀôn lan tơring čar Gia Lai brơi thâo, ƀơi anăp kơ tơlơi tơnap tap yua kơƀah ia lu anih, anom bruă amra rơkâo hơdôm drai ia apui lơtrik pơđoh trun ia kiăng pruih brơi phun pla.

“Amăng blan 4 anai lĕ blan không phang kơtang hloh, ƀing gơmơi gum hrŏm hăng Kông ti apui lơtrik 2 hăng kông ti drai ia apui lơtrik An Khê Ka Nak pơđoh trun ia pơ bah ia krông Ba kiăng hơdôm boh ƀon lan hơmâo ia pruih brơi phun pla. Ƀing gơmơi ăt rơkâo Ding jum ngă hmua hăng pơđĭ kyar ƀôn lan, Jơnum min mơnuih ƀôn sang tơring čar hluai tui tơlơi sit nil tuh pơ alin man pơkra glông pơđoh hyu ia mơng hơdôm boh dơnao pơkŏng ia, yua hơdôm king ia mơng hơdôm boh dơnao aka dưi mă yua klă. Tŏ tui lĕ pơhrua prăk tuh pơ alin man pơkra kiăng pơgiong hơdôm čroh ia kiăng pơhlôm brơi ia rô hyu gap ƀrô, pơkrem, tơlơi anai kah dưi pơsir hĭ bruă kơƀah ia amăng tơring čar hăng pok prong ngă đang hmua”./.