Ƀrô hơdor glăi Hrơi akŏ pơjing tơlơi phiăn Việt Nam lơ 09/11/2024, mơguah lơ 7/11, ƀơi Hà Nội, Khua git gai ping gah ơi Tô Lâm nao čuă hăng git gai mông mă bruă hăng khul khua mua apăn bruă ping gah Ding jum Tơlơi phiăn kơ boh tơhnal git gai, pơčrâo ba ngă tui bruă mă jao kơ Ding jum mơ̆ng akŏ rơwang bruă ping gah truh ră anai hăng anăp či ngă bruă abih rơwang bruă ping gah tal XIII. Ƀơi mông mă bruă, Khua git gai ping gah, ơi Tô Lâm pơ ala kơ khua mua ping gah, kơnuk kơna mơ-it hiăp bơni hơ-ơč mơak klă hloh hăng abih bang khua mua, mơnuih apăn bruă Ding jum Tơlơi phiăn hăng anom bruă gah tơlơi phiăn amăng đơ đam dêh čar.

Kiăng kơ lŏn ia hơđong kơjăp yak nao pơ anăp adih amăng rơnuk hrưn đĭ phrâo, tañ ngă giong tơhnal jơnum ruah khua ping gah pơtrun, Khua git gai ping gah ơi Tô Lâm rơkâo, thun blan pơ anăp adih Ding jum Tơlơi phiăn lăi hrŏm, anom bruă tơlơi phiăn hnun mơ̆n pơtum pơblih bruă mă kơtang hloh, tui hơdră mă bruă, glăm ba, jao ngă, anăp nao pơblih phrâo kơtang amăng bruă čih tơlơi phiăn dêh čar; kiăng pơgang hơđong mơnuih mơnam; pơtrut pơđĭ kyar bơwih ƀong huă mơnuih mơnam; pơhlôm bruă mă bơkơnar mơnuih mơnam; dưi bong glăi hăng anŏ pơblih phrâo pơđĭ kyar rơnuk anai; ngă bruă tơpă hăng amuñ ngă tui; pơtrut abih bang glông bruă wai lăng tơlơi phiăn tong ten hloh, djru kơ bruă man pơdong dêh čar mơnuih mơnam thâo rơgơi, bơkơnar, pơđĭ kyar.