Tơkeng rai hăng prong đĭ ƀơi kual plơi pla ngă hơkrŭ Ia Hrung, tơring glông Ia Grai, tơring čar Gia Lai, Ksor Phiếu dô̆ bơnai hăng 2 ƀĕ tơngan soh. Kơnang kơ gir bơwih ƀong huă hăng thâo djă pioh pơkrem lui, anun bruă bơwih ƀong hăng rơkơi bơnai hlăk ai jai hrơi jai đĭ kyar tui ƀơƀrư̆. Ră anai Ksor Phiếu lĕ sa amăng hơdôm bôh sang anô̆ bơwih ƀong đĭ kyar ƀơi plơi hăng giăm truh 2 ektar đang kơphê pla plah nao phun tiu hăng pŭ rơmô 17 drơi, Thun phrâo rơgao, kơphê hmâo nua, sang anô̆ ñu hmâo pơhrui glăi rơbêh kơ 400 klăk prăk.

Lu sang anô̆ amăng plơi hmâo hrăm tui tơlơi găn rơgao pha phun pla sui thun hăng rông hlô mơnong mơ̆ng khua plơi Ksor Phiếu mơ̆ tơlơi hơdip mơda gơñu ăt đĭ kyar tui ƀơƀrư̆ mơn. Ră anai 200 bôh sang anô̆ mơ̆ng plơi, sang hơpă leng kơ hmâo tivi, rơdêh thut. Lu sang anô̆ hmâo pơdŏng sang dô̆ klă hiam. Neh wa amăng plơi hmâo tơlơi hơdip mơda hơđong. Samơ̆ jơlan nao rai amăng plơi akă gêh gal. Thun 2023, Khua plơi Ksor Phiếu hmâo pơmin tơbiă hơdră lĕ kơnang kơ anom ngă adơi ayong mơ̆ng plơi lĕ Sang bruă kơphê Ia Grai hăng hơdôm bôh sang anô̆ bơwih ƀong sĭ mơdrô ƀơi plơi djru prăk mă yua hăng pok pơhai pơdŏng gŏng hrĕ apui pơčrang rơđah ƀơi jơlan nao rai. Kơnang kơ anun, bruă nao rai mơmot mlăm mơ̆ng mơnuih ƀôn sang gêh gal hloh. Ơi Ksor Tí, mơnuih amăng plơi Blo Dung lăi:

“Dong mơ̆ng hrơi ơi Ksor Phiếu dưi ruah ngă Khua git gai grŭp Ping gah plơi ngă rah Khua plơi, ñu hmâo pơphun lu bruă jơnum pioh lăi pơhing kơ neh wa, biă ñu hlăk ai ƀu mơgăt rơdêh hyu mơñum tơpă ƀiêr, pơsur neh wa lŏm lui tơlơi pơdô̆ rơkơi bơnai mơ̆ng muai. Bơ̆ amăng pơđĭ kyar bơwih ƀong, biă ñu pla kơphê hăng ngă hmua ia, ră anai hăng bruă ngă kơphê sa bơyan pơhrui glăi mơ̆ng 5-6 tơn asar krô. Hăng jơlan hơdră ngă bơngač jơlan nao rai amăng plơi, amăng hơdôm hrơi rơgao anom ngă adơi ayong ăt djru hăng dưm truă mơn 5 pil apui pơkĕ hăng pơ-iă yang hrơi pioh pơčrang rơđah jơlan nao rai amăng plơi pla”.

 Na nao rim blan, khua plơi Ksor Phiếu pơphun jơnum neh wa amăng plơi pioh lăi pơthâo nao rai ƀơi anăp hơdôm tơlơi tơnap, tơlơi gun amăng tơlơi hơdip mơda. Amăng hơdôm mông jơnum plơi jê̆ hăng anai, Ksor Phiếu ăt tơpă ară lăi nao bruă sa dua hlăk ai, tơdăm ngek dra muai dô̆ ngă soh đôč Phiăn nao rai ƀơi jơlan glông. Ñu hrŏm hăng Grŭp wai lăng tơlơi hơđong mơ̆ng plơi Blo Dung nao tơl rim sang rơkâo kĭ pơkôl ƀu ngă soh phiăn pơhlôm ƀơi jơlan nao rai. Thiếu tá Vũ Hùng Cường, Khua Kông ang să Ia Hrung pơsit:

“Khul kông ang hăng ƀing khua gơgrong bruă ƀơi plơi pla, biă ñu ơi Ksor Phiếu ngă klă biă amăng bruă anai, rơkâo hơdôm bôh sang anô̆ pơkôl pơtô pơhrăm tơlơi phiăn truh ƀing čơđai hmâo ngă tui klă laih. Biă ñu lĕ amĭ ama hmâo gơgrong ba ană nao hrăm pơ ala kơ jao rơdêh kơ ƀing čơđai nao hrăm hră”.

 Khua plơi Ksor Phiếu dô̆ gum hrŏm klă pơsir hơdôm tơlơi bơrơsua, brơdjơ̆ amăng plơi pla. Pơsur neh wa gum hrŏm kơdŏng pơgang, pơgăn ƀing ngă soh; lŏm lui phiăn juăt pơdô̆ rơkơi bơnai mơ̆ng muai, pơdô̆ rơkơi bơnai giăm drah kơtăk pioh pơdŏng tơlơi hơdip mơda yâo mơ-ak ƀơi kual plơi mơnuih ƀôn sang dô̆. Ơi Ksor Phiếu ră ruai lĕ: hăng sa čô mơnuih ping gah, khua plơi bruă hơget ñu leng kơ ngă gru hlâo, neh wa mơ̆ng hrăm tui.

“Kâo pơtă hlăk ai đĭ rơdêh khom ngă tui Tơlơi phiăn pơkă pơhlôm ƀơi jơlan nao rai kah hăng đoa muk pơgang akô̆, ƀu dưi mơñum tơpai ƀiêr lơm djă rơdêh. Khom djop thun kah mơ̆ng dưi dô̆ rơkơi bơnai, lŏm lui hơdôm phiăn juăt ƀu tŭ yua hăng pơsur hơdôm bôh sang anô̆ lĕ brơi ƀing čơđai hrăm hră tum djop. Hmâo dong sa tơlơi yôm lĕ jê̆ hăng anai hmâo tơlơi čơđai djai ia ƀlung ƀơi lu anih anom, yua anun kâo ăt pơtă pơtăn na nao mơn kơ neh wa khom lăng ba ană bă pô hloh dong, kiăng bĕ hơdôm tơlơi truh ruă pran jua tui anun”.

   Ơi Thái Hồng Cương, Khua git gai Ping gah să Ia Hrung lăi lĕ: Hơdôm bôh than kơ pơđĭ kyar bơwih ƀong – mơnuih mơnam ƀơi plơi Blo Dung hmâo črăn djru ƀu anet mơ̆ng Ksor Phiếu:

“Hăng Ksor Phiếu bruă git gai Ping gah ngă rah Khua plơi ñu na nao ngă tui bruă pok pơhai hơdôm bôh yôm hơdră bruă mơ̆ng Ping gah, tơlơi phiăn mơ̆ng Kơnuk kơna hmao tlôn truh hăng neh wa. Mơ̆ng hơdôm mông jơnum grŭp ping gah, jơnum pơhrua hrŏm hơdôm bôh plơi, ñu pơsur neh wa lŏm lui hơdôm phiăn juăt ƀu tŭ yua. Truh ră anai ƀơi plơi, bruă pơđĭ kyar bơwih ƀong hăng pơhlôm rơnuk rơnua kơđi čar hơđong na nao".

 Ksor Phiếu dưi hmâo mơnuih ƀôn sang plơi Blo Dung, să Ia Hrung, tơring glông Ia Grai, tơring čar Gia Lai kiăng khăp hăng pơpŭ biă./.