Amăng mông bơkơtuai, hơdôm pluh wot tơlơi gum pơhiăp mơ̆ng mơnuih apăn bruă, mơnuih amăng khul mơnuih ngă đang hmua mơ-ĭt kơ Khua Jơnum min mơnuih ƀôn sang tơring čar Kon Tum đing nao 7 bruă phun, anun lĕ: djru sĭ gơnam ngă rai; djru prăk mă yua; ngă đang hmua; tuh pơplai anom mă yua; hơdră djru gum hăng mơnuih apăn bruă, mơnuih amăng khul mơnuih ngă đang hmua; pơsir hră pơ-ar hăng djru bôh thâo phrâo, pơtô bruă.

Hăng hơdôm tơlơi rơđah, kah hăng: sĭ gơnam mă mơ̆ng đang hmua, băn ao mơñam; nua gơnam ƀong kơ hlô rông, kơmok pruai đĭ lu ƀu gal kơ bruă đang hmua... pô pơ ala kơ hơdôm gơnong bruă, anom bruă mơ̆ng tơring čar Kon Tum hmâo lăi glăi rơđah, hrŏm hăng anun pơtô brơi mơnuih amăng khul ngă juăt hăng hơdră bruă, pơjeh pla, prăk mă yua, hơdră pơtrut ngă đang hmua pơđĭ kyar.

Tui Khua Jơnum min mơnuih ƀôn sang tơring čar Kon Tum Lê Ngọc Tuấn, tơdơi kơ Jơnum bơkơtuai tơring čar amra đing nao ngă tui sa dua ƀut bruă pơsir kiăng pơtlaih tơlơi tơnap, djru mơnuih ngă đang hmua pơtrut pơđĭ kyar bruă đang hmua, plơi pla tañ hăng kơjăp phik./.