Kiăng boh sầu riêng Dak Lăk dưi hrưn truh pơ rŏng lŏn tơnah
Thứ năm, 11:00, 24/07/2025 VOV Tây Nguyên/Siu H'Mai Pơblang hăng pôr VOV Tây Nguyên/Siu H'Mai Pơblang hăng pôr
VOV.Jarai - Amăng hrơi mông bruă ba sĭ sầu riêng pơ čar rơngiao glăk dong ƀơi anăp tơlơi ngă tơnap kơ anŏ klă, kiăng ƀuh anih pơkra hăng pơhlôm anih pla hơdjă huăi hơƀak ayuh hyiăng, tơring čar Dak Lăk glăk ngă lu hơdră đah mơ̆ng bong kjăp tơlơi hmư̆ hing mơ̆ng sâu riêng lơ̆m ba sĭ pơ čar rơngiao amăng hrơi blan glăk truh bơyan pĕ boh.
Video Player is loading.
Current Time 0:00
/
Duration 0:00
Loaded: 0%
Progress: 0%
Stream Type LIVE
Remaining Time -0:00
 
1x

Tơring čar Dak Lăk ră anai hơmâo năng ai 41.000 ha đang sầu riêng, pơhrui glăi amăng thun anai năng ai ñu 400.000 tơn, lu biă mă pơhmu hăng hơdôm thun hlâo. Boh pơhrui lu nao hrŏm hăng anŏ glêh tơnap gah anŏ klă, biă ñu lu kual pla sầu riêng ƀơi hơdôm tơring čar iao gah arăng ƀu brơi tui prăk hlâo dong tag, ƀu pơhlôm tui hơnong pơkă, ngă hmư̆ hing sat kơ boh sầu riêng. Yă Nguyễn Thị Thành Thực, Khua khul wai lăng Kông ti AutoAgri pơmin, sầu riêng Dak Lăk dŏ hơmâo lu kual či đĭ kyar, gong gai hăng anom apăn bruă anai kiăng lăng nao hloh kơ mrô kual pla:“Mrô pơsit kual pla jing anăn păn, tơlơi pơhing, jing gơnam yôm mơ̆ng mơnuih pla, samơ̆ hơmâo laih bruă lu anom sĭ mơdrô pơhmao mă mrô kual pla sầu riêng ngă bruă răm ƀăm, ba nao pơ dêh čar Khač jing arăng pơdơi hĭ ƀu brơi dong tah mrô pơsit kual pla gơnam kơ ƀing ta, jing ƀing ta yơh pô rơngiă prăk. Kâo kiăng gong gai, hơdôm gơnong bruă čih pơkra hơdră ngă bruă sa thun khŏm pơsir, dưi ngă hơdôm mrô kual pla”.

Gơnong bruă hmua hăng ayuh hyiăng tơring čar Dak Lăk ngă hrŏm hăng Khul pơkra sầu riêng tơring čar hăng hơdôm anom bơwih ƀong sĭ mơdrô, anom ngă ƀong hrŏm, pơtrut pel ĕp anŏ klă, hơdjă, mă boh sầu riêng ba pơčrang lăng hŭi hơmâo jrao ngă măt, ƀuăn ƀu mă yua ia jrao kŏm, biă ñu lĕ wai lăng klă jrao vàng ô hăng cadimi. Ơi Lê Anh Trung - Khua khul pơkra sầu riêng Dak Lăk brơi thâo:“Khul hơmâo ngă hrŏm hăng hơdôm anom bruă sem lăng boh thâo hrŏm hăng hơdôm anom bơwih ƀong, anom ngă ƀong hrŏm mă čơđeh asar boh sầu riêng či pơsit kual Dak Lăk lĕ kual rơnuk rơnua, kiăng hơmâo tơlơi đăo kơnang, kiăng gêh gal amăng bruă sĭ mơdrô sầu riêng Việt Nam hăng ba sĭ pơ čar rơngiao. Amăng bruă hơdjă rơgoh, ƀing gơmơi glăk pơtô brơi hơdôm anom bơwih ƀong ngă hrŏm hăng Anom wai lăng phun pla čih pơkra hơnong pơkă či čŏm puang anih pơkra gơnam klă hloh. Mơ̆ng anun amra plai ƀiă bơdjơ̆ nao pel ĕp, wai pơgang. Hrơi mông ba nao sĭ ăt tañ hloh mơn”.

Khul ăt pơtă pơtăn kơ mơnuih ƀôn sang anăm sĭ boh mơda ôh, hŭi kơ arăng pơjuă nua ƀudah arăng ƀu kiăng đăo kơnang kơ ta dong tah. Hơdôm anom bơwih ƀong, anom ngă ƀong hrŏm ăt kiăng kĭ pơkôl ngă tui hơdôm rơnoh pơkă hơdjă, bruă pioh amăng kơthung laih anun khŏm prăp lui prăk kăk hŭi kơ arăng lui hlao prăk brơi tui hlâo, ƀu gưt blơi dong tah, ngă tơnap kơ mơnuih ngă hmua.

Kiăng sầu riêng Dak Lăk dưi hrưn truh pơ djŏp jar kmar, kiăng ngă bruă abih bang mơ̆ng bruă pơkra hơdjă, djơ̆ boh thâo, anih pla rơđah rơđông truh kơ wai lăng kjăp anih ba sĭ. Gong gai, anom bơwih ƀong hăng pô pla khŏm gum tơngan akŏ pơjing bruă pla sầu riêng jing sit nik, kjăp, dưi pơhno hăng jar kmar. Hăng tơlơi gum ngă mơ̆ng gong gai hăng anom apăn bruă, tơlơi gir mơ̆ng mơnuih ngă hmua hăng anom bơwih ƀong, Dak Lăk glăk gir bong kjăp anăn hmư̆ hing sầu riêng hơdjă, ƀơ ƀrư̆ pok prong anih sĭ mơdrô, ngă hmư̆ ư, kơdrưh ang sầu riêng Việt Nam ƀơi hră lơkak gơnam mơ̆ng hmua ba sĭ pơ čar rơngiao./.

VOV Tây Nguyên/Siu H'Mai Pơblang hăng pôr

Viết bình luận

TIN CÙNG CHUYÊN MỤC

Video

Klêi mtă mtăn kơ jih jang
Ŏ buôi krô
29/07/2024
Tơgŭm ƀô đô̆i tơblăh ayăt
13/07/2024
Việt Nam ngời sáng tương lai
11/07/2024